Mark 10 - Zo Bible

Kikhulna Thuhilna

¹ Ama in khum mun nuasie-in Judea gam le Jordan gungal tengah a pei hi. Tuale ama kimvelah mihonpi a kikhawmkia uhi; tuale, a bawl ngaisa ma bangin amate tungah thuhil a kipankia hi.

² Pharisee-te pawlkhat pei-in a ze-etna-un ama kungah, “Pasal khat in a zi a khul ding a kilawm ma amah?” ci-in a dong uhi.

³ Ama in, “Moses in bang thu ang pie vuoi?” a ci hi.

⁴ Amate in, Moses in ahile pasal in kikhenna lai pie-a khul thei dingin ei phal hi,” a ci uhi.

⁵ Hinanle Jesu in amate kungah, “Na lungtang khau seng zieh vua ama in tua bang thukham a giel ahi bo hi.

⁶ Ahi vangin lei kisiemcil a kipanin, ‘Pasien in numei le pasal a bawl hi.

⁷ ‘Tami thu ziehin pasal in a nu a pa nuasie-in a zi tawh kigawm ding a,

⁸ tua ni tegel sa khat a suoh ding uhi,’ na kici hi.Tuaci’n ama gel ni hi nawn loin sa khat ahi ta uhi.

⁹ Tua ahi ziehin Pasien’ gawmsate koima in khen sih taheh,” a ci hi.

¹⁰ Tua ciengin a nuazuite in inn sungah tami thu ama a dongkia uhi.

¹¹ Ama in a kung vuah, “A zi khul a, numei dang khat tawh a kinung poma a zi angkawmsan ahi hi;

¹² tuale numei in a pasal khulin pasal dang khat tawh a kinun leh zong angkawm ma ahi hi,” a ci hi.

Jesu in Naupangnote Thupha Pie

¹³ Ama in naupangnote a tham thei nadingin mipite in ama kungah a peipi uhi; tuale nuazuite in khautahin amate a na hosie gawp uhi.

¹⁴ Ahi vangin Jesu in tua thu a thei ciengin lungthah a, amate kungah, “Naupangte ka kungah hing peisah un; kham sih un; bangzieh ahei cile Pasien’ manggam pen tua bang mite ading ahi hi.

¹⁵ Ke’n a tahtah a kang ci-in, naupangno khat banga Pasien’ manggam a sang lo poma, tua sungah a lut ngai sih ding hi,” a ci hi.

¹⁶ Ama in a kangah amate tawi a, a tung vuah a khut ngamin thupha a pie hi.

Mihau Pa

¹⁷ A khuolzinna zom dingin a pei laitahin ama kungah mi khat tai a, a mai-ah khupdinin, “Sie Hoipa aw, kumtawn hinna ka luo thei nadingin bang sem ding ka hei?” ci-in a dong hi.

¹⁸ Jesu in ama kungah, “Bang dinga kei mihoi nei ci ahei? Pasien khat beh simlo koima a hoi om lo hi.

¹⁹ Nang in: ‘Na that sih ding hi; ang na kawm sih ding hi; na gu sih ding hi; zuou teci na pang sih ding hi; mi neisa na lahpieh sih ding hi; na nu na pa na zatah ding hi,’ ci thupiehte na thei hi,” a ci hi.

²⁰ Ama in, “Siepa aw, tam teng zosie ka neu lai-a kipan ka na zui siengsa ahi hi,” a ci hi.

²¹ Jesu in a et ciengin ama it a, “Na khat kisam lai teh; pei-in na neisa teng zua inlen tua sum teng mizawngte pie in, tua hile vantungah gou na nei ding hi; tua ciengin hing pei inlen ka nua ei zui in,” a ci hi.

²² Ama in neilelam tampi a nei ziehin tua thu a zah bepin maipua-in a dasa-in a peikia ta hi.

²³ Tua ciengin Jesu in a kim a pam en kawikawi a, a nuazuite kungah, “Mihaute dingin Pasien’ manggam lut nading bang zatahin a hamsa diei izaw!” a ci hi.

²⁴ Tami kammal ziehin a nuazuite in lamdang a sa mama uhi. Ahi vangin Jesu in amate kungah genkia a, “Tate aw, Pasien’ manggam lut nading bangza tahin hamsa ahei!

²⁵ Mihau khat, Pasien’ manggam sunga a lut ding sangin kala-oh khat hieumei hawm sunga a lut ding baizaw lai hi,” a ci hi.

²⁶ Amate in lamdang a sa mama vua, “Tua ahile koi in hutdam a tang zo mawh ta diei?”ci-in khatlekhat a kiho uhi.

²⁷ Jesu in amate enin, “Tam pen mihingte adingin hi zo lo ma hi, ahi vangin Pasien adingin a himaw thu hi lo hi; azieh pen Pasien adingin na vannuoi hi thei hi,” a ci hi.

²⁸ Peter zong kipanin ama kungah, “En in, ko zong na zosie nuasie-in na nua kang zui uh,” a ci hi.

²⁹ Jesu in, “A tahtah a kang ci-in, keima zieh le lungdamna thu ziehin a innte, a sanggam pasalte, a sanggam numeite, a nu a pa, a tate, le a lote a nuasie poma in,

³⁰ tu khang hunin a za zakhat innte, sanggam pasalte, sanggam numeite, nute, tate, lote nga ding a, ang tung ding hunah kumtawn hinna nga lai ding hi.

³¹ Ahi vangin a masate tampi ang nukhia ding a, a nukhiate ang masa ding uhi,” a ci hi.

Jesu in a Si ding le a Thawkia ding Thumvei Magen

³² Jerusalem zuonin a pei laitahun a masang vuah Jesu na ma pei hi; amate in lamdang a sa vua, a nua a zui mite zong a zau uhi. Ama in sawm le nite a tuomin peipikia-in ama tunga pieng ding thute gen a kipan a,

³³ “En un, Jerusalem dongah i pei ding a, siempu liente le thukham hil siete’ khut sungah Mihing Tapa ki-ap ding a, tuale amate in sina thuoh dingin ama a mawmat ding uhi; tua ciengin amate in Gentile-te khut sungah a ap ding uhi;

³⁴ amate in ama simmaw bawlin, cilphitin a that ding uhi; tuale ni thum zaw ciengin ama a thokia ding hi,” a ci hi.

James le John’ Ngetna

³⁵ Ama mai-ah Zebedee’ tapa James le John pei-in a kungah, “Siepa aw, kang nget popo uh nei bawlpieh dingin kang thum uhi,” a ci uhi.

³⁶ Ama in ama gel kungah, “Bang hing bawlpieh leng na dei gel ei?” a ci hi.

³⁷ Ama gel in, “Na minthanna kumpi topha tungah na to ciengin khat na zietlamah, khat na veilamah ei tosah in,” a ci uhi.

³⁸ Ahi vangin Jesu in ama gel kungah, “Na sil nget uh pen na thei siem sih gel hi. Ka dawn ding hai ahi sihle ka ki-bapize nading sungah na ki-baptze zo ding gel ei mah?” a ci hi.

³⁹ Ama gel in, “Hi zo na gel vang,” a ci uhi. Tua ciengin Jesu in ama gel kungah, “No tegel in keima’ hai na dawn ding vua, keima ei ki-baptizena ma tawh na ki-baptize ding uhi.

⁴⁰ Ahi vangin ka zietlam le ka veilam a to ding pen kei pieh thei ahi sih a, a bawlpiehsa mite ading hizaw hi,” a ci hi.

⁴¹ Sawmte in tami thu a zah bepun James le John-te tungah a lungthah uhi.

⁴² Tuaci’n Jesu in amate hlan a, “ Gentile-te lahah gam-uh dinga kiciemte mite in amate tungah kiliensahin, a uliente un zong thuneina tawh amate a uh lam na thei uhi.

⁴³ Ahi vangin note lahah tua bang hi lo ding hi; note lahah milien a suoh nuom poma na nasem uh hizaw ding a,

⁴⁴ note lahah a masa pen ahi nuom poma mi zosie’ sila ahi zaw ding hi.

⁴⁵ Mihing Tapa zong midangte ama’ na semsah dinga ang pei hi loin, midangte’ na a sem ding le mi tampi tatkhiet nading ama’ hinna a pie dinga ang pei ahi zaw hi,” a ci hi.

Mittaw Bartimaeus Kidamsahna

⁴⁶ Jericho ah amate a tung uhi. Ama in a nuazuite le mihonpite tawh Jericho a nuasie laitahin lampi gei-ah Timaeus’ tapa, Bartimaeus a kici mittaw khutdaw ngen khat na to hi.

⁴⁷ Nazareth khuomi Jesu ahi lam ama in a zah ciengin nahpi tahin kiko a, “David’ Tapa Jesu aw, ei hepi bo ven!” a ci hi.

⁴⁸ A sip khinkhian nadingun mi tampi in a kham vangun nahpi tahin ama awng semsem a, “David’ Tapa aw, ei hepi bo ven!” a ci hi.

⁴⁹ Jesu khawlin, “Ama tanah hing hlan ta un,” a ci hi. Tuale amate in zong mittaw pa a hlan vua, ama kungah, “Kilungnuomsah in; ding in, ama in nang ang hlan hi,” a ci uhi.

⁵⁰ Tuaci’n ama in zong a puon tungsil paimangin tawndienin Jesu kungah a pei hi.

⁵¹ Tua ciengin Jesu in ama kungah, “Bang kang bawlpieh ding na dei ei?” a ci hi. Mittaw pa in ama kungah, “Ka siepa aw, khuo ei musahkia in,” a ci hi.

⁵² Jesu in ama kungah, “Pei in; na upna in ang damsah zo hi,” a ci hi. Thakhatin ama in khuo mu theikia-in lampi-ah Jesu nua a zui pai hi.