Mark 1 - Zo Bible

Baptize-pa John Thugenna

¹ Pasien Tapa Jesu Khris’ lungdamna thu a kipatna tam bang ahi hi.

² Kamsang Isaiah Laibu sunga a kigiel bangin, “En in, na lampi a siel dingin na mai-ah ka kamtaipa ka sawl hi;

³ gamlahah mi khat tam bangin kiko hi: ‘Topa pei nading lampi siel unlen, ama’ lampi na tangsah un,’ ci hi,” a ci hi.

⁴ Gamlahah baptize-pa John kihil a, mawna maisah nading kisiakiana tawh kisai baptize-na thu hil hi.

⁵ Judea gam buppi le Jerusalem-a mi zosie ama kungah pei-in a mawnate uh a pulah vua, tuaci’n Jordan gun sungah a ki-baptize uhi.

⁶ Tu-in John in kala-oh mul tawh a kigan puon sil a, a kawngah savun kawnggah gahin kauphe le khuoizu-in a kiva hi.

⁷ Ama in, “Ka nua-a ang pei ding pa pen kei sangin vanglien zawtham a, kunin a kedap khaute sut ding nangawnin ka kilawm sih hi.

⁸ Keima in tui tawh note kang baptize hi; hizongle ama in Hlagau Siengtho tawh note ang baptize ding hi,” a ci hi.

Jesu a Ki-Baptizena

⁹ Khum hun lai-in Galilee gam Nazareth khuo panin Jesu pei-in John in Jordan gunah a baptize hi.

¹⁰ Tui sung panin a thawto laitahin vantung kiphalsuo a mu a, ama tungah vakhu bangin Hlagau Siengtho a kumsuh hi.

¹¹ Vantung panin aw khat ging a, “Nang pen kang it mama ka Tapa na hi hi; nang tungah ka lungkim mama hi,” a ci hi.

Jesu Kize-etna

¹² Tuale thakhatthu-in Hlagau Siengtho in ama senel gamah a sawl pai hi.

¹³ Senel gam sungah ni sawmli sung om a, Satan in ama a ze-et hi; tuale gamsate tawh omton a, vantung mite in ama kem hi.

Galilee ah Nasep a Kipatna

¹⁴ John a kimat zaw ciengin Galilee gamah Jesu pei-in Pasien lungdamna thutha tangko a,

¹⁵ tuale ama in, “A hun ang tung ta a, Pasien’ manggam ang nai ta hi; kisiakia unlen lungdamna thu tha um un,” a ci hi.

Jesu in Nuazui Masate a Hlatna

¹⁶ Galilee Tuipi dung zui-in Jesu a pei laitahin Simon le a naupa Andrew, tui sungah len a khu laitah uh a mu hi, azieh pen ama gel pen ngabengte ahi uhi.

¹⁷ Tuale Jesu in ama gel kungah, “Keima ei zui un, tua hile mi mante kang suohsah ding hi,” a ci hi.

¹⁸ Ama gel in zong thakhatin a len uh nuasie-in ama a zui pai uhi.

¹⁹ Bakhat a pei zaw ciengin ama in gunkuong sunga len phaw-a a om Zebedee’ tapa James le a sanggampa John a mu hi.

²⁰ Ama in thakhatin ama gel hlan a, ama gel in zong a pa uh Zebedee le a thacielte uh gunkuong tawh nuasie-in ama a zui pai uhi.

Hlabua Vei Mipa

²¹ Capernaum khuo ah amate a pei uhi; tuale sabbath ni a tun ciengin kikhopna inn sungah ama lutin thu a hil hi.

²² Amate in ama’ thuhilna lamdang a sa uhi, azieh pen ama in thukham hil siete bang hi loin thuneipa khat bangin thu hil hi.

²³ Tua laitahin a kikhopna inn vuah hlabua in a mat mi khat om a,

²⁴ “Nazareth mi Jesu aw, nang le ko bang kisai i hei? Ko ei susie dinga ang pei na hi amah? Pasien’ Mi Siengtho na hi lam ka thei hi,” ci-in a kiko hi.

²⁵ Ahi vangin Jesu in ama ngelawt a, “Ham sin, tampa sung panin pusuoh in,” a ci hi.

²⁶ Tua hlabua in mipa kongkawsah a, a aw nei za tawh awngin ama sung panin a pusuoh hi.

²⁷ Amate in a unpi-un lamdang a sa vua, “Tam thu bang hi poma ahei? Thuneina tawh a kigen thuhilna tha khat ahi hi! Ama in thu pie po leh hlabuate nangawn in mang na lai uhi,” ci-in khatlekhat a kidong uhi.

²⁸ Thakhatthu-in Galilee gam kimvel zosie ah a minthanna a kizel pai hi.

Simon’ Innah Jesu in Mi Tampi Damsah

²⁹ Amate in kikhopna inn a nuasie behun Simon le Andrew-te inn ah James le John tawh a lut uhi.

³⁰ Simon’ sungnu cithuo-in lupmun tung ngahin om a, tuale ama kungah tua nu thu thakhatin a gen pai uhi.

³¹ Ama pei-in a khut tawh tua nu kai-in a phongto hi. Tua ciengin a cithuo natna dam a, zindo a kipan pai hi.

³² Khumi nitah, nitum zaw ciengin amate in cina zosie le dawivei zosie ama kungah a peipi uhi.

³³ Tuale a khuozangpi-un kotkhah gei-ah a kikhawm uhi.

³⁴ Ama in natna tuomtuom a vei cina tampite damsah a, dawi tampitah a notmang hi; dawite in a thei ziehin ama in a ham ding uh a phal sih hi.

Galilee-ah Thugen dinga Khuolzinna

³⁵ Zingmawng khuova masangin gamdaina munah ama pei-in tuanah thu a ngen hi.

³⁶ Simon le a guolte in ama a sui uhi.

³⁷ Ama a mu ciengun amate in, “Mi zosie in ang sui uhi,” a ci uhi.

³⁸ Ama in, “Tam khuoveng tengah pei vai, tuate lahah zong thu ka gen ding hi; azieh pen tami sem dinga ang pei ka hi hi,” a ci hi.

³⁹ Galilee gam muncin tengah ama zinin a kikhopna uh innte sungah thu genin dawite a notmang hi.

Jesu in Miphah Khat Damsah

⁴⁰ Miphah khat ama kungah pei-in khupdin a, “Nei damsah nop po leh nei damsah thei hi,” ci-in a thum hi.

⁴¹ Jesu in hepihuoisa-in a khut zahin tham a, ama kungah, “Kang damsah nuom hi. Dam pai in!” a ci hi.

⁴² Thakhatin a phahnatna in ama nuasie-in a dam pai hi.

⁴³ Khautahin ama thu a hilkhol zaw ciengin thakhatin peisah pai a,

⁴⁴ ama kungah, “Tami thu koima kungah gen malmal sin; ahi vangin pei-in siempu pa kungah va kilah ta’nlen amate tungah teci ahi dingin Moses thupieh bangin na damna ziehin biehna pie in,” a ci hi.

⁴⁵ Hizongle ama pei-in a genthang kawikawi hi. Tua ahi ziehin khuopi sungah Jesu a langtangin lut thei ta loin khuo pulam gamlahah a om hi; hizongle ama kungah mun zosie panin mite pei veve hi.