Nasepte 18 - Zo Bible

Corinth Khuo ah Paul

¹ Tua zaw ciengin Athen nuasie-in Corinth khuo ah Paul a pei hi.

² Tua munah ama in Pontus gammi Aquila kici Judah mi khat mu a, ama pen Claudius in Rome gam nuasie dingin Jew mite zosie thupie zo ahi ziehin a zinu Priscilla tawh Italy gam pana ang tun uh a sawt nai lo ahi hi. Ama gel tawh kimu dingin Paul pei a,

³ ama zong ama gel tawh a nasep a kibah ziehin a inn vuah tungin na a semton uhi, ama gel pen puonbuh khui nasep semte ahi uhi.

⁴ Sabbath nisielin ama in kikhopna inn ah Jew mite le Greek-te zawl sawmin thu a kikuppi hi.

⁵ Macedonia gam panin Silas le Timothy a tun ciengin Paul thuhil lamah kitahla-in Messiah in Jesu ahi hi, ci-in Jew mite kungah teci a pang hi.

⁶ Amate in ama langpangin a gensiet ciengun Paul in a puon tunga leivui bangte thingin amate kungah, “Na lutung vuah na sisan uh tu taheh! Kei maw ka peng hi. Tu-a kipanin Gentile-te kungah ka pei ta ding hi,” a ci hi.

⁷ Tua ciengin ama in kikhopna mun nuasie-in Titius Justus a kici Pasien bie pa khat’ inn ah a tung hi; a inn pen kikhopna inn gei mama ahi hi.

⁸ Kikhopna inn uhpa Crispus le a innkuonpi zosie in Topa a um uhi; tuale Paul’ thugen a za Corinth-te tampitah zong thu um mi suohin a ki-baptize uhi.

⁹ Zan khat Paul in mang mu a, ama’ mang sungah Topa in, “Zau sin, thu gen inlen dai op zaw sin;

¹⁰ keima in nang kang ompi ziehin na tungah koima in a khut hlangin ang liemsah sih ding hi, azieh pen tami khuo sungah mi tampi ka nei hi,” a ci hi.

¹¹ Khum tahah kum khat le hlaguh tamin amate lahah Pasien’ thu a hil hi.

¹² Ahi vangin Gallio pen Achaia gam uhpa ahi ciengin Jew mite in kilungtuohin Paul a busim vua, thukhen zumah a tut uhi.

¹³ Amate in, “Tam pa in thukham tawh kilebulin Pasien bie dingin mite a zawl hi,” a ci uhi.

¹⁴ Thugen dingin Paul a kisah laitahin Gallio in Jew mite kungah, “Jew mite aw, tami thu pen gamtat khielna le gitlona thu khat popo ahile na thu uh kang ngaisut pieh ding hi;

¹⁵ ahi vangin tami thu pen kammal zatziete po, minte po le na thukham zieh po vua a pieng thute ahi bo ziehin no le no in vaihawm zaw un; tami thute ah thukhenmang ka sem nuom sih hi,” a ci hi.

¹⁶ Tuale ama in thukhen zum panin amate a notmang hi.

¹⁷ Tua ciengin amate in kikhopna inn uhpa Sosthenes manin thukhenna zum mai-ah a unpi-un a satgawp uhi. Ahi vangin Gallio in tua thute phamaw a sa vet sih hi.

Antioch Khuo-a Paul a Kilekiana

¹⁸ Tua munah sawtveipi sung a tam zaw ciengin Paul in thu um mite mangpha a pai a, Priscilla le Aquila tawh tembaw tung tuongin Syria gam zuonin a pei hi. Ama in kiciemna khat nei ahi ziehin Cenchreae-ah a sam a heu hi.

¹⁹ Ephesus khuo a tun ciengun Paul in tua tahah Priscilla le Aquila a nuasie hi. Ahi vangin amasa penin ama ma kikhopna inn ah lutin Jew mite tawh thu kikupna a nei hi.

²⁰ Amate in a sawt tam dingin a hlo uleh ama in a khia hi;

²¹ ahi vangin amate tawh a kikhen ding ciengin, “Pasien deina a op leh na kung vuah kang zinkia ding hi,” a ci hi. Tua ciengin Ephesus khuo panin tembaw tawh ama a pei hi.

²² Caesarea khuo a tun ciengin Jerusalem ah peito-in hlattuom pawlpite hopi a, tua ciengin Antioch-ah a peisuh hi.

²³ Tua tahah bakhat sung hun a zah zaw ciengin peikia a, Galatia le Phrygia gam sung tengah mun khat zaw mun khat pei kawikawi-in nuazui zosie a va thakhausah ta hi.

Apollos’ Nasepna

²⁴ Tu-in Ephesus ah Alexander khuomi Apollos a kici Judah mi khat haw hi. Ama pen mi dangnal le Lai Siengtho thei mama khat ahi hi.

²⁵ Ama pen Topa’ Lampi-ah zong a kisinsa ahi hi; ama in John’ baptize na thu beh a thei vangin Jesu tawh kisai thute lawptahin genin mantahin a hil hi.

²⁶ Kikhopna inn sungah hangtahin ama thugen a kipan hi; hinanle Priscilla le Aquila-te in tua thu a zah ciengun ama hlanin a manzaw-in Pasien’ Lampi thu a hilcien uhi.

²⁷ Achaia gamah a galkai nuom ciengin thu um mite in ama a hanthawn vua, nuazuite in a na lamdot nadingun lai a hlah uhi. Tua gam a tun ciengin ama in hepina zieha thu um a na suohsa mite nahpitahin a panpi hi.

²⁸ Azieh pen ama in mipi mai-ah Jew mite khautahin niel gawp a, Messiah pen Jesu ahi hi, ci-in Lai Siengtho pansia-in amate a lah hi.