Luke 3 - Zo Bible

Baptize-pa John Tangkona

¹ Kumpipa Caesar Tiberius a maan zaw kum sawm le kumnga a cin kumin Pontius Pilat pen Judah gam uhpipa hi a, Herod, Galilee gam uhpa hi-in, a naupa Philip pen Ituraea le Trachonitis gamte a uhpa le Lysanias pen Abilene gam uhpa ahi uhi.

² Annas le Caiaphas in siempu lienpen a sep laitahin senel gama a om Zechariah’ tapa John tungah Pasien’ kammal a tung hi.

³ Jordan gun kimvela om gam sung teng zosie-ah ama vah kawikawi-in mawna maisah nadingin kisiakiana tawh kisai baptize-na thu a hil hi.

⁴ Kamsang Isaiah’ thugente a kigielna laibu sungah, “Gamlahah a kiko mi khat’ aw in: ‘Topa pei nading lampi siel unlen, a lampite tangsah un.

⁵ Muolkuom cinteng kivuadim ding a, muol le tang zosie kito tamin, lamkawite kizezang ding a, lamphomte kimamsah ding hi;

⁶ tuale mi zosie in Pasien’ hutdamna mu ding uhi,’ ci hi,” ci-a a kigiel bang ahi hi.

⁷ A ki-baptize sah dinga ama kung a zuon mihonpite kungah John in, “No muoltan suonte! Ang tung ding lungthahna pan na taimang nading uh koi in ang hil ahei?

⁸ Kisiakiana tawh kilawm ga na ga un. No le no in, “Abraham i pa uh ahi hi,” ci-in mawh gen sih un; azieh pen ke’n kang ci-in, Pasien in tami suongte panin Abraham tate piengsah thei lel hi.

⁹ Tu nangawnin singzung cin tengah hei kikoi zo hi; ga hoi a ga lo singkung kici poma kiphua-in meikuong sungah kipai ding hi,” a ci hi.

¹⁰ Mihonpite in, “Tua ahile bang ka bawl ding vuoi?” ci-in a dong uhi. Ama in,

¹¹ “Puon tungsil ni a nei pa in a nei lo pa hawm hinlen, an nei pa in zong tua bang ma-in bawl taheh,” ci-in a dawng hi.

¹² A ki-baptize dingin siehdongte nangawn a pei vua, ama kungah, “Sie aw, bang ka bawl ding vuoi,” ci-in a dong uhi.

¹³ Ama in, “Na don ding vua a kisesa kan valin dong sih un,” a ci hi.

¹⁴ Galkapte in zong, “Tuale kote in bang ka bawl ding vuoi?” ci-in a dong uhi. Ama in, “Zawthaw thu le a man lopi-a mawsahna tawh koima sum sut sih unlen, na thaman utawh lungkim un,” a ci hi.

¹⁵ Lametna tawh mite a kidim vua, ama Messiah ahi kha ta diei, ci-in John tawh kisai-in a unpi-un a lungsim sung vuoh a ngaisut laitahun,

¹⁶ John in amate zosie kungah, “Keima in tui tawh note kang baptize hi; ahi vangin kei sanga a vanglien zaw khat ang pei ding hi; a kedap khau sut dingin zong ka kilawm sih hi. Ama in Hlagau Siengtho le mei tawh note ang baptize ding hi.

¹⁷ Ama in buphuol zap sieng nadingin a khutah lawpi tawi a, butah teng sal sungah koi-in a siteng a mit ngai lo mei tawh a haltum ding hi,” a ci hi.

¹⁸ Tuaci’n John in hantotna tampi tawh mite kungah lungdamna thu a gen hi.

¹⁹ Ahi vangin gam uhpa Herod’ gitlo gamtatna teng zosie le a naupa’ zi Herodias ziehin John in Herod a hosiet ciengin,

²⁰ Herod in tami thu teng zosie tawh belapin thong sungah John a khum hi.

Jesu’ Ki-baptizena

²¹ Mi zosie a ki-baptize ciengin Jesu zong ki-baptize a, thu a nget laitahin van kihongin,

²² tuale vakhu lim bangin ama tungah Hlagau Siengtho a kumsuh hi. Tuale van panin awging khat in, “Nang pen ka lung ei damsah ka it ka Tapa na hi hi,” a ci hi.

Jesu Khang Simna

²³ Nasep a kipatin Jesu kum sawm thum bang pha a, ama pen (mite ngaituona-ah) Joseph’ tapa ahi a, Joseph pen Heli’ tapa,

²⁴ Heli pen Matthat’ tapa, Matthat pen Levi’ tapa, Levi pen Melchi’ tapa, Melchi pen Jannai’ tapa, Jannai pen Joseph’ tapa,

²⁵ Joseph pen Mattathias’ tapa, Mattathias pen Amos’ tapa, Amos pen Nahum’ tapa, Nahum pen Esli tapa, Esli pen Naggai’ tapa,

²⁶ Naggai pen Maath’ tapa, Maath pen Mattathias’ tapa, Mattathias pen Semein’ tapa, Semein pen Josech’ tapa, Josech pen Joda’ tapa,

²⁷ Joda pen Joanan’ tapa, Joanan pen Rhesa’ tapa, Rhesa pen Zerubbabel’ tapa, Zerubbabel pen Shealtiel’ tapa, Shealtiel pen Neri’ tapa,

²⁸ Neri pen Melchi’ tapa, Melchi pen Addi’ tapa, Addi pen Cosam’ tapa, Cosam pen Elmadam’ tapa, Elmadam pen Er’ tapa,

²⁹ Er pen Joshua’ tapa, Joshua pen Eliezer’ tapa, Eliezer pen Jorim’ tapa, Jorim pen Matthat’ tapa, Matthat pen Levi’ tapa,

³⁰ Levi pen Simeon tapa, Simeon pen Judah’ tapa, Judah pen Joseph’ tapa, Joseph pen Jonam’ tapa, Jonam pen Eliakim’ tapa,

³¹ Eliakim pen Melea’ tapa, Melea pen Menna’ tapa, Menna pen Mattatha’ tapa, Mattatha pen Nathan’ tapa, Nathan pen David’ tapa,

³² David pen Jesse’ tapa, Jesse pen Obed’ tapa, Obed pen Boaz’ tapa, Boaz pen Sala’ tapa, Sala pen Nahshon’ tapa,

³³ Nahshon pen Amminadab’ tapa, Amminadab pen Admin’ tapa, Admin pen Arni’ tapa, Arni pen Hezron’ tapa, Hezron pen Pereg’ tapa, Pereg pen Judah’ tapa,

³⁴ Judah pen Jacob’ tapa, Jacob pen Isaac’ tapa, Isaac pen Abraham’ tapa, Abraham pen Terah’ tapa, Terah pen Nahor’ tapa,

³⁵ Nahor pen Serug’ tapa, Serug pen Reu’ tapa, Reu pen Peleg’ tapa, Peleg pen Eber’ tapa, Eber pen Shelah’ tapa,

³⁶ Shelah pen Cainan’ tapa, Cainan pen Arphaxad’ tapa, Arphaxad pen shem’ tapa, Shem pen Noah’ tapa, Noah pen Lamech’ tapa,

³⁷ Lamech pen Methuselah’ tapa, Methuselah pen Enoch’ tapa, Enoch pen Jared’ tapa, Jared pen Mahalaleel’ tapa, Mahalaleel pen Cainan’ tapa,

³⁸ Cainan pen Enos’ tapa, Enos pen Seth’ tapa, Seth pen Adam’ tapa hi a, Adam pen Pasien’ tapa ahi hi.