Nasepte 12 - Zo Bible

James Kithat, Peter Thongkie

¹ Khum hun sawng tengin Herod Kumpipa in hlattuom pawlpi mi kimkhat a bawlsie hi.

² Ama in John’ sanggampa James zong namsau tawh thatsah hi.

³ Tua thu in Jew mite lungkimsah hi, ci a mu bepin ama in Peter zong mansah leuleu hi. (tua hun pen Tolsawlo Anlum Pawi hun sung ahi hi. )

⁴ Ama a mat zaw ciengin ama in thong sungah khum a, Peisan Pawi a ven ciengin mipi mai-a peipi dingin li ta-a om galkap pawl lite’ cin dingin ap hi.

⁵ Thong sungah Peter a kikhum laitahin hlattuom pawlpi mite in ama adingin Pasien kungah nahpi tahin thu a ngetpieh uhi.

Thong panin Peter Kihla

⁶ Herod in Peter a lahkhiet ding kuon tuami zan ma-in siakhau gui ni tawh a kikhisa-in galkap nite kikalah Peter lum a, kot mai-ah thongcingte in a cing uhi.

⁷ Topa’ vantungmi khat thakhatin kilang a, thong inn sung teng khuovah khat in a tanvah hi. Vantungmi in Peter a pang behpieh a, “Mallangin tho in,” ci-in a phong leh a khuta siakhaute a kiphelmang hi.

⁸ Vantungmi in, “Na kawnggah gah inlen na kedap bul in,” a ci bangin ama in zong a bawl hi. Tua ciengin vantungmi in, “Na puonzal vat inlen ei zui in,” a ci hi.

⁹ Peter zong pusuohin ama a zui hi; ama in tua vantungmi’ huna tawh a pieng thu teng a tahtah ahi lam a thei vateh sih a, mangmu-in a kingaisun lel hi.

¹⁰ A khatna le a nina thongcingte a kal zaw ciengun khuopi sung lutna siakotpi mai a tung uhi. Tua kotpi ama thu-in ama gel adingin kihong a, tuale ama gel pusuohin lampi khat a zui laitahun vantungmi in thakhatin Peter a nuasie hi.

¹¹ Tua ciengin Peter khuophawh a, “Tu-in Topa in a vantungmi sawlin, Herod’ khut sung pan le Judah-te’ kinepna zosie sung panin ei hunkhie zo hi, ci thu ka theicien ta hi,” a ci hi.

¹² Ama in tam thu a thei behin a mindang khat Mark a kici John’ nu Mary inn ah haw a, tua sungah mi tampi kikhawmin thu a na ngen uhi.

¹³ Ama in a pulam kot a kiu leh a dawng dingin Roda kici nasem numei khat a pei hi.

¹⁴ Tua nu in Peter’ aw ahi lam a thei bepin a kipah seng ziehin kot honpieh tah zawh sangin inn sungah tai-in Peter kotah ding hi, ci-in a va gen ta hi.

¹⁵ Amate in tua nu kungah, “A maw na mah!” a ci uhi. Hizongle tua nu in a om tahtah ma ahi hi, a ci paupau ciengin amate in, “Ama’ vantungmi hi bo va,” a ci uhi.

¹⁶ Tua sung tengin Peter in kot a kiukiu hi; tuale amate in kot a hon ciengun ama a mu vua, lamdang a sa mama uhi.

¹⁷ Ama in a ham lo nadingun amate a khut tawh lah a, Topa in thong sung panin ama a lahkhiet dan teng a gen hi. Ama in, “James le thu um mite kungah tam thu va gen ta un,” a ci be lai hi. Tua ciengin ama in tua mun nuasie-in mundangah a pei hi.

¹⁸ A zing ciengin galkapte lahah Peter bangci ta ahei, ci thu buoina lienpi a om hi.

¹⁹ Herod in ama suisahin a mu lo bepin thongcingte thu sit a, tuale tha dingin amate thu a pie hi. Tua ciengin Judea gam panin Caesarea khuo-ah Herod peisuhin tua munah a tam hi.

Herod’ Sina

²⁰ Tu-in Tyre le Sidon mite tungah Herod lungthah mama hi. Tuaci’n amate kithutuoh tahin ama kungah a pei uhi. Amau’ gam pen kumpipa’ gama anneh ding puasui ahi bo ziehun amate in kumpi’ inn sunga vaihawm ulien Blastus a zol zaw ciengun kilemna ding a ngen uhi.

²¹ Kiciem ni a tun ciengin Herod in a kumpi puontuol sil a, kumpi’ topha tungah to-in amate kungah thu a gen hi.

²² Tua ciengin mite in, “Tam pen mihing’ aw ahi sih a, pasien khat’ aw ahi hi!” ci-in a awng uhi.

²³ Herod in Pasien’ min a phat lo ziehin thakhatin Pasien’ vantungmi khat in ama a ci nasah a, than in netumin a si hi.

²⁴ Ahi vangin Pasien’ thu khangin thuzui mi a pung semsem hi.

²⁵ A nasep uh a man zaw ciengun Barnabas le Saul in a mindang khatah Mark a kici pa John zawpi-in Jerusalem ah a kilekia uhi.