Misimna 26 - Zo Bible

Khangtha Mi Phaza Simna

¹ Pul natna zaw ciengin Topa in Moses le siempu Aaron’ tapa Eleazar kungah,

² “A kikhawm Israel mipi buppi kum sawmni pan a tungsie, amau’ pupa innkuon zui-in Israel sung panin paltan tum thei ding poma sim in,” a ci hi.

³ Moses le siempu Eleazar in Jericho galkhat Jordan gun gei, Moab zanglei-ah amate tawh kiho a,

⁴ “Topa in Moses a thupiehsa bangin, “Kum sawmni pan a tungsie teng sim un,” a ci hi. Egypt gam pan a a pei Israel-te:

⁵ Israel’ ta masa Reuben ahi hi. Reuben’ suonlehlahte: Hanoch pan Hanoch bete; Pallu pan Pallu bete;

⁶ Hezron pan Hezron bete; Carmi pan Carmi bete ahi uhi.

⁷ Tam teng khu Reuben’ bete ahi uhi; amate mi tul sawmli le tulthum le zasagi le sawmthum pha hi.

⁸ Tuale Pallu’ tapa Eliab ahi hi.

⁹ Eliab’ tapa teng pen: Nemuel, Dathan, le Abiram ahi uhi. Tam Dathan le Abiram pen Korah tawh kipawlin Topa a na langdo lai-un Moses le Aaron langdo dinga mihonte lah pana na kiteel Dathan le Abiram tegel ma ahi a,

¹⁰ lei in a kam kahin Korah tawh amate val tumin amau’ pawl teng a si sieng uhi; mei in zong mi zani le sawmnga a kahtum ciengin amate pen midangte dingin kithuhilna a suoh uhi.

¹¹ Ahi vangin Korah’ tapate si lo hi.

¹² Amau’ be zui-in Simeon’ suon lehlahte: Nemuel pan Nemuel bete; Jamin pan Jamin bete; Jachin pan Jachin bete;

¹³ Zerah pan Zerah bete; Shaul pan Shaul bete ahi uhi.

¹⁴ Tam teng pen Simeon bete ahi vua, mimal tul sawmni le tulni le zani pha uhi.

¹⁵ Amau’ be zui-in Gad suonlehlahte: Zephon pan Zephon bete; Haggi pan Haggi bete; Shuni pan Shuni bete;

¹⁶ Ozni pan Ozni bete; Eri pan Eri bete;

¹⁷ Arod pan Arod bete; Areli pan Areli bete ahi uhi.

¹⁸ Tam teng pen Gad namdangte ahi vua, mimal tul sawmli le zanga pha uhi.

¹⁹ Judah’ tapate pen Er le Onan ahi uhi; Er le Onan pen Canaan gamah a si uhi.

²⁰ Amau’ be zui-in Judah’ suonlehlahte: Shelah pan Shelah bete; Perez pan Perez bete; Zerah pan Zerah bete;

²¹ Perez-te: Hezron pan Hezron bete; Hamul pan Hamul bete ahi uhi.

²² Tam teng pen Judah bete ahi vua, mimal tul sawmsagi le tulguh le zanga pha uhi.

²³ Amau’ be zui-in Issachar’ suon le hlahte: Tola pan Tola bete; Puvah pan Puvah bete;

²⁴ Jashub pan Jashub bete; Shimron pan Shimron bete ahi uhi.

²⁵ Tam teng pen Issachar bete ahi vua, mimal tul sawmguh le tulli le zathum pha uhi.

²⁶ Amau’ be zui-in Zebulun suole hlahte: Sered pan Sered bete; Elon pan Elon bete; Jahleel pan Jahleel bete ahi uhi.

²⁷ Tam teng pen Zebulun bete ahi vua, mimal tul sawmguh le zanga pha uhi.

²⁸ Amau’ be zui-in Joseph’ tapate: Manasseh le Ephraim ahi uhi.

²⁹ Manasseh’ suonlehlahte: Machir pan Machir bete; Machir pen Gilead’ pa ahi a; Gilead pan Gilead bete ahi uhi.

³⁰ Tam teng pen Gilead’ suonlehlahte ahi uhi: Iezer pan Iezer bete;

³¹ Asriel pan Asriel bete; Shechem pan Shechem bete;

³² Shemida pan Shemida bete; Hepher pan Hepher bete ahi uhi.

³³ Tu-in Hepher’ tapa Zelophehad in tapa nei lo a, hizongle tanu a nei hi. Zelophehad tanute’ min in Mahlah, Noah, Hoglah, Milcah, le Tirzah ahi hi.

³⁴ Tam teng pen Manasseh bete ahi vua, mimal tul sawmnga le tulni le zasagi pha uhi.

³⁵ Amau’ be zui-in Ephraim’ suonle hlahte: Suthelah pan Suthelah bete; Becher pan Becher bete; Tahan pan Tahan bete ahi uhi.

³⁶ Suthelah’ suonlehlahte: Eran pan Eran bete ahi uhi.

³⁷ Tam teng pen amau’ be zui-a Joseph’ suonlehlahte ahi uhi.

³⁸ Amau’ be zui-in Benjamin suonle hlahte: Bela pan Bela bete; Ashbel pan Ashbel bete; Ahiram pan Ahiram bete;

³⁹ Shephupham pan Shephupham bete; Hupham pan Hupham bete ahi uhi.

⁴⁰ Bela’ tapate pen Ard le Naaman ahi uhi: Ard pan Ard bete; Naaman pan Naaman bete ahi uhi.

⁴¹ Tam teng pen amau’ be zui-in Benjamin’ suonlehlahte ahi a, mimal tul sawmli le tulnga le zaguh pha uhi.

⁴² Amau’ be zui-in Dan’ suonlehlahte: Shuham pan Shuham bete ahi vua, tam teng pen amau’ be zui-in Dan suonlehlahte ahi uhi.

⁴³ Shuham bete zosie: mimal tul sawmguh le tulli le za li pha uhi.

⁴⁴ Amau’ be zui-in Asher suonle hlahte: Imnah pan Imnah bete; Ishvi pan Ishvi bete; Beriah pan Beriah bete ahi uhi.

⁴⁵ Beriah’ suonlehlahte: Heber pan Heber bete; Malchiel pan Malchiel bete ahi uhi.

⁴⁶ Asher’ tanu’ min Serah ahi hi.

⁴⁷ Tam teng pen Asher bete ahi vua, mimal tul sawmnga le tulthum le zali pha uhi.

⁴⁸ Amau’ be zui-in Naphtali’ suonle hlahte: Jahzeel pan Jahzeel bete; Guni pan Guni bete;

⁴⁹ Jezer pan Jezer bete; Shillem pan Shillem bete ahi uhi.

⁵⁰ Tam teng pen amau’ be zui-in Naphtali mite ahi vua, amate a kisimna ciengin tul sawmli le tulnga le zali pha uhi.

⁵¹ Tam teng pen a kisim Israel mi phaza hi a, tul zaguh le tulkhat le zasagi le sawmthum pha uhi.

⁵² Topa in Moses kungah,

⁵³ “Mi phaza tawh kizui-in a luo dingun tam mite tungah leitang kihawm ding hi.

⁵⁴ Minam tamte gouluo a tam na pie ding a, minam tawmte gouluo a tawm na pie ding hi. Minam zosie a mi phaza tawh kizui-in gouluo kipie ding hi.

⁵⁵ Ahi vangin leitang pen aisanna tawh kihawm ding a, amau’ be min zui-in a luo ding uhi.

⁵⁶ Aisanna tawh kizui-in a tamte tungah a tam, a tawmte tungah a tawmin a gouluo uh kihawmpieh ding hi,” a ci hi.

⁵⁷ Amau’ be zui-in a kisim Levi’ suonlehlahte: Gershon pan Gershon bete; Kohath pan Kohath bete; Merari pan Merari bete ahi uhi.

⁵⁸ Tam teng pen Levi’ bete ahi uhi: Libni bete, Hebron bete, Mahli bete, Mushi bete, le Korah bete ahi uhi. Tu-in Kohath pen Amram’ pa ahi hi.

⁵⁹ Amram’ zi min pen Levi sung pan Egypt gama a suoh Levi’ tanu Jochebed ahi hi. Tua nu in Amram tawh Aaron, Moses, le a sanggamnu uh Miriam nei hi.

⁶⁰ Aaron’ tate pen Nadab, Abihu, Eleazar, le Ithamar te ahi uhi.

⁶¹ Hinanle Nadab le Abihu pen Topa mai-ah mei siengtho lo tawh biehna a pieh lai-un a si uhi.

⁶² Pasal poma hla khat pana tungsie, amau’ sung pan a kisimte tul sawmni le tulthum pha uhi. Azieh pen Israel-te lahah amaw tanh kipie lo ahi ziehin Israel-te lahah amahaw kisimton lo hi.

⁶³ Tam teng pen Moses le siempu Eleazar in Moab zanglei, Jordan gun gei Jericho gala a sim mite ahi uhi.

⁶⁴ Tam teng lahah Moses le siempu Aaron in Sinai senel gama a simsa uh Israel-te khat zong kihal nawn lo hi.

⁶⁵ Bangzieh ahei cile Topa in, “Senel gamah amate a si ding uhi,” a na cisa ahi hi. Jephunneh’ tapa Caleb le Nun’ tapa Joshua simlo amate khat beh om nawn lo hi.