Misimna 8 - Zo Bible

Meivah Sagite

¹ Topa in Moses hopi-in tam bangin a gen hi:

² Aaron hopi inlen tam bangin gen in: Meivahte na koi ciengin meivah sagite in meivah tunna mai teng a tan dingin koi in.

³ Tua bangin Aaron in a bawl hi. Topa in Moses a thupiehsa bangin ama in meivah tunna mai teng a tan dingin meivahte koi hi.

⁴ Tam meivah tunna kibawl dan pen kham tawh kiseh ahi hi. A tunna panin a papete dongin a kiseh ahi hi; Topa in Moses a lahsa lim dan dung zui-in ama in meivah tunna a bawl hi.

Kisiensuona le Levi-te’ Nasep

⁵ Topa in Moses hopi-in tam bangin a gen hi:

⁶ Israel-te lah panin Levi-te ladawh inlen siensuo in.

⁷ Amate siensuo nadingin a tung vuah tam bangin bawl in: Siensuona tui a tung vuah the inlen, a pumtung zosie uh mulmetna tawh metsah inlen, a puonte uh sawpin amate ma na kisiensuosah ding hi.

⁸ Tua ciengin bawngtangno khat le sathau kihal annel tuituoh tawh kibawl an tawh biehna na la sah ding a, nang in mawna zieha biehna dingin adang bawngtangno khat na la ding hi.

⁹ Kikhopna puonbuh mai-ah Levi-te na zawpi ding a, Israel mihon buppi na khawm ding hi.

¹⁰ Topa mai-ah Levi-te na zawpi ciengin Israel-te in Levi-te tungah a khut uh a ngam ding vua,

¹¹ amate in Topa’ na a sep thei nadingun Aaron in Israel-te lah panin Levi-te, Topa mai-ah a kivei biehna-in a pie ding hi.

¹² Levi-te in bawngtangte’ lu tungah khut a ngam ding vua, Levi-te ading thoidamna bawl nadingin Topa tungah mawna zieha biehna-in khat, meihal biehna-in a khat, na pie ding hi.

¹³ Tua ciengin Aaron le a tapate mai-ah Levi-te na dingsah ding a, Topa tunga a kivei biehna-in amate na pie ding hi.

¹⁴ Tua bangin Israel-te lah panin Levi-te na tuomkoi ding a, Levi-te keima-a’ hi ding hi.

¹⁵ Amate siensuo-in a kivei biehna-in na pieh zaw ciengin kikhopna puonbuh-ah na sem dingin Levi-te lut ding hi.

¹⁶ Azieh pen Israel-te lah panin kei tungah amate ang kipie sieng ahi ta uhi. Israel-te’ tacil zosie, naubu a hong masa zosie tangin keima adingin amate ka la zo hi.

¹⁷ Azieh pen Israel-te lah panin tacil zosie mihing hile ganhing hile a nipi-in keima-a’ ahi hi. Egypt gam sungah tacil zosie ka thagam ni-in keima dingin amate ka siensuo a,

¹⁸ ahi vangin Israel-te lah panin tacil zosie tangin Levi- te ka la zo hi.

¹⁹ Tham loin kikhopna puonbuh-ah Israel-te dinga na sem ding le mun siengtho tawh kinai-a a pei Israel-te lahah gimna a tun lo nadinga thoidamna a bawlpieh dingin Israel-te lah panin Aaron le a tapate tungah letsongin Levi-te ka pie zo hi.

²⁰ Moses le Aaron le Israel mihonpi zosie in Levi-te tungah tua bangin a bawl uhi; amate tawh kisai-in Topa in Moses kunga a thupiehsa bang lien ma-in Israel-te in Levi-te tungah a bawl uhi.

²¹ Mawna panin Levi-te kisiensuo-in a puonte a sawpsieng uhi; tua ciengin Aaron in a kivei biehna-in Topa mai-ah amate pie a, a sientho nadingun Aaron in amate dingin thoidamna a bawlpieh hi.

²² Tua ciengin Aaron le a tapate opna kikhopna puonbuh sunga na a sem dingin Levi-te a sungtum uhi. Levi-te tawh kisai-in Topa in Moses a thupiehsa bangin amate tungah a bawl uhi.

²³ Topa in Moses hopi-in tam bangin a gen hi:

²⁴ Tam pen Levi-te tunga zah ding ahi hi: Kikhopna puonbuh nasepna sunga a sem dingin kum sawmni le nga pan a tungsie a phate kipan ding uhi;

²⁵ tuale kum sawmnga a phah vua kipanin nasepna pan khawlin bangma a sem nawn sih ding uhi.

²⁶ Kikhopna puonbuh sunga a sanggamte a hu thei bep ding vua, hizongle amate in na a sem nawn sih ding uhi. Tam bangin Levi-te nasep ding na sepieh ding hi.