Misimna 28 - Zo Bible

Nisiel Biehnate

¹ Topa in Moses hopi-in tam bangin a gen hi:

² “Israel-te thupie inlen amau’ tungah tam bangin gen in: Keima dinga mei tawh kihal biehna an, a gimnamtui keima-a’ pen a kise hunin ka kungah nei pieh ding uh phawh un.

³ Nangma in amate kungah, Tami khu Topa tunga na pieh ding uh mei tawh kihal biehna ahi hi, na ci ding hi: Tatsat lo biehna-in nisielin paubang lo kumkhat a pha tuuno ni na pie ding uhi.

⁴ Zingmawngin tuuno khat na pie ding vua, khuo a mut ciengin adang tuuno khat na pie ding uhi.

⁵ Note in an tawh biehna dingin annel tuituoh ephah khat’ sesawm-suo-sekhat le a kigawi sathau ephah khat’ seli-suo-sekhat zong halin na pie ding uhi.

⁶ Tam pen Sinai Muol tunga kikipsah, Topa tungah a gimnamtui dinga kitatsatlo-a kipie mei tawh kihal biehna ahi hi.

⁷ Dawn thei biehna pen tuuno khatah hin khat’ seli-suo-sekhat hi ding hi; Topa tunga dawn thei biehna dingin siengtho munah lenggazu-cia pen na sung ding uhi.

⁸ Tuuno adang khat pen zingmawnga a khat ma bangin khuo a mut ciengin an tawh biehna le dawn thei biehna tawh na pie ding uhi; note in Topa tungah a gimnamtui dingin mei tawh kihal biehna na lui ding uhi.

Sabbath Biehnate

⁹ Sabbath ni-in kum khat a pha, paubang lo tuuno ni le an tawh biehna-in sathau tawh kihal annel tuituoh ephah khat’ sesawm-suo- seni le dawn thei biehna tawh hi ding hi.

¹⁰ Tam pen a kitatsatlo meihal biehna le dawn thei biehnate banah Sabbath siela na bawlbe ding uh meihal biehna ahi hi.

Hlasiel Biehnate

¹¹ Na hlate uh a kipat sielin Topa tungah meihal biehna na pie ding vua, bawngtang guol ni, tuutang khat, paubang lo kum khat a pha tuuno apa sagi hi ding hi;

¹² bawngtang khatah an tawh biehna-in sathau kihal annel tuituoh ephah khat’ sesawm-suo -sethum zong hi ding hi; tuale tuutang khatah an tawh biehna dingin sathau kihal annel tuituoh ephah khat’ sesawm-suo-seni hi ding hi;

¹³ tuuno zosie adingin an tawh biehna-in sathau kihal annel tuituoh sesawm-suo-sekhat hi ding a, tua khu Topa tungah mei tawh kihal a gimnamtui meihal biehna ahi hi.

¹⁴ Bawngtang khatah dawn thei biehna-in zu hin khat’ alang, tuutang khatah hin khat’ sethum-suo -sekhat, tuuno khatah hin khat’ seli-suo-sekhat hi ding hi. Tami khu kum khat sungin a hla siela meihal biehnate ahi hi.

¹⁵ Topa tungah mawna zieha biehna dingin keel apa khat kipie ding hi; tua pen kitatsatlo-a meihal biehna le dawn thei biehnate bana kipie ding ahi hi.

Peisan Pawi Biehnate

¹⁶ Hla masa a ni sawm le li ni-in Topa’ Peisan Pawi kibawl ding hi.

¹⁷ Tam hla a ni sawm le nga ni pen pawi bawl ni ahi hi; ni sagi sung tol saw lo an kine ding hi.

¹⁸ A ni masa ni-in siengtho kikhopna khat om ding a, leitung nate na sem sih ding uhi.

¹⁹ Topa tungah meihal biehna-in bawngtangno ni, tuutang khat, le kum khat a pha tuuno apa sagi na pie ding uhi; tuate pen paubang lo hi ding hi, ci thei un.

²⁰ Amau’ an tawh biehna pen sathau kihal annel tuituoh hi ding hi: Bawngtang khatah annel tuituoh ephah khat’ sesawm-suo-sethum na pie ding vua, tuutang khatah sesawm-suo-seni hi ding hi;

²¹ tuuno sagite khatah sesawm-suo-sekhat na pie ding uhi;

²² thoidamna bawl nadingin mawhna zieha biehna-in keel apa khat zong hi ding hi.

²³ Tam teng pen zingmawng tatsatlo-a kibawl meihal biehnate banah na bawlbe ding uh ahi hi.

²⁴ Tua bangma-in mei tawh kihal an tawh biehna ahi, Topa tunga a gimnamtui, ni sagi sung ni sielin na pie ding uhi; tatsatlo-a kibawl meihal biehna le dawn thei biehnate banah tuate kipiehbe ding hi.

²⁵ A ni sagi ni-in a siengtho kikhopna khat na nei ding uhi; tua ni-in leitung nasepte na sem sih ding uhi.

Nipi Pawi Biehnate

²⁶ Topa tungah biehna-in ga masa na pieh ni uh, nipikal pawi sung antha na pieh ni-un a siengtho kikhopna khat na bawl ding uhi; khum ni-in leitung nate na sem sih ding uhi.

²⁷ Topa tungah a gimnamtui meihal biehna na lui ding vua, bawngtang ano ni, tuutang khat, le kum khat a pha tuuno apa sagi hi ding hi.

²⁸ Amau’ an tawh biehna dingin bawngtang khatah sathau kihal annel tuituoh ephah khat’ sesawm-suo-sethum, tuutang khatah sesawm-suo-seni,

²⁹ le tuuno sagite khatah sesawm-suo-sekhat ciet na pie ding uhi;

³⁰ note ading thoidamna bawlna-in keel apa khat hi ding hi.

³¹ A tatsatlo-a bawl meihal biehna le an tawh biehnate banah tuate le dawn thei biehna na piehbe ding uhi. Tua teng pen paubang lo hi ding hi.