Micah 6 - Zo Bible

Pasien in Israel a Tawhna

¹ Topa thu gen bang ahei ngai in: Dingin muolsangte mai-ah na thu sung inlen, na aw muoltangte zasah in.

² No muolsangte le a kip leitung bulpite aw, Topa in mi a nielna ngai vawi un; azieh pen a mite tawh Topa thu kiniel a, Israel-te tawh thu kisel ding hi.

³ “Ka mite aw, note bang kang law ahei? kang bangci lungkhamsah ahei? ei dawng vawi un!

⁴ Azieh pen Egypt gam panin kang peipi to a, saltanna inn panin kang tankhie hi; na mai vuah Moses, Aaron, le Miriam-te kang sawl hi.

⁵ Ka mite aw, Moab Kumpipa Balak in bang teng na gel a, Beor’ tapa Balaam in bang na ci dawnkia-in, Topa’ hutdamna nasepte na thei nadingun, Shittim panin Gilgal dongah bang thu na pieng ahei, ci tu-in phawhkia un,” a ci hi.

Pasien in Bang Kalh

⁶ “Topa mai-ah bang tawh va pei-in, a sangpen Pasien mai-ah bang tawh va kun ding ka hei? Meihal biehnate le kumkhat a pha bawngno tawh a mai-ah va pei ding ka mah?

⁷ Tuutang tulkhat, gun tulsawm dim sathau tawh Topa lungkim ding amah? Ka tatkhielna ziehin ka tapa tapen le, ka hla’ mawna ga ziehin ka hinsa ka ta pie ding ka mah?” ka ci hi.

⁸ Mihing aw, ama in bang pen hoi ahei, ci ang genzo ta hi; tuale thu tanga khen ding le migit ding deigaw-in, kiniemkhiehin na Pasien tawh na zawton ding ci simlo nang tungah Topa in bang ang kalh ahei?

Guhtatna le Tatsietna Dan Kipie ding

⁹ Khuopi sungah Topa’ kiko a, (na min zatahna pen pilna tahtah ahi hi): Minam le khuopi sunga ang kikhawmte aw, za vawi un!

¹⁰ Migilote’ inn sunga om gitlona tawh a kinga goute le a kisamsie tawitena themkhatte mangngil thei ding ka mah?

¹¹ A gihna man lo tawikhainate le a tena a man lo ip a zangte ka mawh koi ding amah?

¹² Na mihaute uh tatsietna tawh kidim hi; na khuosung mite in zuouthu vive a gen vua, a kam sung vua a leite uzong zuouthu tawh a kidim hi.

¹³ Tua ziehin na mawnate ziehun hing sat gawpin, a hawmkieu-a kang opsah ding uh ka kipan ta hi.

¹⁴ An na neh mawh vangun na kham sih ding vua, na sung vuah na gil uh a kiel zing ding hi; khol zong nan locin na kemcing sih ding vua, na kepsunte uzong namsau tungah ka pie ding hi.

¹⁵ Na tu mawh vangun na at sih ding uhi; Olive ga na cil mawh vangun, sathau na si sih ding uhi; lengga na cil mawh vangun, na dawnkha sih ding uhi.

¹⁶ Azieh pen Omri’ ngaina kip teng le Ahab innkuon’ gamtat zosie na kemcing vua, a thumop zosie na zui uhi. Tua ahi ziehin a hawmkieu-in hing koi-in, na sunga a teng mite’ ehneh ho-in ka bawl ding hi; tuaci’n ka mite’ kisimmawna na thuoh ding uhi.