Misimna 11 - Zo Bible

Senel Gama Phunna

¹ A tuosietnate ziehun Topa’ zahin mite a phun ciengin Topa in tua thu za-in lungthah mama hi. Tua ciengin amate langkhatah Topa’ mei kuongin giephuol ninglam kimkhat a katum hi.

² Ahi vangin Moses tungah mite a kiko vua, Topa kungah Moses in thungen a, tua mei a mit hi.

³ Topa’ mei in amate a kahtum ziehin khum mun pen Taberah kici hi.

⁴ Amahaw lahah om mi nautangte in antui a dugaw mama uhi; tuale Israel-te zong a kapkia vua, “I neh ding sa nei beh lei izaw!

⁵ Egypt gamah man pieh lo-a i neh uh ngate, tangmaite, dawnpawlte, kaisuon pumte, kaisuon sante, le kaisuon kangte i phawh uhi;

⁶ ahi vangin tu-in i tha i zung uh lah a bei sieng ta a, i et ding uh tam manna simlo bangma dang om poma lo hi,” a ci uhi.

⁷ Manna pen nanan tang tawh kibang a, a mel bedolak singnai tawh kibang hi.

⁸ Mite pei kawikawi-in a khawm vua, an gawina tawh gawi-in ahi sihle sum sungah a suguoi vua, beel sungh huonin mohin a bawl uhi; a tui dan pen sathau tawh kikangzol sipsep moh tawh kibang hi.

⁹ Zanin giephuol tungah vua a kieh ciengin manna tawh kieton hi.

¹⁰ A puonbuh lutna zosie vuah a innkuonkuonin mite’ kaana Moses in a za hi. Tua ciengin Topa lungthah mama ahi ziehin Moses lungkim lo hi.

¹¹ Tuaci’n Moses in Topa kungah, “Bang dingin na nasempa ei ci bawlsiet na hei? Bang dingin na maipha ei musah loin tam mite zosie’ vangih kei tunga nang ngah ahei?

¹² Tam mite zosie ka gil sunga ka pai amah? A pu a pate tungah pieh dinga ka ciemsa leitangah, ‘Nau cingnu in nawitep lai nausen a puoh bangin amate na kang sungah puo inlen peipi in,’ ci-in nang in kei kunga nei ci thei nadingin amate kei sunga pieng ahi uh amah?

¹³ Tam mite zosie ka pieh ding hei sungah sa nga mawh ding ka hei? Bangzieh ahei cile amate kap kawmin ka kungah, ‘Ka neh ding uh sa ei pie in!’ a ci uhi.

¹⁴ Tam mi zosie kei guohin ka ci nading ka thei sih hi. Azieh pen kei adingin amate puoh gih luo hi.

¹⁵ Tam banga kei ei bawl ding na hi leh thakhatin ei that zaw vet in. Na muna-ah maipha ka nga leh ka gentheina ei musah sin,” a ci hi.

Upa Sawm Sagite

¹⁶ Tuaci’n Topa in Moses kungah, “Nang in mite’ upa le a tung vuah ulien sem hi, ci-a na thei Israel upa mi sawmsagi kei adingin ei kholpieh in; kikhopna buhah amate zawpi inlen tua munah amate nang tawh mun hing lasah in.

¹⁷ Keima hing kumsuhin khum munah nang tawh i kiho ding hi; na sunga om ka hla themkhat ladawhin amau’ sungah ka guong ding hi; nang guohin a unpi-in na puoh lo nadingin amate in mite’ vangih ang puohpi ding uhi.

¹⁸ Mite kungah, ‘Zing cieng adingin no le no kisiensuo un, sa na ne ding uh; bang ding ahei cile Topa’ zahin na kap vua, ‘I neh ding uh sa nei lei izaw! Eite adingin Egypt gam a nuomzaw tahtah hi,’ na ci uhi. Tua ahi ziehin Topa in sa ang pie ding a, na ne ding uhi.

¹⁹ Ni khat sung beh, ahi sihle ni ni sung beh, ahi sihle ni nga sung beh, ahi sihle ni sawm sung beh, ahi sihle ni sawmni sung beh ne khop loin,

²⁰ na nahkua hawm vua a let masangsie le na luohsuo dong ciengun hla khat sung tungtawn sa na ne ding uhi. Bangzieh ahei cile note in na lah vua om Topa nuolin ama’ mai-ah na kap vua, “Bang dinga Egypt i nuasie uh ahei?” na ci uhi,’ ci-in,” a ci hi.

²¹ Ahi vangin Moses in, “Keima tawh a kisimton lei galkap tul zaguh pha hi; nang in, ‘Hla khat tungtawn a neh dingun amate sa pie vang!” na ci hi.

²² Amate dingin tuuhonte le bawnghonte kigo leh a kicingzo ding amah? Amate dingin tuipi sunga ngate kiman leh a kicingzo ding amah?” a ci hi.

²³ Topa in Moses kungah, “Topa’ sil bawltheina a kiciengtan na sa amah? Ka thugente nang adingin a mana ang tun leh ang tun lo tu-in na mu ding hi,” a ci hi.

²⁴ Tuaci’n Moses pei-in mite kungah Topa’ thugen teng a gen a, ama in mite’ upa sawmsagi kaikhawmin puonbuh kimvelah a omsah hi.

²⁵ Tua ciengin meii sungah Topa kumsuhin ama hopi a, ama’ sunga hla themkhat ladawhin upa sawmsagite sungah a guong hi; tuale amate tungah tua hla a tuh ciengin kamsangte bangin thu a gen uhi. Hizongle tua bangin amate a gamtakia nawn sih uhi.

²⁶ Giephuol-ah mi ni a om vua, khat Eldad kici-in, a khat Medad kici a, ama gel sungah tua hla a lut hi. Misimna-ah ama gel a kihal vua, hinanle puonbuh-ah pei loin giephuol-ah thuphuon a gen uhi.

²⁷ Tangval khat tai-in Moses kungah, “Eldad le Medad in giephuol sungah thuphuon gen uhi,” ci-in a gen hi.

²⁸ Tuale ama’ teel mite lahah Moses’ nasem Nun’ tapa Joshua in, “Ka pu Moses, ama gel khawlsah in!” a ci hi.

²⁹ Ahi vangin Moses in ama kungah, “Kei adinga a thangsie na hi amah? Topa’ mite zosie kamsang hi sieng hinlen, Topa in a sung vuah a hla hing guong leh ka cizaw a!” a ci hi,

³⁰ Tuale giephuol-ah Moses le Israel upate a kilekia uhi.

Vamimte

³¹ Tua ciengin Topa kung pan hui langin tua hui in tuipi panin vamimte puoh a, giephuol kung tam lampang ni khat peina cieng, khum lampang ni khat peina cieng ma, giephuol gei-ah kiesah a, lei maitang tungah pi thum bang a sa hi.

³² Tuaci’n sun tungtawn, zan tungtawn le a zing cieng tungtawnin mite in vamimte a khawm uhi; a tawm khop pen in homer sawm a khawm vua, amate dingin giephuol kimvelah tuate a pho uhi.

³³ Ahi vangin vamim’ sa a kikhawn masang, a hakawm vuah sa baang laipi ma-in mite tungah Topa’ lungthahna kikuontaw a, gimna lienpi khat tawh Topa in mite a vatmai hi.

³⁴ Tuaci’n khum mun pen Kibroth-hattaavah kici hi. Azieh pen khum munah amate in sa dugaw mite a vui uhi.

³⁵ Kibroth-hattaavah panin Hazeroth dongin mite a zin uhi.