Matthew 3 - Zo Bible

Baptize-pa John’ Tangkona

¹ Khum hun lai-in Judea gamlah ah Baptize-pa John kilahin

² “Kisiakia un, azieh pen vantung gam ang tung kuon ta hi,” ci-in a tangko hi.

³ Kamsang Isaiah in, “Gamlahah a kiko pa’ aw in: ‘Topa pei nading lampi siel unlen, a lampi na tangsah un,’ ci hi,” ci-in a na gen lai-in tampa thu gen ahi hi.

⁴ Tu-in John in kala-oh mul kigan puon silin savun tawh a kawng gah a, a an pen khuombai le gamkhuoizu ahi hi.

⁵ Tua ciengin ama kungah Jerusalem, Judea gam sung zosie le Jordan kuol sunga om mi zosie pei-in,

⁶ a mawnate uh pulahin ama in Jordan gunah amate a baptize hi.

⁷ Ahi vangin ama in Pharisee-te le Sadducees-te a tampi khat a ki-baptize dinga ang pei a mu ciengin amate kungah, “No muoltan suonte! Ang tung ding thangpaina pan na tai nadingun koi in ang hil ahei?

⁸ Kisiakiana tawh a kilawm ga na ga un.

⁹ ‘Abraham pen ka pupi uh hi lel,’ ci-in mawh ngaisut sih un; azieh pen ken kang cina ah, Pasien in tami suongte panin Abraham’ suonlehlahte piengsah thei lel hi.

¹⁰ Tu nangawnin zong singzung cin tengah hei kikoi zo hi; a, ga hoi a ga lo singkung vannuoi kiphua-in mei sungah kipai hi.

¹¹ Kisiakia nadingin tui sungah note kang baptize a, hizongle ka nua-a ang pei ding pa pen kei sanga a vanglienzaw ahi hi; ama’ kedap tawi dingin zong ka kilawm sih hi. Ama in Hlagau Siengtho le mei tawh note ang baptize ding hi.

¹² Ama in a khut sungah lawpi tawi-in a buphuol zap sieng ding a, a tah teng bem sungah khol ding hi; a si teng pen a mit ngai lo meikuong sungah haltum ding hi,” a ci hi.

Jesu ki Baptize-na

¹³ Tua ciengin John a ki-baptize sah dingin Galilee panin Jordan gunah Jesu a pei hi.

¹⁴ John in, “Nang in kei nei baptize ding hizaw bo a, bang dinga kei kunga hing pei zawsop na hei?” ci-in a na kham sawm hi.

¹⁵ Ahi vangin Jesu in, “Tu-in ei mang phot in; azieh pen thudih zosie i tangtunsah ding a kilawm ahi hi,” ci-in a dawng hi. Tua bepin ama a thukim hi.

¹⁶ Jesu a ki-baptize zaw tui sung panin a pusuoto lien tahin thakhatin van kihong a, vakhu bangin Pasien’ Hlagau kumsuhin ama tungah tu hi.

¹⁷ Tuale vantung panin awging khat in, “Tam pa pen kei ei lungkimsah ka it mama ka tapa ahi hi,” a ci hi.