Misimna 25 - Zo Bible

Peor-a Baal Biehna

¹ Shittim-ah Israel-te a op laita hun mite in Moab numeite tawh numei-pasal pahtatna a kipan uhi.

² Tam numeite in amau’ pasien biehpiehna-ah mi a ciel vua, mite in an ne-in amau’ pasien-te mai-ah a kun uhi.

³ Tua bangin Peor-ah Baal tawh Israel-te a na kizom vua, tuaci’n Israel-te tungah Topa’ lungthahna a kuong hi.

⁴ Topa in Moses kungah, “Israel-te kung pan a zauhuoi Topa’ lungthahna a kihei nadingin mipi lamkai zosie man inlen, Topa mai-ah suntang laipi-in khailia in,” a ci hi.

⁵ Moses in Israel thukhente kungah, “Peor-a Baal tawh a kizom na mite uh koipo na that ciet ding uhi,” a ci hi.

⁶ Tua zaw lien ciengin kikhopna buh tunkotah amate kapin a op laitahun Moses’ muna le Israel mihon buppi’ muna-ah Israel-te khat pei-in a innkuonpite kungah Midian numei khat a peipi hi.

⁷ Siempu Aaron’ tapa, Eleazar’ tapa Phinehas in a mu ciengin dingin mihonte lah panin a peikhie hi. A khut sungah teipi khat tawi-in,

⁸ Israel mipa puonbuh sungah nuadel a, Israel mipa le a numei, a ni gelin a gilpi pailetin a dawtlia hi. Tuaci’n Israel mite lah panin gimna a veng hi.

⁹ Ahi vangin tua gimna tawh a si mimal tul sawmni le tulli pha hi.

¹⁰ Topa in Moses hopi-in tam bangin a gen hi:

¹¹ “Siempu Aaron’ tapa, Eleazar’ tapa Phinehas in Israel-te tunga ka lungthahna damsahkia zo hi. Keima in pamai ka sah bangin ama in pamai sa ahi ziehin pamai ka sahna tawh Israel-te ka susie sih hi.

¹² Tua ahi ziehin, ‘Ka thuciem ahi nopsahna ama ka pie hi.

¹³ Ama in a Pasien adingin pawnthaw tahin a na pan zieh le Israel-te adingin thoidamna a na bawl ziehin, tua khu ama le ama zaw-a a suonlehlahte adingin tawntung siempu hina thuciemna hi ding hi,’ ci-in,” a ci hi.

¹⁴ Midian numei tawh a kithatton Israel mipa’ min pen Simeon-te’ pupa innkuon lutang Salu’ tapa Zimri ahi hi.

¹⁵ A kithat Midian numei nu’ min pen Midian-te’ innkuon pana pupa innkuon lutang Zur’ tanu Cozbi ahi hi.

¹⁶ Topa in Moses kungah,

¹⁷ “Midian-te genthei bawl inlen amate zo gawp in;

¹⁸ azieh pen amate in a khelpilna utawh note ang gimsah gawp vua, Peor tawh kisai thu le Peor ziehin gimna ni-a a kithat, amau’ sanggamnu, Midian ulien khat’ tanu Cozbi thu-ah note ang sol uhi,” a ci hi.