Luke 5 - Zo Bible

Jesu in Nuazui Masate Hlan

¹ Khatvei Genesaret buol gei-ah Jesu ding a, mipite in Pasien thu ngai dingin ama a nehgawp laitahin,

² ama in buol gei-a om gunkuong ni a mu hi; tua gunkuongte sung panin ngabengte peikhie-in a lente a sawp sieng uhi.

³ Tua gunkuongte sung panin Simon’ gunkuong tungah ama tuong a, pieugei panin tawm khat a khin nadingin a sawl hi. Tua ciengin ama to-in gunkuong sung panin mihonpite thu a hil hi.

⁴ A thugen a manzaw ciengin ama in Simon kungah, “Tui thuhna lamah na gunkuong hot inlen, na len tawh nga khu in,” a ci hi.

⁵ Simon in, “Mangpa, zanthapai-in ka na khu vangun bangma khat zong ka man sih uhi. Hizongle khu in nei cileh lah khu mawh ta veng,” ci-in a dawng hi.

⁶ Tua bangin len a khu uleh nga tam awh seng ahi ziehin a len uh a keh khiel vawt hi.

⁷ Gunkuong dang khat-a om a guolte pei a, a hu dingin a khutzap uhi. Tuale amate zong pei-in gunkuong tegel sungah nga a dimin a koi ziehun tui sungah a tum dihtah uhi.

⁸ Ahi vangin Simon Peter in tua thu a mu bepin Jesu mai-ah khupdin a, Topa aw, mawnei mi khat ka hi ziehin kei kung panin peikhie in!” a ci hi.

⁹ Azieh pen nga tuaza a mat thei uh ama le a pawlte zosie in lamdang a sa uhi;

¹⁰ tua ma bangin Simon kipawlpi Zebedee’ tapate ahi James le John-te in zong lamdang a sa uhi. Tua ciengin Jesu in Simon kungah, “Zau sin; tu-a kipanin mihingte na man ding hi,” a ci hi.

¹¹ Tuipieu-ah a gunkuongte uh a khawlsah zaw ciengun amate in na zosie nuasie-in ama a zui uhi.

Jesu in Miphah Damsah

¹² Khumin khatvei, khuopi sung khatah ama a op laitahin a pumtanga a phah mi khat pei a, Jesu a mu bepin tuolah khupbawh a, “Topa aw, ei damsah nuom po lacin nei damsah thei hi,” ci-in a thum hi.

¹³ Tua ciengin Jesu in a khut zahin tham a, “Kang damsah nuom hi. Dam ta in,” a ci leh thakhatin a phah natna in ama a nuasie pailien hi.

¹⁴ Koima kungah gen sin, ci-in ama thu a pie hi. Ama in, “Pei inlen, siempu pa kungah va kilah tanlen, Moses’ thupieh dung zui-in amate tungah teci ahi dingin na sienna ziehin biehpiehna va bawl ta’n,” ci-in thu a pie hi.

¹⁵ Ahi vangin nidang sangin ama’ thu a kizel semsem hi; mi tampitahte a thungai ding le a natnate uh a dam nadingin a kikhawm uhi.

¹⁶ Ahi vangin gamdai-ah ama kihem dawhin thu a ngen hi.

Jesu in Phalsi Khat Damsah

¹⁷ Nikhat Jesu in thu a hil laitahin ama gei-ah Galilee gam, Judea gam, le Jerusalem pana ang pei Pharisee-te le thukham hil siete a to uhi. Tuale natna damsah nading Topa’ vanglietna in ama tungah a om hi.

¹⁸ Tua zaw ciengin mi pawlkhat pei-in phalsi mi khat a lupna tawh a zawng uhi. Amate in inn sungah ama tumpi-in Jesu mai-a siel dingin a hanciem uhi;

¹⁹ ahi vangin mihonpi tam seng ahi ziehin a lutpi nading uh lampi a mu zo sih vua, tua bepin innkhumah kato-in a khumvang panin mipite laikim Jesu mai sontah ah a lupna pumin a khiesuh uhi.

²⁰ Ama in a upna uh a mu ciengin, “Lawm aw, na mawna teng kimaisah zo hi,” a ci hi.

²¹ Tua ciengin thukham hil siete le Pharisee-te a kiho vua, “Pasien a gensie tam pa koi ahei? Pasien longal koi in mawna maisah thei ahei?” ci-in thudawh ding a kipan uhi.

²² Jesu in a thudawh uh a thei ciengin amate kungah, “Na lungsim sung vua bang dinga tua bang thute na dawh uh ahei?

²³ ‘Na mawnate kimaisah zo hi’ ci ding le ‘Tho inlen lampei in,’ ci ding koi baizaw ahei?

²⁴ Ahi vangin Mihing Tapa in leitungah mawna maisah thei nading thuneina a nei lamtah na thei nadingun phalsi pa kungah, “Nang kungah kang ci-in, tho inlen na lupna puo-in na inn ah pei in,” a ci hi.

²⁵ Tua pa zong thakhatin amate mai-ah tho-in a lupna puo a, Pasien phat kawmin a inn ah a pei hi.

²⁶ Amate in a unpi-un lamdang a sa vua, a zau kawmun Pasien phatin, “Eite in tuni-in na lamdang i mu zo ta uhi,” a ci uhi.

Jesu in Levi Hlan

²⁷ Tua zaw ciengin Jesu a pusuoh leh siehdonna zuma a to Levi kici siehdong khat mu a, ama in, “Ei zui in,” a ci hi.

²⁸ Tuale ama in zong na zosie nuasie-in ama a zui hi.

²⁹ Tua ciengin Levi in a inn ah Jesu adingin anneh pawi khat a bawl hi; siehdong honpite le midangte in amate tawh ankuong a imton uhi.

³⁰ Pharisee-te le thukham hil a siete un a nuazuite kungah, “Bang dinga siehdongte le mawneite tawh neton dawnton na hi uh ahei? ci-in a mawsiet uhi.

³¹ Jesu in, “Sievuon a tulmaw pen cidamte hi loin cinate hizaw hi.

³² Midihte hlan dinga ang pei ka hi sih a, mawneite a kisiakia nadinga ang pei ka hizaw hi,” ci-in a dawng hi.

Antanna Thu Dohna

³³ Tua ciengin amate in ama kungah, “John’ nuazuite in Pharisee-te’ nuazuite bangin an tangin thu ngen zel napi, na nuazuite ahile an ne tui dawnin a om uhi,” a ci uhi.

³⁴ Jesu in amate kungah, “Mopawi simte in zi nei ding pa tawh a om sungun an na tangsah thei ding uh amah?

³⁵ Amate kung panin zineipa a kilahdawh hun ang tung ding a, khum ni ciengin amate in an a tang ding uhi,” a ci hi.

³⁶ Jesu in amate kungah thugentena khat tawh thu a gen hi: “Koima in puon tha ehkehin puonsie phawna-in a zang sih hi; tua banga a bawl leh a puontha ehkeh ding a, puontha beh le a lui a kituoh thei sih ding hi.

³⁷ Koima in savun umlui sungah lenggazu tha a thal sih hi; a tuaci bawl leh lenggazu tha in savun um pawhkeh sahin lenggazu phulmang ding a, savun um a kisie ding hi.

³⁸ Lenggazu tha pen savun um tha sunga thal ding hizaw hi.

³⁹ Koima in lenggazu lui a dawn zaw ciengin lenggazu tha a lunggul ta sih a, ‘Lenggazu lui ma tuizaw hi,’ ci hi,” a ci hi.