Misimna 13 - Zo Bible

Canaan-ah Thukante Kisawl

¹ Topa in Moses kungah,

² “Israel-te tunga ka pieh Canaan gam vaan dingin mite sawl inlen, amate lahah makai ahi, minam khat sung panin mi khat ciet sawl in,” a ci hi.

³ Tuaci’n Topa’ thupieh tawh kizui-in Moses in Paran gamlah panin Israel-te lahah makai zosie a sawl hi.

⁴ Amau’ min tam teng ahi hi: Reuben minam panin Zaccur’ tapa Shammua;

⁵ Simeon minam panin Hori’ tapa Shaphat;

⁶ Judah minam panin Jephunneh’ tapa Caleb;

⁷ Issachar minam panin Joseph’ tapa Igal;

⁸ Ephraim minam panin Nun’ tapa Hoshea;

⁹ Benjamin minam panin Raphu’ tapa Palti;

¹⁰ Zebulun minam panin Sodi’ tapa Gaddiel;

¹¹ Joseph minam (Manasseh minam) panin Susi’ tapa Gaddi;

¹² Dan minam panin Gemalli’ tapa Ammiel;

¹³ Asher minam panin Michael’ tapa Sethur;

¹⁴ Naphtali minam panin Vophsi’ tapa Nahbi;

¹⁵ Gad minam panin Machi’ tapa Geuel ahi hi.

¹⁶ Tam teng pen gam ensim dinga Moses in a sawl mite’ min ahi hi. Nun’ tapa Hoshea pen Moses in Joshua ci-in a min khelpieh hi.

¹⁷ Moses in Canaan gam vaan dingin amate sawlin a kung vuah, “Negeb gam sung khum munah peito-in, muoltung gamah kato unlen,

¹⁸ a gam bang tawh kibang a, a sunga teng mite thahat maw, ahi sihle zawngkhal, citawm maw, ahi sihle citam,

¹⁹ a tenna gam uh hoi maw, ahi sihle hoi lo, a tenna a khuopite uh giephuol maimai maw, ahi sihle kulpi tawh ki-im maw,

²⁰ a leitang lei hoi maw, ahi sihle hoi lo, tua sungah sing po maw, ahi sihle po lo, hing en ta un. Hangsan unlen tua gama a ga pawlkhat zong hing peipi ta un,” a ci hi. Khum hun pen lengga palte min hun tah ahi hi.

²¹ Tuaci’n amate a peito vua, Zin gamlah panin Lebo-hamath khuo gei Rehob mun dongin gam a vaan uhi.

²² Negeb lamah amate peito-in Hebron a tung uhi; tua munah Anak’ suon le hlahte ahi Ahiman-te, Shesai-te, le Talmai-te a na om uhi. (Hebron khuo pen Egypt gama Zoan khuo sangin kum sagi-in kisat masazaw hi.)

²³ Eshcol Kuom a tung vua, khum munah lengga bawh khat beh a ba tawh sattanin mihing ni in ciengzawl khatin a zawngton uhi. Amate in mang kawlsingte le thei themkhat zong a puo uhi.

²⁴ Israel-te in khum tah panin a bawh khat a sattan ziehun khum mun pen Eshcol Kuom kici hi.

Thukante Thupuohna

²⁵ Ni sawmli a cin zaw ciengin gam vaanna panin amate kilekia uhi.

²⁶ Paran gamlah Kadesh mun Moses le Aaron le Israel mihonte kungah amate a tung uhi; tuale mihon zosie’ tung le amate tungah thu a puoh vua, tua leitanga gate amate a lah uhi.

²⁷ Amate in Moses kungah, “Nei sawlna leitang ka va pha ta uhi; tua gamah bawngnawi le khuoizu luong a, tam khu a gate ahi hi.

²⁸ Hizongle tua gama tengte a thahat vua, a khuopite uh kul tawh a ki-im a, zong gol thei mama hi; tam teng banah khum munah Anak’ suonlehlahte ka mu uhi.

²⁹ Negeb gamah Amalek-te a teng uhi; muoltung gamah Hit-te, Jebus-te, le Amor-te teng uhi; tuipi gei le Jordan gun dungah Canaan-te a teng uhi,” ci-in a gen uhi.

³⁰ Ahi vangin Caleb in Moses mai-ah a mite sipsahin amate kungah, “Thakhatin pei-in a gam uh va la ta vai, azieh pen khum gam i zo thei ding uhi,” a ci hi.

³¹ Tua ciengin ama tawh a peito mite in, “Tua mite do dinga kuonto zo ding i hi malmal sih uhi. Bang zieh ahei cile amate pen eite sanga a hatzaw mawngmawng uh ahi bo hi,” a ci uhi.

³² Tuaci’n amate in a sielamin Israel-te tungah a gam vanna uh thu a puoh vua, “A van dinga ka va peina uh leitang in a sunga tengte a valtum hi. Khum gam sunga mi ka mu vannuoi uh gol thei mama uhi.

³³ Khum munah Nephilim-te (Nephilim panin Anak-te pieng hi) ka mu uhi; amate lahah ko le ko ka ki-et ciengun khuombai cie behin ka kimu vua, amau’ ei muna-ah zong tua bangma ka hi lel uhi,” a ci uhi.