Nasepte 1 - Zo Bible

Hlagau Siengtho Kikamciem

¹ Theophilus aw, laibu masa sungah Jesu in a sep le a hilte zosie a kipatcil a kipan,

² a teelsa sawltahpite tungah Hlagau Siengtho tungtawnin a lah zaw ciengin vantunga a kilahto donga thute ka giel ahi hi.

³ Ama’ thuoh gimna zaw ciengin ni sawmli sung sawltahpite kungah kilah a, teci tampite tawh a nungta tahtah ahina lahin Pasien’ manggam thu a hil hi.

⁴ Amate tawh a opton laitahin Jerusalem nuasie loin tua munah Pa’ kamciemna a nga nadingun ama in thu a pie hi. Ama in, “Tami thu keima kung pana na zahsa uh ahi hi,” a ci hi;

⁵ azieh pen John in tui tawh mite baptize a, ahi vangin a sawt loin Hlagau Siengtho tawh note ang kibaptize ding hi,” a ci hi.

Jesu Van a Kana

⁶ Tuaci’n amate a kikhop ciengun ama kungah, “Topa aw, Israel-te tunga kumpi’ gam na piehkia ding tuhun a ta amah?” ci-in dong uhi.

⁷ Ama in, “Pa in ama’ thuneina tawh a sesa hun le nite note thei ding thu ahi sih hi.

⁸ Ahi vangin na tung vuah Hlagau Siengtho ang tun ciengin vanglietna na nga ding vua, Jerusalem, Judea, Samaria le leimong dongin ka teci na hi ding uhi,” a ci hi.

⁹ Tami thu a gen zaw, amate in a et laitahun ama kilato a, meiilom khat in a dopto dawh ziehin a kimu thei nawn sih hi.

¹⁰ Ama a kilahto amate in vantung lam a etto laitahun puontuol kang sil pasal ni thakhatin amate kungah a ding hi.

¹¹ Tua tegel in, “Galilee mite aw, bang dinga vantung lam enin ding ngetngut na hi uh ahei? Na kungpan vua vantunga kilato tami Jesu khu vantunga a peito na mu ma bangun ang peikia ding hi,” a ci hi.

Judas Zalaih ding Matthias Kiteel

¹² Tua ciengin Jerusalem tawh a kinai, Sabbath ni khat lam ahi Olivet a kici muol panin Jerusalem ah amate a kilekia uhi.

¹³ Khuopi sung a lut ciengun Peter, John, James, Andrew, Philip le Thomas, Bartholomew le Matthew, Alphaeus’ tapa James, Simon Zealot le James’ tapa Judas-te tunna inndan tungah amate a kato uhi.

¹⁴ Amate zosie in numei pawlkhat, Jesu’ nu Marry, le a sanggam pasalte tawh lungsim kikhatin thungetna a nei zing uhi.

¹⁵ Tua laitahin thu um mite lahah Peter dingto-in, (mihonpi za le sawm ni bang pha hi)

¹⁶ “Sanggamte aw, Lai Siengtho sungah Jesu a mante’ makai pa Judas tungtang thu tawh kisai-in David’ genkholna a tangtun lo phamaw hi.

¹⁷ Bangzieh ahei cile tua Judas khu eite tawh kisimton mi khat ahi a, tam nasepna sunga zong a kihal khat ahi hi.

¹⁸ (Tu-in tua pa in a gitlona thaman tawh lo khat lei a, ama bungbu kiehin a gilpi pawhkeh a, a gilzam zosie lawtmang hi.

¹⁹ Jerusalem-a teng zosie in tami thu a thei uhi. Tua logam pen amau’ hamin, ‘Akeldama’ a ci vua, ‘Sisan Lo’ a cinopna ahi hi.)

²⁰ “Bangzieh ahei cile Late laibu sungah, A tenna mun gamkhing suohin, khum munah koima teng sih hinlen, a cina le ‘A makai dinmun pen midang khat in luo taheh,’ ci-in kigiel hi.

²¹ Tuaci’n khum bang mi dingte pen, eite lahah sungtum pusuohin Topa Jesu a op hun sung zosie,

²² John’ baptize-a kipanin vantungah Jesu a kilah dong, ama’ thawkiana thu-ah eite tawh teci a pangton mite lahah khat ahi kul hi,” a ci hi.

²³ Tuaci’n amate in mi ni, Barsabbas le Justus zong a kici Joseph le Matthias a se uhi.

²⁴ Tua ciengin amate in thu ngenin, “Topa aw, nangma in mi zosie’ lungsim na thei hi.

²⁵ Ama’ opna ding munah Judas pei-in a nuasie tami sawltahpi nasepna-ah panmun a la dingin tam mi nite lahah koi zaw teel na hei ei lah in,” a ci uhi.

²⁶ Amate in lai-ai sanin Matthias tungah tu ahi ziehin sawltahpi sawm le khat lahah ama kigawmbe hi.