Mark 15 - Zo Bible

Pilat Mai-ah Jesu

¹ Zingmawng tungin siempu liente in upate, thukham hil siete le vaihawm teng zosie tawh kikupna khat a nei uhi. Amate in Jesu henin a peipi vua, Pilat kungah a ap uhi.

² Pilat in ama kungah, “Judah mite’ Kumpipa na hi amah” ci-in a dong hi. Ama in, “Na ci bang ahi hi,” ci-in a dawng hi.

³ Tua ciengin siempu liente in thu tampitah tawh ama a mawsah uhi.

⁴ Pilat in ama dongkia a, “Na dawn nading a om sih amah? Thu tampitah tawh ang mawmatna uh en in,” a ci hi.

⁵ Ahi vangin Jesu in a dawnbe tuon lo ciengin Pilat in lamdang a sa mama hi.

Pilat in Khailia dingin Jesu Ap

⁶ Khum hunlai pawi hun ciengin amate in a nget uh thongkie khatpopo Pilat in a hla thei zel ngaina ahi hi.

⁷ Khum laitahin kumpi langpan hun sunga mi that, kumpi a ledo mite tawh thong a kieton Barabbas a kici mi khat a om hi.

⁸ Tuaci’n mihonpite pei-in Pilat kungah a bawl ngai ma banga a bawl nadingin a ngen uhi.

⁹ Tua ciengin ama in amate kungah, “Judah Kumpipa hing hla leng na nuom vuoi?” ci-in a dong hi.

¹⁰ Azieh pen amate in hazatna tawh ama tungah a ap uh ahi lamtah a thei hi.

¹¹ Ahi vangin Barabbas a hlapieh zawh nadinga a gen dingin siempu liente in mihonpite a hantawh uhi.

¹² Pilat in amate kungah, “Tua ahile Judah Kumpipa na ci pa uh bang law leng na nuom vuoi?” ci-in a genkia hi.

¹³ Amate in, “Singlamte tungah khailia ta’n,” ci-in a awhsan uhi.

¹⁴ Pilat in amate kungah, “Bang dingin lah, ama in bang sietna bawl ahei?” ci-in a dong hi.

¹⁵ Tuaci’n mihonpi a lungkimsah nop ziehin Pilat in Barabbas hla a, ama in Jesu a sat zaw ciengin singlamte tunga khailia dingin a pie ta hi.

Galkapte in Jesu Simmawbawl

¹⁶ Tua ciengin galkapte in kumpi inntuol ah (gam-uh pa’ phuolpi a kicina) ama a peipi uhi; tuale amate in galkap honpite a kikhawmsah uhi.

¹⁷ Tuale amate in puontuol dupsan khat a silsah uhi; tua zaw ciengin ling tawh kumpi lukhu khat a phan vua, a lu tungah a khusah uhi.

¹⁸ Tuale amate in, “Judah Kumpipa aw, na khan sawt taheh!” ci-in salam a piesol uhi.

¹⁹ Amate in a lu pumpeng tawh satin a cilphit vua, khupdinin zatahna a pie uhi.

²⁰ Ama a zako zaw ciengun a puontuol a hawkhietpieh vua, ama’ puonte ma a silsahkia uhi. Tua ciengin singlamte tunga khailia dingin ama a zawpi uhi.

Singlamte Tunga Jesu a Kikhaina

²¹ Amate in a singlamte puo dingin khuota pana ang zin a kituopi khah uh mi khat a pausawl uhi; ama pen Alexander le Rufus’ pa, Cyrene khuomi Simon ahi hi.

²² Tua ciengin amate in Golgotha a kici munah (lugu mun a cinopna) Jesu a peipi uhi.

²³ Tuale amate in myrrh panamtui kha tawh kihal lenggazu a pie uhi; ahi vangin ama in a ne nuom sih hi.

²⁴ Amate in singlamte tungah ama khailia-in a puonsilte a hawm vua, a tan ciet ding uh a thei nadingun ai a san uhi.

²⁵ Singlamte tungah ama a khai laitahun zinglam nai kuo a sat hi.

²⁶ A mawmatna uh lai-ah, “Judah Kumpipa,” ci-in kigiel hi.

²⁷ Ama tawh misuom guta ni, khat a zietlam, khat a veilamah kikhaiton hi.

²⁸ Lai Siengtho sungah, “Thukham palsatte tawh a kisimtha hi,’ a ci thu a tung hi.

²⁹ Ama a nawhkha mite in lupei-in a zako gawp vua, “Huoi lah! Biehinnpi susie-in ni thum sunga a lamkia ding pa,

³⁰ singlamte tung panin hing kumsuh inlen nang le nang kihunkhie ven!” a ci uhi.

³¹ Tua ma bangin amate lahah siempu liente in zong thukham hil siete tawh ama a zako vua, “Mi dangte hunkhie thei napi ama le ama a kihun zo sih hi.

³² Kote in mu a, ka up thei nadingun Israel Kumpipa Messiah aw, tu mama-in singlamte tung panin hing kumsah in,” a ci uhi. Singlamte tunga a kikhaipi tegel in zong ama a engho uhi.

Jesu’ Sina

³³ Sunkim a kipan nitah nai thum dongin gam sung mun zosie-ah mutzin a tung hi.

³⁴ Nai thum hunin Jesu in, “Eloi, Eloi, lema sabachthani,” ci-in nahpi tahin a kiko hi, tua pen ka Pasien, ka Pasien, bang zieha nei nuasie ahei?” a cinopna ahi hi.

³⁵ A gei-a a ding mi pawlkhat in a zah ciengun amate in, “Ngai vawi un, Elijah hlan hi ve aw,” a ci uhi.

³⁶ Tuale mi khat tai-in lenggazu thua sungah tui hupna die-in cieng dawnah koi-in a dawn dingin pie a, “Ngah phot un, ama hunkhie dingin Elijah ang pei ei mah en vai,” a ci uhi.

³⁷ Tua ciengin Jesu nahpi tahin kiko-in a naahu tawpin a si hi.

³⁸ Tuale biehinnpi kidatna puonkhai a tung pana nei dongin phalni kisuo hi.

³⁹ Ama mai-a a ding galkapmangpa in ama a naahu tawpin a si dante a mu ciengin, “Tampa, Pasien’ Tapa tahtah hi mawh ei!” a ci hi.

⁴⁰ A gal-et numei pawlkhat zong a om hi; tuate lahah Mary Magdalene, a nauzaw James le Joses’ nu Mary, le Salome-te a kihal hi.

⁴¹ Galilee gam sungah Jesu a op lai-in tam teng in ama zui-in a kisapnate a na sih ngitnget uhi; ama tawh Jerusalem dong a zawhton numei dang tampitah zong a om hi.

Jesu a Kivuina

⁴² Tua ni pen sabbath ni masang, Kigin ni ahi ziehin nitah lam ciengin,

⁴³ ulien vaihawmte lahah mi’ zatah mama, Pasien’ manggam zong lametna tawh a ngah lenlon, Arimathea khuomi Joseph, Pilat kungah hangtahin pei-in Jesu’ luong a ngen hi.

⁴⁴ Tua ciengin Pilat in a si zo lam a thei ciengin lamdang a sa hi; tuale ama in galkapmangpa khat hlansahin a si zaw a sawt tai mah, ci-in a dong hi.

⁴⁵ A si zo lam galkapmangpa tung panin a thei bepin a luong Joseph a pie hi.

⁴⁶ Tua ciengin Joseph in diel puon khat tawi-in a luong a la dawh a, tua diel puon tawh tunin a kilemsa suong hankhuh sung khatah a siel hi. Tua ciengin ama in hankot-ah suongtum khat lia-in a koi hi.

⁴⁷ Mary Magdalene le Joses’ nu Mary in a luong kisielna mun a mu uhi.