Matthew 2 - Zo Bible

Nisuona Lam Mipilte’ Hawna

¹ Kumpi Herod hun sungin Judea gam Bethlehem khuo ah Jesu a suo zaw ciengin nisuona lam panin Jerusalem ah mipilte a tung vua,

² Jew mite kumpi ding ahi ang suoh nausen hei-a om ahei” ci-in dong uhi. Azieh pen ama’ aasi ang suoh ka mu zo ta vua, ama zatahna pie dinga ang pei ka hi uhi,” a ci uhi.

³ Herod in tam thu a zah ciengin ama le Jerusalem-a mi zosie a zau mama uhi;

⁴ tuale siempu liente le thukham hil sie zosie kaikhawm a, ama in Messiah suo nading mun amate dong hi.

⁵ Amate in, “Judea gam Bethlehem ah a suoh ding hi; azieh pen kamsang pa in hici bangin na giel hi:

⁶ ‘Judea gama om nang Bethlehem khuo aw, Judah gam-uhte lahah a neu pen na hi vawt sih hi; bangzieh ahei cile ka mi Israel-te a cing dingin nang sung panin uhpa khat pieng ding hi,’ ci hi,” a ci uhi.

⁷ Tua ciengin Herod in mipilte hlandapin amate tung panin aasi a kilah hun cientahin dong hi.

⁸ Tua ciengin Bethlehem ah amate sawl a, “Pei unlen tua nausen limtahin hing sui un; ama na mu ciengun kei zong pei-in ama zatahna ka pieh thei nadingin thu ei zasahkia un,” a ci hi.

⁹ Amate in kumpipa thu vaihlah a zah zaw ciengun vai a ding uhi; tuale amate in a mu ngaisa uh ang suoh aasi, nausen opna tung sontahah a khawl masang, khumtah amau’ mai-ah na peipei hi.

¹⁰ Tua aasi a khawl a mu ciengun a lungdam mama uhi.

¹¹ Inn sungah amate lut a, a nu Mary le nausen a mu uhi; tuale amate in khupdinin ama zatahna a pie uhi. Tua ciengin a gou bawmte uh a suo vua, kham, panamtui, le myrrh panamtuite letsongin a pie uhi.

¹² Herod kunga a kilekia lo nadingun a mang sung vuah a kihilkhol ziehin lam tuom zui-in a gam vuah a kilekia ta uhi.

Egypt Gama Taina

¹³ Amate a pei zaw ciengun Joseph’ mang sungah Topa’ vantungmi khat kihil a, “Tho inlen nausen le a nu, Egypt gamah taipi inlen, kang genkia masangsie tuanah va om ta’n; azieh pen Herod in tua nausen tha dingin a sui hi,” a ci hi.

¹⁴ Tua ciengin Joseph tho pai a, khum zan ma-in nausen le a nu zawpi-in Egypt gamah a tai vua,

¹⁵ Herod a si masangsie khum sungah a om uhi. Tam thu pen kamsangte tungtawnin Topa in a na gensa, “Egypt panin ka tapa ka hlan ta hi,” a ci thu a tangtun nading ahi hi.

Nausente Kihonthana

¹⁶ Mipilte in a sol lamtah Herod in a thei ciengin lungthah mama a, tuale ama in zong mi sawlin aasi lam mipilte tung pana a theisa hun tawh kituohin Bethlehem khuo le a kimvela om kum ni le a neisie nausen zosie a thatsah hi.

¹⁷ Tua ciengin kamsangpa Jeremiah’ genkholna:

¹⁸ “Rama khuo ah nahpi tah kaana le mauna kiza a, Rachel in a tate kaa a, a tate a op tah lo ziehin koima in ama hlai zo lo hi,” a ci thu a tangtunna ahi hi.

Egypt Pan Kilekiana

¹⁹ Herod a si zaw ciengin Egypt gama om Joseph kungah Topa’ vantungmi khat a mang sungah kihil a,

²⁰ “Nausen tha dinga a suite si zo ahi ziehin tho-in nausen le a nu zawpi inlen Israel gamah pei in,” a ci hi.

²¹ Tua ciengin Joseph tho-in nausen le a nu zawpi a, Israel gamah a pei uhi.

²² Ahi vangin Archelaus in a pa Herod tangin Judea gam a uh lam a zah bepin tua munah a pei ngam ta sih hi. Tuale a mang sunga a kihil zaw ciengin ama Galilee gamah a pei hi.

²³ Nazareth a kici khuo khatah tengin, “Ama Nazareth khuomi kici ding hi,” ci-a kamsangte’ genna a tangtun thei nading ahi hi.