Mark 5 - Zo Bible

Jesu in Gerasene Khuomi Dawiveipa Damsah

¹ Amate, tuipi galkhat Gerasenes gam sungah a tung uhi.

² Gun-kuong tung panin a kumsuh zaw behin hlabua veipa khat in ama na dawntuo hi.

³ Ama pen hankhuh lah po-a teng ahi a, koima in siakhau nangawn tawh hen zo lo hi;

⁴ azieh pen kengkol le siakhau tawh tamveipi kihen ngai zo a, ahi vangin ama in a kihenna siakhau bottanin a kengkol suguoi gawp a, koima in ama zo zo lo hi.

⁵ Sun le zanin hankhuhte lah le muoltung tengah vahin awng vapuoh den a, suongte po tawh ama le ama a kikuikeh hi.

⁶ Ama in a gamla panin Jesu a gal mu ciengin del phei-in a mai-ah a kun hi;

⁷ tuale ama in a aw nei za tawh, “Sangpen Pasien’ Tapa Jesu aw, kei bang ei law sawm na hei? Pasien’ min tawh kang thum hi, kei ei bawlsie sin,” ci-in awng hi.

⁸ Tam banga a cina pen ama in tuapa kungah, “Nang hlabua aw, ama kung panin hing pusuoh in!” a na ci zieh ahi hi.

⁹ Tua ciengin Jesu in ama kungah, “ Na min bang ahei? ci-in dong hi. Ama in, “Ka min Legion ahi hi; azieh pen a tampi ka hi uhi,” ci-in a dawng hi.

¹⁰ Tua gam panin amate a nawdawh lo nadingin ama kungah a thum vangut uhi.

¹¹ Tua laitahin muolpangah vohhon tampi gamta-in a om uhi.

¹² Tuale hlabua pa in ama kungah, “Vohte kungah ei sawl inlen a sungah ei lutsah in,” ci-in a thum uhi.

¹³ Tuaci’n ama in amate a peisah hi. Tuale hlabuate pusuohin vohhon sungah a lut uhi; tul ni bang a pha tua voh honte, luibang kenah taisuh vapualin tuipi sungah a tummang sieng uhi.

¹⁴ Vohcingte tai-in khuo sung le gam sung tengah tam thu a gen uhi. Tua ciengin tua thupiengte bang thu ahei ci-in a en dingin mite a kuon uhi.

¹⁵ Jesu kung a tung uleh a lungsim pilin puon sila a na to hiuhiau dawi legion khat a vei mipa a mu ciengun a zau uhi.

¹⁶ Dawiveipa le vohhonte tunga thupieng teng a musa mite in midangte kungah a gensawn uhi.

¹⁷ Tua ciengin a gam panun a pei dawh nadingin amate in Jesu kungah thum a kipan uhi.

¹⁸ Gunkuong tungah ama a kato laitahin dawivei ngai mipa in ama tawh a opton nading a ngen hi.

¹⁹ Ahi vangin ama in nielin tua pa kungah, “Inn ah pei inlen Topa in nang tungah bangzatahin hing sem a, bang khuotuona teng hing lah ahei, ci thu na guolte kungah va gen ta’n,” a ci hi.

²⁰ Tuale ama pei-in Decapolis gam sungah Jesu in ama dinga a sepnate gen a kipan a, mi zosie in lamdang a sa uhi.

Ngahnu Khat Hingkia, Numei khat Kidamsah

²¹ Gunkuong tungah tuongin Jesu galkhat lam a kaikia zaw, tuipi gei-ah a op laitahin a kimvelah mihon tampite a kikhawm uhi.

²² Tua ciengin a min Jairus a kici kikhopna inn uhte khat va pei a, tua pa in ama a mu ciengin a keng phungah bawhin,

²³ ama kungah, “Ka tanu neuno a si ding ahi ta hi. Ama ang damkia-in a hin thei nadingin hing pei inlen a tungah na khut hing nga ta’n,” ci-in tamveipi tah a thum vangut hi.

²⁴ Tuaci’n tua pa tawh ama a zawhton hi. Tuale mihon tampi in ama a zui vua, ama a nehcip gawp uhi.

²⁵ Tua laitahin kum sawm le kum ni sung siluong natna a vei numei khat a om hi.

²⁶ Sievuon tampi in a na lawmawsa ahi ziehin gimna nahpi-in na thuoh a, a sum neisun a thawigawt vangin nuomtuom loin a gim semsem hi.

²⁷ Tua nu in Jesu’ thu na za a, mipite kawmkal ama nualamah peidap vakhianin a puontep a va tham ta hi.

²⁸ Bangzieh ahei cile tua nu in, “A puontep thamkha beh leng zong dam pai ta vang,” a ci hi.

²⁹ Tuale thakhatin a siluong khawl pai a, a natna a dam ahi lam a kithei hi.

³⁰ Jesu in ama sung panin a vanglietna a peikhiet lam thakhatin phawh ahi ziehin mihonpite lamah kihei-in, “Ka puontep ei thampieh khu koi ahiei?” a ci hi.

³¹ A nuazuite in ama kungah, “Mihonpi in ang nehcip gawp lam na thei nahpi bang dinga, ‘Koi ahiei ka puontep ei thamkha,’ na ci thei mawng ahei?” a ci uhi.

³² Ama in tua banga ei thamkha koi poma ahei, ci-in a en kawikawi hi.

³³ Ahi vangin numei nu in ama tunga a pieng thute thei ahi ziehin zau le ling kawmin ama mai-ah khupbawhin thupieng zosie mantahin a gen hi.

³⁴ Ama in tua nu kungah, “Ka tanu aw, na upna in nang ang damsah zo hi; na natna pan dam inlen lungnuomtahin na pei ta’n,” a ci hi.

³⁵ Ama in a hopi laitahin makai pa’ inn panin mi pawlkhat pei-in, “Na tanu si zo ta. Bang dinga siepa na buoisah nah lai ahei?” a ci uhi.

³⁶ Amau’ kiho Jesu in a galzah ciengin kikhopna inn uhpa kungah, “Zau sin, um zieu lel in,” a ci hi.

³⁷ Ama in Peter, James, le James’ sanggampa John simlo koima kinuazui sah lo hi.

³⁸ Kikhopna inn uhpa’ inn ah a lut ciengun, ama in mite kapin mau-in a ul valuoi a mu hi.

³⁹ Ama a lut ciengin amate kungah, “Bang dingin gamlumin kap na hi uh ahei? Naupang pa a si ahi sih hi, a kimu ahi bo hi,” a ci hi.

⁴⁰ Tuale amate a nuiza mama uhi. Tua ciengin a unpi-in amate pusuohsah a, naupang’ nu le pa le a optonpi mite tawh naupang opna munah a pei uhi.

⁴¹ Ama in tua nu a khutah tu-in ama kungah, “Talitha cum,” a ci hi. A khietna pen, “Numeino aw, tho in!” a cinopna ahi hi.

⁴² Tua numeino zong thakhatin tho a, lam pei a kipan pai hi. (ama pen kum sawm le kum ni cing ahi ta hi). Amate in tami thu lamdang a sa mama uhi.

⁴³ Tami thu koima a theisah lo nadingun ama in khautahin thupie a, tua nu a neh ding bang khat pie un, ci-in amate kungah a gen hi.