Micah 5 - Zo Bible

¹ Tu-in na kimvelah kul tawh ang ki-im hi; i langkhatah sim dingin ei kikuikhum hi; amate in ciengpum tawh Israel gam uhpa’ pheta a sat uhi.

Bethlehem Pan Uhpa

² Bethlehem Ephrathah aw, Judah bete lahah a neu pen na hi vangin, nang sung panin Israel a uh ding mipa khat ang pieng ding a, ama ang kipatna pen tangtawng ni masa lai ahi tabo hi.

³ Tua ahi ziehin tua nu in nausuo natna thuohin, a suo hun a tun masangsie, amate don loin koi phot ding hi; tua ciengin Israel mite kungah a unau omsun teng ang kilekia ding uhi.

⁴ Topa’ hatna le Topa a Pasien’ min thupi sungah ama ding ding a, a tuuhonte a vah ding hi. Tuale amate bihtahin a teng ding uhi, azieh pen leimong dongah ama mi thupi hi ding hi;

⁵ Tuale ama pen kilemna khat ahi ding hi. I gam sungah Assyria-te ang pei-in, i leitang ang tot uleh, amate do dingin tuucing sagi dingsahin, makai giet i koi ding uhi.

⁶ A namsau utawh Assyria gam a uh ding vua, namsau dawsa-in Nimrod’ gam a uh ding uhi; i gamah amate ang lutin i gamgi sung ang tot uleh, Assyria-te kung panin amate in eite ei hunkhie ding hi.

Mailam a Omlaite Dinmun

⁷ Tua ciengin mi tampite in a imtawm, Jacob suon a omlai teng pen mihingte tunga kingam lo, mi koima tunga lametna a nei lo, Topa kung pana ang pei daitui le lopa tunga a kie guomal tawh a kibang ding uhi.

⁸ Mi tampi in a imtawm, minamte lahah a om Jacob suon a omlai teng pen gamlah gamsa lahah a om humpi tawh a kibang ding vua, tuuhonte lahah a om humpi khanglaite tawh a kibang ding uhi. Tuute a tuokhah ciengin tuoncilin ehmal a, a hun ding koima om lo hi.

⁹ Na kidopite tungah na khut na lamto ding a, na galte a unpi-un kisumaimang ding hi.

¹⁰ Topa in a cina ah, khum ni ciengin na kung panin na sakolte sumaimangin, na sakol leengte ka susie ding hi;

¹¹ na gam sunga khuopite sumaimangin, na mun muonhuoi zosie uh ka phelmang ding hi;

¹² na khut panin mibum theite sumaimangin, aisan theite na nei nawn sih ding hi;

¹³ note lah panin na milimte sumaimangin, na biehna songte uzong ka sumaimang ding a, khut tawh na bawlsa uh nate mai-ah na kun nawn sih ding uhi;

¹⁴ note lahah a om na khuom siengthote uh phungkalin, na khuopite uh ka susie ding hi.

¹⁵ Ka thu a mang lo minamte tungah lungthahna le thangpaina tawh phu ka la ding hi.