Mark 3 - Zo Bible

Khut Langkhat Si Mipa

¹ Kikhopna inn sungah ama lutkia a, khum sungah a khut langkhat si mi khat na om hi.

² Amate in ama a mawmat thei nadingun sabbath ni-in tua pa ang damsah poma ei mah, ci-in a buhdap uhi.

³ Tuale ama in a khut langkhat sipa kungah, “A mailamah hing pei in,” a ci hi.

⁴ Tua ciengin ama in amate kungah, “Sabbath ni-in a pha bawl ding le a sie bawl ding, mihing hinna hutdam ding le mi tha ding koi pen thukham tawh a kituoh ei?” a ci hi. Ahi vangin amate a sip dide uhi.

⁵ Ama in lungthah mai tawh amate a en kawikawi hi; a lungtang uh a khauh ziehin ama da mama a, tua mipa kungah, “Na khut zah vawi,” a ci hi. Ama in a khut a zah leh a khut a dam pai hi.

⁶ Pharisee-te pei-in ama a tha thei nadingun Herod pawlte tawh thakhatin a kikum pai uhi.

Tuipi Gei-a Mihonpite

⁷ A nuazuite tawh tuipi lamah Jesu a kihem dawh a, Galilee gam panin mihon tampite in ama a zui uhi;

⁸ ama’ nasepna zosie a zah ciengun Judea, Jerusalem, Idumea, Jordan galkhat, le Tyre le Sidon kima gamte panin mihon tampitah in ama kungah a pei uhi.

⁹ Mipite a tam seng ziehin a nawh gawp khah lo nadingin gunkuong khat a baisa-a a koi nadingun ama in a nuazuite kungah a gen hi.

¹⁰ Ama in cina tampi damsah zo ahi ziehin natna nei zosie in ama a thamkhah thei nadingun ama lam a neh vapual uhi.

¹¹ Hlagau buate in ama a mu popo ciengun a mai-ah khupbawhin, “Nang Pasien Tapa na hi hi!” ci-in a kiko uhi.

¹² Ahi vangin ama koi ahei, ci mi a theisah lo nadingun khautahin amate thu a vaihlah hi.

Jesu in Nuazui Sawm le Nite Teel

¹³ Muoltungah ama kato a, ama in a dei teng a kungah hlanin, tuale amate in zong ama a zuon uhi.

¹⁴ Tuale ama in a sawltahpite ci-in a minvaw, mi sawm le nite teel a, amate pen a kithuopi ding,

¹⁵ le dawite hawlkhiet nading thuneina nei ding ahi uhi.

¹⁶ Tuaci’n ama in a teel mi sawm le nite: Simon (Peter ci-in a minvaw pa);

¹⁷ Zebedee’ tapa James le a naupa John (Vanging Tapate a cinopna Boanerges ci-in a minvawte);

¹⁸ Andrew, Philip, Bartholomew, Matthew, Thomas, Alphaeus’ tapa James, Thaddaeus, Canaan mi Simon,

¹⁹ le ama a lehehpa Judas Iscariot-te ahi uhi. Tua ciengin ama inn ah a pei hi;

Jesu le Beelzebul

²⁰ tuale mihonpite a kikhawmkia vua, tuaci’n amate in an nangawn a ne thei ta sih uhi.

²¹ Mite in, “Ama a maw ahi ta hi,” ci thu a innkuonpite in a zah ciengun ama a kham dingin a pei uhi.

²² Jerusalem pana a peisuh thukham hil siete in, “Ama pen Beelzebul in a mat ahi a, dawite’ mangpa suonga dawite a deldawh hi bo,” a ci uhi.

²³ Tuale ama kungah amate hlan a, ama in thugentena zangin thuhil a, “Bangci bangin Satan in Satan deldawh thei ding ahei?

²⁴ Gam khat ama le ama kikhenthangin kido leh tua gam a kip zo sih ding hi.

²⁵ Innkuon khat ama le ama kikhenthangin kido leh tua innkuon zong a kip zo sih ding hi.

²⁶ Satan ama le ama kido-in kikhenthang leh kip zo lo ding a, a manthai hun a tung zo ahi ta hi.

²⁷ Hinanle mi thahatpa lep-ia masa lopi-in koima in mi thahtapa’ inn sungah lutin a neisa teng a lahpieh thei sih ding hi; tua cieng behin a inn sung a bulu thei pan ding hi.

²⁸ “A tahtah a kang ci-in, mite’ mawna le Pasien a gensietna popo uh kimaisah ding hi;

²⁹ ahi vangin Hlagau Siengtho a gensie poma a mawna uh kimaisah zo lo ding a, kumtawnin maw nei ahi ding hi,” a ci hi.

³⁰ Azieh pen amate in, “Ama hlabua nei ahi hi,” a ci uhi.

Jesu’ Unau Tahtahte

³¹ Tua ciengin a nu le a naute a tung uhi; amate inn pulamah dingin ama hlan ding mi a sawl uhi.

³² Ama kimvelah mihonpi a to uhi; tuale amate in ama kungah, “Nang ang hlan dingin na nu, na sanggam pasalte le na sanggam numeite a pulamah ding uhi,” a ci uhi.

³³ Ama in, “Ka nu le ka sanggamte i ci koite ahiei?” ci-in a dawng hi.

³⁴ Tuale ama kimvela a tote enin ama in, “Ka nu le ka sanggamte tanah a om uhi!

³⁵ Ka pa’ deina banga a gamta mi poma ka sanggam pasal, ka sanggam numei le ka nu ahi uhi,” a ci hi.