Mark 12 - Zo Bible

Losapte Thugentena

¹ Tua ciengin amate kungah thugentena zangin thugen a kipan hi. “Mi khat in lengga lo bawl a, a kimvelah dai kai-in, a sungah lengga cil nading dum to a, tausang khat daw hi; tua ciengin losapte kawmsahin gam dangah a zin hi.

² An lah hun a tun ciengin amate kung panin lengga lo pana a pieng ama’ nga ding teng khon dingin losapte kungah a sila khat a sawl hi.

³ Ahi vangin amate in na manin na sat gawpin na guoh peisah uhi.

⁴ Amate kungah sila dang khat sawlkia leuleu hi; tua pa zong a lu na satin na zako uhi.

⁵ Tua ciengin adang khat sawlkia a, amate in tua pa zong na that uhi. Adang tampite zong tua bang ma-in a sawl uhi; amate in pawlkhat na satin adangte na that uhi.

⁶ Ama in a it mama tapa khat nei lai hi. A tawpna ah, ‘Ka tapa na zatah buong sam va uh,’ ci-in amate kungah a sawl hi.

⁷ Ahi vangin losapte in, ‘Tampa gamhluo ding pa ahi hi; hing pei un, ama that vai-in a gamh luo ding teng la vai,’ ci-in khatlekhat a kiho uhi.

⁸ Tuaci’n ama manin a that vua, lengga lo pulamah a paimang uhi.

⁹ Tua ahile lengga lo nei pa in bang a law diei? Ama pei-in losapte susie ding a, a lengga lo midangte a pie ding hi.

¹⁰ Tami Lai Siengtho sungah: ‘Innlamte in a nilmang suong pen innkiu suongpi a suoh zo hi;

¹¹ tami khu Topa’ bawl ahi a, i mit mu-in lamdang hi,’ ci-a kigiel khu na sim ngai sih uh amah?” a ci hi.

¹² Tami thugentena pen amate a langgenna ahi lam a thei ciengun ama a man nuom vua, ahi vangin amate in mihonpite a giing uhi. Tuaci’n ama nuasie-in a pei uhi.

Phiengsie Pieh ding Thudawhna

¹³ Tua ciengin amate in thugenna tawh ama mawmat dingin a kungah Pharisee-te pawlkhat le Herod mi pawlkhat a sawl uhi.

¹⁴ Tuale amate pei-in, “Siepa aw, nang na citah a, koima zatah na nei sih hi; azieh pen nang in mi mai-et tuom na nei sih hi; ahi vangin thuman thutah tawh kituohin Pasien’ lampi na hil lam zong ka thei uhi. Kumpipa tungah sieh pieh huoi amah, pieh huoi lo ahei?

¹⁵ Pie ding ka hi uh amah, pie lo ding ka hi uh ahei?” a ci uhi. Ahi vangin amau’ kineitawmna a thei ziehin ama in a kung vuah, “Note in bang dinga kei nei ze-et uh ahei? Sum denarii khat hing la unlen ei velsah un,” a ci hi.

¹⁶ Tuale amate in dangka tang khat peipi uhi. Tua ciengin amate kungah, “Tami koi’ lim le koi’ min ahiei,” a ci hi. Amate in kumpipa’ lim le min ahi hi,” ci-in a dawng uhi.

¹⁷ Jesu in amate kungah, “Kumpipa’ nate kumpipa tungah pie unlen, Pasien’ nate Pasien tungah pie un,” a ci hi. Tuale amate in lamdang a sa mama uhi.

Thawkiana Tungtang Thudawhna

¹⁸ Ama kungah thawkiana om lo hi, a ci Sadducee-te pawlkhat pei-in thu khat a dong vua,

¹⁹ “Siepa aw, Moses in, ‘Mi khat’ sanggampa in ta nei loin a zi a sisan leh, tua mipa in tua meigongnu kinunpi-in a sanggam pa adingin ta hinpieh ding hi,’ ci hi.

²⁰ Sanggam pasal sagi om a, a tapen pa in zi nei a, ta nei loin a si hi;

²¹ tuale a nina pa in tua nu ma kinupi-in ta nei loin si leuleu hi; a thumna pa zong tua ma bang ahi hi;

²² a sagina dongin tua nu a kinunpi vua, ta nei lo vive ma-in a si sieng uhi. A tawpna ah tua numei nu mama zong a si hi.

²³ Thawkia hun ciengin tua nu koi pen’ zi ahi diei? Azieh pen a sagipi-un tua nu a kinunpi kim uhi,” a ci hi.

²⁴ Jesu in amate kungah, “Note in Lai Siengtho thu le Pasien’ vanglietna na thei lo ziehun na khielna uh tami hi lo amah?

²⁵ Azieh pen sina panin amate a thawkia ciengin vantung mite ma bangin kipi kitenna om nawn lo ding hi.

²⁶ Misite thawkiana tawh kisai-in Moses’ laibu sunga theubawh tangthu sungah, Pasien in ama kungah, ‘Abraham’ Pasien, Isaac’ Pasien, le Jacob’ Pasien ka hi hi,’ a ci thu na sim ngai sih uh amah?’ a ci hi.

²⁷ Ama pen a site’ Pasien ahi sih a, a hingte’ Pasien ahi zaw hi; note na nahkhiel mama uhi,” a ci hi.

Thupieh Masapen

²⁸ Thukham hil siete lahah khat in a kung va nai a, amate khatlekhat a kiselna uh a za hi. Jesu in amate hoitaha a dawn thei lam a mu ciengin ama in, “Thupieh zosiete lah panin bang amasa pen ahei?” ci-in a dong hi.

²⁹ Jesu in, “Amasa pen in, ‘Israel aw, za in: Topa i Pasien in Topa khat beh ahi hi;

³⁰ Topa na Pasien, na lungtang zosie, na hinna zosie, le na lungsim zosie tawh na it ding hi,’ a ci hi.

³¹ A nina in, ‘Nangma na ki-it bangin na vengte na it ding hi,’ ci ahi hi. Tamte sanga a thupizaw thupieh dang om lo hi,” a ci hi.

³² Tua ciengin thukham hil siete in ama kungah, “Siepa aw, na thugen a man hi.; nang in, ‘Ama khat beh ahi a, ama simlo koima dang om lo hi,’ ci-in a mantahin na gen zo hi.

³³ Tuale, ‘Na lungtang zosie, na theina zosie le na thahatna zosie tawh ama na it ding,’ le, ‘Nang le nang na ki-it banga na vengte na it ding,’ ci pen meihal biehna buppi le biehpiehnate sangin thupizaw tham hi,” a ci hi.

³⁴ Ama in pilvang taha a dawn thei lam Jesu in a mu ciengin ama kungah, “Pasien’ manggam tawh na kigamla sih hi,” a ci hi. Tua zaw ciengin koima in ama thu a dong ngam nawn sih uhi.

David’ Tapa Tungtang Thudawhna

³⁵ Biehinnpi sungah Jesu in thu a hil laitahin ama in, “Bang dinga thukham hil siete in Messiah pen David’ tapa a ci thei uh ahei?

³⁶ David mama in, Hlagau Siengtho sawlna tawh thugen a, ‘Topa in ka Topa tungah, “Na keng nei-ah na galte ka koi masangsie-in ka zietlamah na to in,’ ci hi,” a ci hi.

³⁷ David mama in ama pen Topa ci hi; tua ahile bangci bangin Jesu pen a tapa hi thei ding ahei?” a ci hi. Tuale mipite in lunglut tahin a thugen a ngai uhi.

Jesu in Thukhamhil Siete Mawsah

³⁸ Tua banga a hil kawmin Jesu in, “Puontuolpi sila a va kawikawi ding uh nuomsa-in vanzuanate lahah zatah hopi ding a dei thukham hil siete na kidawm un,

³⁹ tuale kikhopna inn sunga om tona nuom pente tunga to ding a nuom vua, pawibawlna ah zong mun thupi pente a luo nuom uhi!

⁴⁰ Meigongte’ inn a pumval mang vua, a kilimlawm dingin sauveipi thu a ngen uhi. Amate in mawsahna a lienzaw a nga ding uhi,” a ci hi.

Meigongnu’ Silpieh

⁴¹ Sumkholna kuong tawh kimaingatin Jesu to a, sumkholna kuong sunga sumpi khie mihonte a en hi. Mihau tampite in sum tampipi a khie uhi.

⁴² Mizawng meigong numei khat pei-in paisa khat man ahi sumsan tang ni khie hi.

⁴³ Tua ciengin ama in nuazuite hlanin amate kungah, “Ke’n a tahtah a kang ci-in, sumkholna kuong sunga sumkhie zosie teng sangin tami mizawng meigongnu in a tamkhiehzaw hi.

⁴⁴ Azieh pen amate zosie in a neival a lamval uh sung panin a khie vua, tam nu in a zawn a ngau kawmkalah a kiva nading nasan hen nei loin a nei sun teng zosie a khie sieng hi,” a ci hi.