Malachi 1 - Zo Bible

¹ Thuphuon khat. Israel tunga Malachi in a gen Topa’ thu.

Israel in Edom Deizaw

² Note kang it hi, Topa in ci hi. Ahi vangin note in, “Kote bang nei ci it ei?” na ci uhi. Jacob’ sanggampa Esau hi lo amah? Topa in ci hi. Hizongle Jacob ka it a,

³ ahi vangin Esau ka muda hi; keima in a muoltung gam teng gamkhing suohsahin ama’ luona teng si-alte tenna senel gam ka suohsah zo hi.

⁴ Edom in, “Eite ei kivatmai vangin a kisie teng i lamkia ding uhi,” a ci leh Vanglien Topa in tam bangin ci hi: Amate in lam thei ding uhi, ahi vangin amate pen gam gilo, Topa lungthah denna minam a kici dongin ka susie veve ding hi.

⁵ Na mit mama utawh tam thupieng na mu ding vua, “Israel gamgi hlen dongah Topa lien hi!” na ci ding uhi.

Siempute Kisietna

⁶ Tate in a pa a patawi vua, nasemte in a pupa a patawi uhi. Kei pa khat ka hi leh hei-ah ei kipatawina om ahei? Kei a pu khat ka hi leh hei-ah ei kizatahna om ahei? Keima’ min a simmaw siempute aw, ci-in note tungah Vanglien Topa in ci hi. Note in, “Na min bang kang ci simmaw uh ahei?” na ci uhi.

⁷ Ka maitam tungah a sieng lo an tawh biehna na lui uhi. Tuale note in, “Bang ka ci buasah uh ahei?” na ci uhi. Tua pen Topa’ sabuoi kisimmaw thei hi, ci-a na ngaisutna utawh ahi hi.

⁸ Biehpiehna dinga a mittaw ganhingte nang pieh uh ciengin tua khu khielna hi lo amah? A khelbai, a cinate nei pieh ciengun tua khu khielna hi lo amah? Na gam uhpa kungah tuate va puoh ta vawi un; na tung vuah ama lungkimin ang pahta ngel diei mah? Vanglien Topa in ci hi.

⁹ Pasien in hing lungsietin ang angvan thei nadingin tu-in thum un. Tua khu noma’ khielna ahi hi. Ama in note khatpo tungah a patatna ang lah ding amah? Vanglien Topa in ci hi.

¹⁰ Ka maitam tungah a mawhna-in mei na taw lo nadingun note lahah mi pawlkhat in biehinnpi kotkhahte khah uleh maw! Na tung vuah ka lung a kim sih a, na khut sung panun biehna ka sang sih ding hi, Vanglien Topa in ci hi.

¹¹ Azieh pen nisuo-a kipan nitum dongin minamte lahah ka min lienin, muncin tengah ka minin gimnamtui le biehna siengtho kipie ding hi; azieh pen minamte lahah ka min lien hi, Vanglien Topa in ci hi.

¹² Ahi vangin Topa’ sabuoi bua zo ta hi, na ci ciengun tua sabuoi a buasah noma na hi vua, tua an zong na simmaw uhi.

¹³ Tami khu cimtah huoi sam ei,” na ci vua, kei nei napnit san lel uhi, Vanglien Topa in ci hi. Na biehna dingun tatsietna tawh a kila ganhing ahi a, a liem a bai, ahi sihle a cina khatpo ahi zongin nang peipi uhi! Na khut sung panun tuate kang sang ding amah? Topa in ci hi.

¹⁴ A tuuhonte lahah tuu apa khat pieh dingin kamciem napi, Topa tungah kawbaang biehpiehnate a pie mipa in samsiet nga taheh; azieh pen kei Kumpi lien ka hi a, minamte lahah ka min kizatah hi, Vanglien Topa in ci hi.