Luke 24 - Zo Bible

Jesu’ Thawkiana

¹ Nipi kal khat sunga ni masa pen ni, zingmawng phal vah tungin amate in a bawlsa uh panamtuite tawi-in hanah a pei uhi.

² Han a tun ciengun hankhuh sinna suongtumpi a kilia-a om a mu vua,

³ ahi vangin a sungah a lut ciengun ama’ luong a mu sih uhi.

⁴ Tami thu ah lungmangin a op laitahun, a gei vuah puon telihleh a sil pasal ni thakhatin a ding hi.

⁵ Numeite zau-in tuolah a kunsuh vua, ahi vangin tua pasalte in, “Bang dingin misite lahah mihing sui na hi uh ahei? Ama tanah om lo hi, thokia zo hi.

⁶ Galilee gamah ama a op lai-in na kung vua ang gensa thute phawh un.

⁷ Mawnei mite’ khut sungah Mihing Tapa kipie ding a, singlamte tungah kikhai-in a ni thum ni-in thokia ding hi,” a ci hi.

⁸ Tua ciengin amate in a thugensa a phawhkia vua,

⁹ tuale han panin amate a kilekia ciengun sawm le khatte le midang zosie kungah tam thu teng a unpi-in a gen sieng uhi.

¹⁰ Sawltahpite kungah tami thu a gen teng pen, Mary Magdalene, Joanna, James’ nu Mary, le amate tawh a omton numei dangte ahi uhi.

¹¹ Ahi vangin thu kigente amate in tangmi bangin ngaisunin a tahsang sih uhi.

¹² Ahi vangin Peter dingto-in han lamah tai a, tuale ama kunin han sung a en leh a kitunna taangciin beh a mu uhi; tua ciengin ama in thupieng teng lamdangsa-in inn lam a zuonkia hi.

Emmaus Khuo Peina

¹³ Khum ni ma-in amate lahah Jerusalem panin tai sagi bang a gamla Emmaus kici khuo khat zuonin mi ni a pei vua,

¹⁴ tuale a pei kawmun a thupiengsa thute khatlekhat a kiholim gel hi.

¹⁵ Tua banga holimin a kikup laitahun Jesu mama in va nehin ama gel tawh a zawhton hi.

¹⁶ Ahi vangin ama gel in Jesu ahi lam a thei lo nadingin a mit gel a kisinpieh hi.

¹⁷ Tuale Jesu in ama gel kungah, “Na lampei kawm vua na kikup uh bang thu ahiei?” ci-in dong hi. Ama gel zong dinkhawlin a da tuoh mama gel hi.

¹⁸ Tua ciengin ama gel lahah Cleopas a kici pa in, “Jerusalem khuo-a a hawte lahah tu sawng tengin tua sunga thupieng a thei lo nang beh hi mal vateh” ci-in a dawng hi.

¹⁹ Jesu in ama gel kungah, “Bang thu ahei?” ci-in a dong hi. Ama gel in, “Nazareth mi Jesu tunga thupieng ahi a, nasepna le thugenna ah Pasien’ mai le mi zosie’ mai-ah a vangnei mama kamsang khat zong ahi hi.

²⁰ Sina thukhenna a thuoh dingin ka siempu liente ule ka ulien vaihawmte un ama pie-in singlamte tungah kikhailia hi.

²¹ Ahi vangin kote in ama pen Israel tankhie ding pa hi, ci-in ka lamen uhi. Hi hi, tam teng zosie banah tam thu teng a pien zaw tu-in a ni thumna ahi ta hi.

²² Thamlo-in ko pawl sung panin numei pawlkhat in lamdang ei sasah mama uhi. Zingmawng khuovah behin hanah amate a va haw ta vua,

²³ khum sungah a luong a mu lo ciengun amate ang kilekia-in ama hingkia zo hi, ci-in a gen vantungmite’ kilahna a mu tahtahna uh kote tungah ang gen uhi.

²⁴ Ka pawlte uh pawlkhat zong hanah a va pei ta vua, numeite gen bang lienin a om a mu uhi. Ahi vangin Jesu a mu sih uhi,” a ci gel hi.

²⁵ Tua ciengin Jesu in ama gel kungah, “Kamsangte thugen a tahsang thei lote le mimawte aw!

²⁶ A minthanna ah ama a lut thei nadingin Messiah in tam teng a thuoh ding a kisam ma hi lo amah?” a ci hi.

²⁷ Tua ciengin Jesu in Moses le kamsang zosie tawh thu pan a, ama tawh kisai Lai Siengtho sunga kigen zosie ama gel kungah a hilcien hi.

²⁸ A pei nading uh khuo a tun kuon ciengun Jesu a peisuoh dingin a kisa hi.

²⁹ Ama gel in nahpi-in a hlo vua, “Ko gel kungah hing gieh ta’n. Nitah lam ahi ziehin khuo zong a miel kuon ta hi,” a ci gel hi. Tuaci’n Jesu zong ama gel kunga gieh dingin inn sungah a lut hi.

³⁰ Ama gel tawh sabuoi-ah a to ciengun ama in khomun la a, lungdam a ko zaw ciengin phalsuo-in ama gel a pie hi.

³¹ Tua ciengin a mit gel kihongin Jesu ahi lam a theisiem uhi; tuale ama gel’ muna panin ama a mang ta hi.

³² Ama gel in, “Lampi-ah ei holimpi lai-a, Lai Siengtho ei hilcien lai-in zong i lungsim ei sukha tamal hi lo amah?” ci-in khatlekhat a kiho uhi.

³³ Khum hun ma-in, ama gel ding dawhin Jerusalem ah a kilekia ta uhi; tuale a kikhawmton sawm le khatte le a pawlte a mu uhi.

³⁴ Ama gel in, “Topa thokia tahtah zo a, Simon kungah kilah zo hi,” a ci uhi.

³⁵ Tua ciengin lampi-a thupieng teng le khomun a phalsuo lai-a ama gel tungah ama a na kihilna dan teng a gen uhi.

A Nuazuite Kungah Jesu Kilaa

³⁶ Tam thute a gen laitahun amate lahah Jesu ding a, “Note tungah kilemna om taheh,” a ci hi.

³⁷ Sihla mu kisa uh ahi ziehin amate zau-in a ling uhi.

³⁸ Jesu in amate kungah, “Bang ziehin zau-in, bang ziehin ei umla na hi uh ahei?

³⁹ Ka khut le ka kengte en un; keima ka hi lam thei un. Ei tham unlen thei un; azieh pen sihla in kei nei bangin tahsa guletang nei lo hi,” a ci hi.

⁴⁰ Ama in tam thu a genzaw ciengin a khut le a keng a lah leuleu hi.

⁴¹ Lungdam kipahin lamdangsa-in a up thei nai vaset lo laitahun Jesu in amate kungh, “Tam sungah neh ding khatpo na nei vuoi mah?” ci-in dong hi.

⁴² Amate in nga kihanggawsa khat a pie vua,

⁴³ ama in tua khu la-in a muna vuah a ne hi.

⁴⁴ Tua ciengin Jesu in amate kungah, “Note tawh ka opton lai-a na kung vua kang gen, Moses’ thukham laibu sung, kamsangte laibu sung, le late laibu sunga kigiel keima’ thu zosie ang tangtung valon ding hi, ka ci pen tami thu ahi hi,” a ci hi.

⁴⁵ Tua ciengin ama in Lai Siengtho thu a thei nadingun a lungsim uh honpiehin amate kungah,

⁴⁶ “Tua banga a kigiel ma bangin Messiah in sina thuohin a ni thum ni-in misite lah panin thokia ding a,

⁴⁷ Jerusalem-a kipan minam zosie kungah ama’ min tawh kisiakiana le mawmaina thu kihil ding hi.

⁴⁸ Note zong tam thu-ah teci na hi uhi.

⁴⁹ Tuale en un, ka Pa in ei khapsa thu na kung vuah kang sawl ding hi; tuaci’n a sangna panin vanglietna ang kisilsah masangin tami khuopi sungah na om tadi un,” a ci hi.

Jesu’ Vankana

⁵⁰ Tua ciengin Jesu in Bethany khuo dongin amate zawpi a, tuale ama in a khut lamto-in amate thupha a pie hi.

⁵¹ Thupha a pieh laitahin amate kung panin ama kihem dawhin vantungah a kilato ta hi.

⁵² Amate in ama bie-in lungdamna lienpi tawh Jerusalem ah a kilekia uhi.

⁵³ Tuale biehinnpi ah amate pei-in Pasien min a phat zing uhi.