Matthew 15 - Zo Bible

Tanglai Pu le Pate’ Ngaina

¹ Tua ciengin Pharisee-te le thukham hil siete, Jesu kungah a va pei ta vua,

² “Na nuazuite in bang dinga tanglai upate’ ngaina a palsat uh ahei? Azieh pen an a neh ciengun a khut a sil masa sih uhi,” a ci uhi.

³ Ama in a kung vuah, “Note in zong na tang ngaina uh na zui nop na lam vua bang dinga Pasien’ thupieh na palsat uh ahei?

⁴ Azieh pen Pasien in, ‘Na nu le na pa zatah in,’ ci-a, tuale, ‘A nu ahi a, a pa ahi zongin a gensie poma a si valon ding hi,’ a ci hi.

⁵ Ahi vangin note in mi khatpo in a nu le a pa kungah, ‘Kei tung pana na nga ding uh huna poma Pasien tunga kipie ahi hi, a ci nah leh, tua pa in a pa a patawi ding kul nawn lo hi,’ na ci uhi.

⁶ Tuaci’n tang ngaina na zui ziehun note in Pasien’ thu na phietmang uhi.

⁷ No mihoi kipangte! Isaiah in note tawh kisai-in thu a na genkholna khu:

⁸ “Tam mite in a kampi utawh kei ei zatah bawl vua, ahi vangin a lungtang uh kei tawh a kigamla hi.

⁹ Amate in mihingte’ bawltawm ngainate, zui ding ngaina bangin a hil vua, a mawhna-in kei ei bie uhi,’ a ci pen a man ahi hi,” a ci hi.

Mi Buasahthei Nate

¹⁰ Tua ciengin ama in mihonpite ama kungah hlan a, “Ngai unlen theisiem un:

¹¹ Kam sunga a tumsuh nate in mi buasah lo a, kam sung pana a pusuoh nate in mi buasah zaw hi,” a ci hi.

¹² Tua ciengin nuazuite in ama nehin a kungah, “Pharisee-te in na thugen a zah ciengun a lungkim lo lam uh na thei ei mah?” a ci uhi.

¹³ Ama in, “ Vantunga om ka Pa in a suon lo singkung kici poma kibotmang ding hi.

¹⁴ Amate donin zong nei da un; mittaw le mittaw lam kihilte ahi uhi. Mittaw khat in mittaw dang khat lam hil leh, a ni gelin guom sungah kie ding uhi,” a ci hi.

¹⁵ Ahi vangin Peter in ama kungah, “Tami thugentena ko ei hilcien in,” a ci hi.

¹⁶ Tua ciengin ama in, “Note in zong theitel nai lo na hi uh amah?

¹⁷ Kam sunga a tumsuh poma gilpi sungah tumsuh a, khum panin a pusuo lam na thei sih uh amah?

¹⁸ Kam sung pana a pusuohte lungtang pana ang pieng hi a, tuami in mi buasah hi.

¹⁹ Azieh pen lungtang panin ngaisutna hoi lote, tuol thana, numei-pasal pahtatna, angkawmna, guhtatna, zuou teci panna le mi gensietna- te ahi hi.

²⁰ Tamte mi buasah thei nate hi a, ahi vangin khut sil lo-a an nehna in mi buasah lo hi,” a ci hi.

Canaan Numei’ Upna

²¹ Jesu in khum mun nuasie-in Tyre le Sidon gam sung tengah a pei hi.

²² Tua zaw behin khum gam panin numei khat a va pei ta a, “David’ tapa, Topa aw, ei hepi in; dawi gilo khat in ka tanu bawlsie hi,” ci-in a kiko hi.

²³ Ahi vangin Jesu in tua nu a dawng vawt sih hi. Tuale a nuazuite pei-in, “Tua nu in i nua ei zui-in a kikoko ziehin ama peisah dawh ta’n,” ci-in a hanthawn uhi.

²⁴ Ama in, “Israel innkuon a mangthai tuute kung beha ei kisawl ahi bo hi,” ci-in a dawng hi.

²⁵ Ahi vangin tua nu pei-in a mai-ah khupdin a, Topa aw, ei hu bo ven,” a ci hi.

²⁶ Ama in, “Tate’ neh ding an lahpiehin uite pieh ding kilawm lo hi,” ci-in a dawng hi.

²⁷ Tua nu in, “Hi ma hi, Topa aw, ahi vangin uite nangawn in a pute’ sabuoi pana a kie annengte a ne uhi,” a ci hi.

²⁸ Tua bepin tua nu kungah, “Numei aw, na upna lien mama ei! Na deina bangin nang adingin pieng taheh,” ci-in a dawng hi. Tuale thakhatthu-in a tanu a dam pai hi.

Jesu in Mi Tampi Damsah

²⁹ Jesu in khum mun a nuasie zaw ciengin Galilee Tuipi dung kantanin pei a, tuale muol tungah kato-in a to hi.

³⁰ Ama kungah mihon tampi tah pei-in khelbaite, a poite, mittawte, a ham thei lote, le adang tampi tah a peipi uhi. Amate in ama’ keng phungah tuate a koi vua, ama in tuate a damsah hi.

³¹ Tuaci’n a ham thei lote hamin, a poite dam sieng a, khelbaite lam pei-in, mittawte in khuo a mukia theina thu mihonpite in a mu uh ciengin lamdang a sa uhi. Tuale amate in Israel Pasien a phat uhi.

Tul Li Vahna

³² Tua ciengin Jesu in ama kungah a nuazuite hlan a, “Mihonpite ka khuotuo hi, azieh pen ka kunga a om zaw uh tu-in ni thum pha ta a, a neh ding uh bangma a nei sih uhi; tuale lamkalah basam kha thei ding uh ahi ziehin gilkielsa-in amate ka peisah nuom sih hi,” a ci hi.

³³ Nuazuite in ama kungah, “Tam bang gamlahah mihon tam zapi vah nading a kicing an hei pana i nga ding ahei?” a ci uhi.

³⁴ Jesu in amate kungah, “Anlum bangza na nei vuoi?” ci-in dong hi. Amate in, “Lum sagi le nga neu halkhat om hi,” a ci uhi.

³⁵ Tua ciengin ama in lei lahah mihonpite a to nadingun thu a pie hi.

³⁶ Tuale ama in anlum sagi le nga la-in lungdam a ko zaw ciengin phalsuo-in nuazuite kungah pie a, tuale nuazuite in zong mihonpite tungah a piesawn uhi.

³⁷ Amate in a unpi-un ne-in a gil uh a va mama hi; tuale a khawnla teng uh a neng a themin a khawm uleh seu sagi a dim hi.

³⁸ Tua an nete numei le naupang simlo mi tul li pha hi.

³⁹ Ama in mihonpite a pei dinga a sawl zaw ciengin gunkuong tungah kato-in Magadan gamah a pei hi.