Misimna 2 - Zo Bible

Giephuol Satdan le Galkuonna

¹ Topa in Moses le Aaron hopi-in tam bangin a gen hi:

² Israel-te in amau’ dielkhai nei cietah amau’ pupa innkuon zui-in giephuol a sat ding uhi; amate in a pang simah kikhopna puonbuh lam mai ngatin phuol sat ding uhi.

³ Nisuona lampangah nisuo lam nga-in a pawlpawla giephuol sat dingte pen Judah pawlte hi ding uhi. Judah mite’ makai pen Amminadab’ tapa Nahshon hi a,

⁴ ama pawl mi phaza pen tul sawmsagi le tulli le zaguh ahi hi.

⁵ Ama zomah phuolsat ding pen Issachar minam hi ding hi. Issachar minam makai pen Zuar’ tapa Nethanel hi ding a,

⁶ ama pawl mi phaza pen tul sawmnga le tulli le zali ahi hi.

⁷ Tua ciengin Zebulun minam hi ding hi: Zebulun minam makai pen Helon’ tapa Eliab hi ding a,

⁸ ama pawl miphaza pen tul sawmnga le tulsagi le zali ahi hi.

⁹ Judah’ giephuolah a pawlpawla omte pen a unpi-in tulza le tul sawmgiet le tulguh le zali pha hi. A kipei ciengin amate masa ding uhi.

¹⁰ Leitaw lampangah a pawlpawla giephuol sat ding pen Reuben pawlte hi ding hi. Reuben minam makai pen Shedeur’ tapa Elizur hi ding a,

¹¹ ama pawl mi phaza pen tul sawmli le tulguh le zanga ahi hi.

¹² Ama zomah phuol sat ding pen Simeon’ minam hi ding hi. Simeon minam makai pen Zurishaddai’ tapa Shelumiel hi ding hi a,

¹³ ama’ pawl mi phaza pen tul sawmnga le tulkuo le zathum ahi hi.

¹⁴ Tua ciengin Gad minam hi ding hi: Gad minam makai pen Reuel’ tapa Eliasaph hi ding a,

¹⁵ ama’ pawl mi phaza pen tul sawmli le tulnga le zaguh le sawmnga ahi hi.

¹⁶ Reuben’ giephuolah a pawlpawla a omte pen a unpi-in tulza le tul sawmnga le tulkhat le zali le sawmnga pha hi. A nina-ah amate pei ding hi.

¹⁷ Kikhopna buh pen giephuol’ laikima om Levi-te’ giephuol tawh peiton ding hi; a phuolsat hun lai ma bangun amau’ mun cietah a dielkhai ciet utawh pei ding uhi.

¹⁸ Nitumna lampangah a pawlpawla giephuol sat ding pen Ephraim pawlte hi ding hi. Ephraim minam makai pen Ammihud’ tapa Elishama hi ding a,

¹⁹ ama’ pawl mi phaza pen tul sawmli le zanga ahi hi.

²⁰ Ama zomah Manasseh minam hi ding hi. Manasseh minam makai pen Pedahzur’ tapa Gamaliel hi ding a,

²¹ ama’ pawl mi phaza pen tul sawmthum le tulni le zani ahi hi.

²² Tua ciengin Benjamin minam hi ding hi: Benjamin minam makai pen Gideoni’ tapa Abidan hi ding a,

²³ ama’ pawl mi phaza pen tul sawmthum le tulnga le zali ahi hi.

²⁴ Ephraim’ giephuolah a pawlpawla a omte pen a unpi-in tulza le tulgiet le zakhat pha hi. A thumna-ah amate pei ding hi.

²⁵ Leilu lampangah a pawlpawla giephuol sat ding pen Dan pawlte hi ding hi. Dan minam makai pen Ammishaddai’ tapa Ahiezer hi ding a,

²⁶ ama’ pawl mi phaza pen tul sawmguh le tulni le zasagi ahi hi.

²⁷ Ama zomah phuol sat ding pen Asher minam hi ding hi. Asher minam makai pen Ochran’ tapa Pagiel hi ding a,

²⁸ ama’ pawl mi phaza pen tul sawmli le tulkhat le zanga ahi hi.

²⁹ Tua ciengin Naphtali minam hi ding hi: Naphtali minam makai pen Enan’ tapa Ahira hi ding a,

³⁰ ama’ pawl mi phaza pen tul sawmnga le tulthum le zali ahi hi.

³¹ Dan’ giephuolah a pawlpawla a omte pen a unpi-in tulza le tul sawmnga le tulsagi le zaguh pha hi. Amate pen a pawlpawlin a nukhia penin pei ding uhi.

³² Tam pen amau’ pupa innkuon zui-a kisim Israel-te ahi vua, giephuolah a pawlpawla a om mimal buppi pen tul zaguh le tulthum le zanga le sawmnga ahi hi.

³³ Topa in Moses a thupiehsa bangin Israel-te lahah Levi-te kisimton lo hi.

³⁴ Topain Moses a thupiehsa bangin Israel-te gamta uhi. Amate in a galkap honpite tawh giephuol a sat vua, mi zosie in a be le a pupa innkuon zui-in tua bang ma-in a pei uhi.