Luke 23 - Zo Bible

Pilat Mai-ah Jesu

¹ Tua ciengin a kikhawm mipite dingin Pilat kungah Jesu a peipi uhi.

² Amate in ama mawsah a kipan vua, “Tampa pen ka mipite lampielsah pa khatin ka mu vua, ama le ama Messiah ahi kumpi khat ka hi hi, a kici a, Caesar kumpipa tunga sieh ka pieh ding uh ei khah hi,” a ci uhi.

³ Tua ciengin Pilat in ama kungah, “Nang Judah-te’ kumpipa na hi amah? ci-in a dong hi. Ama in, “Na ci bangin ka hi hi,” ci-in a dawng hi.

⁴ Tua ciengin Pilat in, “Tampa tungah khielna bangma ka mu sih hi,” ci-in siempu liente le mipite tungah a gen hi.

⁵ Ahi vangin amate in a hanaw tasem vua, “Ama in a thuhilna tawh Judea gam sunga om mipite a tawhnawi a, Galilee pana kipanin tam mun dong cieng nangawn ang tung hi,” a ci tentun uhi.

Jesu, Herod Mai-ah

⁶ Pilat in tam thu a zah ciengin tam pa Galilee mi amah, ci-in a dong hi.

⁷ Herod uhna gam sunga om ahi lam ama a kithei bepin, tua laitahin Herod zong Jerusalem-a om ahi ziehin ama kungah a peisah hi.

⁸ Herod in Jesu a mu ciengin, a mu nopzaw sawt ta ahi ziehin a lungdam mama hi, azieh pen ama’ thu a zah ngaisa ahi a, a na lamdang bawlte khatpo zong a mu dingin a kilamen hi.

⁹ Herod in thu tampi dong a, ahi vangin Jesu in kam khat beh dawng lo hi.

¹⁰ Siempu liente le thukham hil siete ding to-in, nahpitahin Jesu a mawsah uhi.

¹¹ Herod le a galkapte in simmaw bawlin a ko gawp vua, puontuol hoi mama khat a silsah zaw ciengun Pilat kungah a puohkia uhi.

¹² Khum ni-a kipanin Herod le Pilat khatlekhat a kilawmta uhi; tua masangin ama ni pen kimuda-in a kigalbawl den uh ahi hi.

Jesu Tha dingin Thu Kikhen

¹³ Tua ciengin Pilat in siempu liente, makaite le mipite hlanin

¹⁴ amate kungah, “Note in tam mipa pen mipite a pui khiel khat bangin ka kungah nang peipi uh; na mai vuah ama ka sittel ciengin na mawmatna uh thute khat behah a mawna ka mu sih hi.

¹⁵ Herod in zong a mu tuon lo ziehin eite kunga ang puohkia ahi hi. A tahtahin ama in si nading za dongin bangma a bawl sih hi.

¹⁶ Tua ahi ziehin ama satin ka hla ding hi,” a ci hi.

¹⁷ Pilat in pawi hun sielin amau’ dei thongkie khat a hla ding thu a om mal ahi hi.

¹⁸ Tua ciengin amate kiko-in, “Tampa that in! Barabbas ei hlapieh in!” a ci uhi.

¹⁹ (Tampa pen khuopi sunga buoina a bawl zieh le mi a tha zieha thongkie ahi hi.)

²⁰ Pilat in Jesu a hla nuom ziehin amate kungah khatvei thu genkia a,

²¹ ahi vangin amate in, “Singlamte tungah ama that in, khailia in!” ci-in a awng teitei uhi.

²² Amate kungah a thumveina thu gen a, “Ama in bang sietna a bawl zieha ka khailia ding ahei? Sina ding za-in khielna ama sungah ka mu sih hi; tua ahi ziehin ama satin, tua zaw ciengin ka hla ding hi,” a ci hi.

²³ Ahi vangin nahpi tahin amate a kiko vua, ama a kikhailia nading a kal teitei ciengun amau’ kikona in a zozaw ta hi.

²⁴ Tuaci’n Pilat in a ngetna uh banga pieh dingin thu a khen hi.

²⁵ Ama in amau’ nget ahi kumpi langpanna le mi thana zieha thongkia pa hla a, amau’ dei banga a bawl dingun Jesu a pie hi.

Jesu, Singlamte Tunga a Kikhaina

²⁶ Amate in ama a peikhietpi laitahun khuota pana ang pei Cyrene khuomi, Simon a kici pa khat a man vua, tuale singlamte patin Jesu’ nua lamah a puosah uhi.

²⁷ Mihon tampi in ama a zui vua, tuate lahah a awm uh bengin ama a kaa numei pawlkhat zong kihal hi.

²⁸ Ahi vangin Jesu kinua hei-in amate kungah, “Jerusalem tanute aw, kei adingin kap sih unlen, noma ading le na tate adingin kapzaw un.

²⁹ Azieh pen amate in, ‘A ciing, ta nei ngai lo naubu, le nausen in a tep ngai lo nawite hampha mama hi,’ a ci ding uh nite ang tung valon ding hi.

³⁰ Tua hun ciengin amate in muol sangte kungah, ‘Ka tung vuah hing cim ta un,’ a ci ding vua, muoltangte kungah, ‘Ei vuacip ta un,’ a ci ding uhi.

³¹ Azieh pen amate in singhing bawn hici bawl uh ahileh a gaw ciengin bang a law ta bep ding vuoi?” a ci hi.

³² Migi lo ahi adang mi ni zong Jesu tawh thaton dingin a peipi uhi.

³³ Lugu a kicina munah a tun ciengun amate in khum sungah Jesu a khailia vua, migi lo ni tegel zong a zietlamah khat, a veilamah khat a khailia uhi. (

³⁴ Tua ciengin Jesu in, “Pa aw, amate in bang bawl ci thei lo uh ahi ziehin a mawna uh na maisah in,” a ci hi.) Tuale amate in lai-ai sanin a puonte a hawm uhi.

³⁵ Mipite dingin a en uhi; ahi vangin upate in a zako vua, “Ama in midangte hundam hi; Pasien’ Messiah le a teel pa tahtah ahile ama le ama kihundam taheh!” a ci uhi.

³⁶ Galkapte in zong ama zako-in lengga tuithua a pie vua,

³⁷ “Judah-te’ Kumpipa na hi leh nang le nang kihun in!” a ci uhi.

³⁸ A lutung son tahah, “Tampa Judah-te’ Kumpipa ahi hi,” ci-a kigiel lai khat kisuong hi.

A Kisia Guta Pa

³⁹ Khum sunga a kikhai migilote lahah khat in, “Nang Messiah hi lo na mah? Nangma kihun inlen, ko zong ei hun in,” ci-in ama a simmaw ho hi.

⁴⁰ Ahi vangin adang khat in, “Ama tawh kibanga mawna thukhenna thuoh hi napi cin, Pasien na giing sih amah?

⁴¹ Ei gel pen a man banga thu ei kikhen ahi a, i gamtatna tawh kituoha thaman nga i hi hi, ahi vangin tampa in khielna bangma bawl lo hi,” ci-in a phawhsie hi.

⁴² Tua ciengin ama in, “Jesu aw, na kumpi gam sunga nang pei ciengin kei ei mangngil sin,” a ci hi.

⁴³ Jesu in, “A tahtah a kang ci-in, tuni-in keima tawh Paradise ah i omton ding hi,” a ci hi.

Jesu Sina

⁴⁴ Tua hunlaitah pen sunkim pawl hi a, nitah nai thum dongin gam buppi ah khuo a miel hi.

⁴⁵ Tua hun sungin khimzing a, biehinnpi dalna puon phal ni kisuo hi.

⁴⁶ Tua ciengin Jesu in, “Pa aw, na khut sungah ka hlagau kang ap ta hi,” ci-in a aw neiza tawh a kiko hi. Tua bang a ci zaw ciengin a hu tawpna a sang hi.

⁴⁷ Galkapmangpa in thupieng teng a mu ciengin Pasien’ min phatin, “Tam pa pen mawnei lo tahtah khat ahi hi,” a ci hi.

⁴⁸ Tam thute en dingin a kikhawm mipite in thupieng teng a mu ciengun awmbengsa-in inn ah a kilekia uhi.

⁴⁹ Ahi vangin a melthei zosie le Galilee gam pana a zui numeite ding to-in thupieng teng a gal-et uhi.

Jesu a Kivuina

⁵⁰ Khumin Joseph kici mi hoi le mi thuman khat om a, vaihawm upa khat ahi vangin,

⁵¹ vaihawm upate’ deina le a sil bawlte uh a thukimpi sih hi. Ama pen Jew mite’ khuo Arimathea pana ang pei ahi a, Pasien’ manggam lawptaha a ngah den mi khat ahi hi.

⁵² Pilat kungah ama pei-in Jesu luong a ngen hi.

⁵³ Tua ciengin ama in a luong a khiesuh a, taangciin puon tawh tunin koima’ kivui ngai nai lona suong kilemsa han khatah a siel hi.

⁵⁴ Khum ni pen kigin ni ahi a, sabbath kipan ding ahi ta hi.

⁵⁵ Galilee panin a zawpi numeite in zong a zui vua, amate in han le a luong bangci kivui ci a mu uhi.

⁵⁶ Tua ciengin amate kinuale kia-in panamtui le sathaute a baisa-in a koi uhi. Thukham dung zui-in sabbath ni-in amate a toi-om uhi.