Nahum 1 - Zo Bible

¹ Tam pen Nineveh tawh kisai thuphuon hi a, Elkosh khuomi Nahum’ mangmuna laibu ahi hi.

A Nasie Pasien’ Lungthahna

² Topa pen a thangsie le phulah hat Pasien ahi a, Topa in phula a, a lungthah mama hi; ama a langpangte tungah Topa in phu la a, a galte tungah ama a thangpai hi.

³ Topa lungthah bai loin, ahi vangin vanglien mama a, tuale Topa in a khielte dan pieh loin mawh hla lo ding hi. A lampi pen pingpei lah le huipi lah ahi a, meiilumte pen a ketot leivui ahi hi.

⁴ Ama in tuipi hosie-in kanggawsah a, gun zosie a kanggawsah hi; Bashan le Carmel muolte gawta a, Lebanon paape vulnang hi.

⁵ Ama mai-ah muolte kiling a, muoltangte a tuisuoh hi; ama mai-ah leitang, leitung le a sunga a teng zosie a kilawh uhi.

⁶ A thangpaina mai-ah koi ding zo ding ahei? A lungthahna koi in thuoh zo ding ahei? Meikuong bangin a thangpaina kisung a, ama ziehin suongpite a pawhkeh hi.

⁷ Topa hoi a, lungkham hunin kibuhna mun muonhuoi ahi hi; ama sunga a kibu mite ama in a humbih a,

⁸ tuikhang sung nangawnah a langte mangthaisah ding a, khuomiel lahah a galte a delmang ding hi.

⁹ Bang dinga Topa na do sawm ahei? Ama in maimangsah ding a, a langte koima nivei dingkia zo lo ding hi.

¹⁰ Amate ling bangin kikanbawmin, lenggazu khamte bangin a om vua, butu gawta bangin a katum uhi.

¹¹ Nang kung panin Topa a langpan dingin, thusie bawl sawm mi khat pusuoh zo hi.

Judah ading Lungdamna Thu

¹² Topa in tam bangin ci hi, “Amate bangci hatin hatin tam zong nan ule, amate kisusie-in a mangthai veve ding uhi. Keima in kang bawlsiet ngai vangin, kang bawlsie nawn sih ding hi.

¹³ Tu-in na tung panin ama’ hahkol ka hliehtawng ding a, ang kikhina khaute ka botsan ding hi,” a ci hi.

¹⁴ Topa in nang tawh kisai thupie zo hi: “Na min kizom suoh nawn lo ding hi; na pasien-te’ inn panin a bawltawm milim le a kisung milim ka sumaimang ding hi. Kimanna nei lo na hi ziehin na hankhuh ka bawl ding hi,” a ci hi.

¹⁵ Muolte tungah lungdamna thu a puoh, kilemna a phuongzah mipa’ keng en un! Judah aw, na pawite bawl inlen, na kiciemnate uh tangtungsah in, azieh pen migilote in ang sim ngai nawn sih ding hi; amate kisumaimang zo hi.