Misimna 3 - Zo Bible

Aaron’ Tapate

¹ Tam pen Topa in Sinai Muol tungah Moses a hopi lai-a Aaron le Moses’ pienna guite ahi hi.

² Tam teng pen Aaron tapate’ min ahi hi: A tapa tapen Nadab, Abihu, Eleazar, le Ithamar ahi hi;

³ tam teng pen siempu sathau kinusa, siempu na sem dinga kisudetsa Aaron tapate’ min ahi hi.

⁴ Sinai senel gam Topa mai-ah mei siengtho lo a pieh ciengun Topa mai-ah Nadab le Abihu a si vua, ama gel in ta a nei sih uhi. A pa uh Aaron hin sungin Eleazar le Ithamar in siempu sem uhi.

Levi-te’ Mawpuohte

⁵ Tua ciengin Topa in Moses hopi-in tam bangin a gen hi:

⁶ Levi minamte a nai-ah peipi inlen, amate in siempu Aaron a hu thei nadingin a mai-ah koi in.

⁷ Biehbuhah a sep ciengun ama le a kikhawm mihon buppi adingin kikhopna buh mai-ah amate in na a sem ding uhi;

⁸ amate in kikhopna buh vanzah zosie a vaan ding vua, biehbuh-ah a sep ciengun Israel-te’ nasep ding teng sem ding uhi.

⁹ Nangma in Aaron le a tapate tungah Levi-te na pie ding hi; amate pen Israel-te lah panin ama tunga kipumpieh ahi uhi.

¹⁰ Ahi vangin nangma in Aaron le a suon a hlahte’ min na khum ding hi; amate pen siempu’ na sem dingte ahi vua, amate kunga a pei a pulam mi khatpopo kithat ding hi.

¹¹ Tua ciengin Topa in Moses hopi-in tam bangin a gen hi:

¹² Israel-te lahah naubu hong tacil zosie tang dingin keima in Israel-te lahah Levi-te ka sang hi. Levi-te pen keima-a’ hi ding hi,

¹³ azieh pen tacil zosie keima-a’ ahi hi. Egypt gam sungah tacil zosie ka thagam lai-in, Israel sunga tacil zosie, mihingte le ganhingte a ni-in keima adingin ka siensuo hi; amate pen keima-a’ hi ding hi. Keima Topa ka hi hi.

Levi-te Mi Phaza Simna

¹⁴ Tua ciengin Topa in Sinai senel gamah Moses hopi-in tam bangin a gen hi:

¹⁵ Levi-te, a pupa’ innkuonkuon le a bebe-in sim in. Hla khat pan a tungsie pasal poma na sim ding hi.

¹⁶ Tuaci’n ama thu a kipieh bangin Topa’ kammal tawh kizui-in Moses in amate a sim hi.

¹⁷ Levi tapate’ min pen: Gershon, Kohath, le Merari ahi hi.

¹⁸ Amau’ be zui-in Gershon tapate’ min pen: Libni le Shimei ahi hi.

¹⁹ Amau’ be zui-in Kohath’ tapate min pen: Amram, Izhar, Hebron, le Uzziel ahi hi.

²⁰ Amau’ be zui-in Merari’ tapate min pen: Mahli le Mushi ahi hi. Tam teng pen amau’ pupa innkuon zui-in Levi-te’ bete ahi uhi.

²¹ Libni mite le Shimei mite pen Gershon-te’ be ahi uhi; tam teng pen Gershon-te’ bete ahi uhi.

²² Amate, hla khat panin a tungsie pasal zosie a kisimna-ah tulsagi le zanga a pha uhi.

²³ Gershon-te be in nitumna lam biehbuh nua-ah giephuol a sat ding vua,

²⁴ Gershon-te’ pupa innkuon lutang pen Lael’ tapa Eliasaph ahi hi.

²⁵ Kikhopna puonbuh sunga Gershon tapate’ nasep pen a biehbuh, puonbuh a tuomna tawh, kikhopna puonbuh lutna puonkhai,

²⁶ buhtuol puon kikhaite, biehbuh le maitam kimvela om buhtuol lutna puonkhai, le khauhuolte le tuate tawh kisai nasep zosie ahi hi.

²⁷ Kohath-te be pen Aram-te, Izhar-te, Hebron-te, le Uzziel-te ahi hi; tam teng pen Kohath-te’ be ahi hi.

²⁸ Hla khat le a tungsie pasal zosie, biehbuh nasep a sem poma a kisimna-ah tulgiet le zaguh a pha vua, amate in mun siengtho cin ding tavuon nei uhi.

²⁹ Kohath-te’ be in biehbuh leitaw lamah giephuol a sat ding vua,

³⁰ Kohath-te’ bete sung panin a pupa innkuon lutang pen Uzziel’ tapa Elizaphan ahi hi.

³¹ Amau’ nasep dingte pen thuciemna singkuong, sabuoi, meivah tunna, maitamte, mun siengtho sunga siempupa nasepna vanzahte, kidalna puonkhai le tam teng tawh a kisai nasep zosie van ding ahi hi.

³² Siempu Aaron’ tapa Eleazar pen Levi makaite tungah a uhpi pa hi ding a, mun siengtho cing dinga kikoi mite’ nasepna vil ding hi.

³³ Mahli-te le Mushi-te pen Merari-te’ be ahi uhi: Tam teng pen Merari-te’ be ahi hi.

³⁴ Hla khat panin a tungsie a kisim pasal poma tulguh le zani ahi hi.

³⁵ Merari’ bete lahah a pupa innkuon lutang pen Abihail’ tapa Zuriel ahi hi; amate in biehbuh leilu lampangah giephuol sat ding uhi.

³⁶ Merari’ tapate et dinga kise nasep ahile biehbuh khuompehte, a zawlte, a khuompite, a tunnate, a nengthem zosie le tua teng tawh kisai nasep zosie ahi hi;

³⁷ a buhtuol kimvela khuompite, a tunnate, khetphimte, le a khaute tawh zong ahi hi.

³⁸ Nisuona lampang biehbuh mai, nisuona maingatin kikhopna puonbuh mai-ah giephuol sat dingte pen mun siengtho sungah Israel-te dinga bang khat popo a seppieh dingte ahi Moses, Aaron le Aaron’ tapate ahi uhi; a nai-a pei a pulam mi popo kithat ding hi.

³⁹ Moses le Aaron in Topa’ thupiehna tawh amau’ be zui-in a sim uh hla khat le a tungsie Levi-te pasal zosie tul sawmni le tulni pha hi.

Tacil Kitatna

⁴⁰ Tua ciengin Topa in Moses kungah tam bangin a gen hi: Israel-te lahah hla khat pan a tungsie tacil pasal zosie’ min ciemte inlen amau’ min sim in.

⁴¹ Ahi vangin Israel-te lahah tacil zosie tang dingin keima dingin Levi-te nei sanpieh ding a, Israel-te’ ganhonte lahah tacil zosie tang dingin Levi-te’ ganhonte nei sanpieh ding hi- keima Topa ka hi hi.

⁴² Tuaci’n Topa in ama a thupieh bangin Moses in Israel-te lahah tacil zosie’ min ciemte hi.

⁴³ A min kiciemte, a kisim hla khat panin a tungsie tacil pasal zosie tul sawmni le tulni le zani le sawmsagi le thum ahi hi.

⁴⁴ Tua ciengin Topa in Moses hopi-in tam bangin a gen hi:

⁴⁵ Israel-te lahah tacil zosie tang dingin Levi-te sang inlen, amau’ ganhonte tang dingin Levi-te’ ganhonte sang in. Levi-te pen keima-a’ ahi hi. Keima Topa ka hi hi.

⁴⁶ Levi-te sangin zani le sawmsagi le thumin a tamzaw Israel tacilte kitat manh dingin

⁴⁷ mun siengtho shekel tena tawh kizui-in shekel khatah gerah sawmni a pha shekel nga na sang ding hi.

⁴⁸ A tamzawte kitatna sum pen Aaron le a tapate tungah pie in.

⁴⁹ Tuaci’n Levi-te in a tat uh a tamzawte kitatna sum pen Moses in la hi;

⁵⁰ ama in mun siengtho shekel tena tawh kizui-in tulkhat le zathum le sawmguh le nga a la hi.

⁵¹ Topa’ thugen tawh zui-in Topa in Moses a thupieh bangin tatna sumte Moses in Aaron le a tapate a pie hi.