Luke 19 - Zo Bible

Jesu le Zacchaeus

¹ Jericho khuo ah Jesu lutin a peisuoh hi.

² Tua sungah Zacchaeus kici siehdong uhpa khat om a, ama a hau mama hi.

³ Tuapa in Jesu mu nuom mama a, ahi vangin ama mi tuntom khat ahina zieh le mihon a tam seng ziehin a mu zo sih hi.

⁴ Tuaci’n ama na matai a, Jesu a mu thei nadingin lampi gei-a theitheh kung tungah na ka hi, azieh pen ama tua lampi zui ding ahi hi.

⁵ Khumi munah Jesu a tun ciengin khuodah to-in ama kungah, “Zacchaeus aw, mallangin hing kumsuh in; azieh pen tuni-in na inn ah kang tung ding hi,” a ci hi.

⁶ Tuaci’n Zacchaeus zong kumsuh pai bingbiengin kipahtahin a tungsah hi.

⁷ Amate zosie in tam thu a mu ciengun, “Mawnei khat’ inn ah zin tung dingin a pei hi,” ci-in ama a phunsan uhi.

⁸ Khum munah Zacchaeus dingto a, Topa kungah, “Topa, en in, ka neisa alang mizawngte ka pie ding hi; solna tawh mi khatpo’ neisa ka lahpieh a op leh a za li-in ka lokia ding hi,” a ci hi.

⁹ Tua ciengin Jesu in ama kungah, “Ama zong Abraham suonlehlahte khat ahi ziehin, tuni-in tami inn ah hutdamna a tung zo hi.

¹⁰ Azieh pen a mangthai mite sui ding le a hundam dinga Mihing Tapa ang pei ahi hi,” a ci hi.

Sum Pound Sawm Thugentena

¹¹ Jerusalem ah Jesu a tung dihtah a, amate in Pasien’ manggam ang tung pai dingin ngaisun uh ahi ziehin, a thugente a na ngai laitahun ama in a ban zomin thugentena khat a gen hi.

¹² Tuaci’n mi thupi khat in kumpi thuneina a nga nadingin a gamlapi-a om gam khatah a pei zaw ciengin a kilekia hi.

¹³ Ama in a silate mi sawm hlanin sumtang pound sawm pie-in amate kungah, “Kang tunkia masangsie tam teng tawh summet na bawl un,” a ci hi.

¹⁴ Ahi vangin a gammite in ama a muda ziehun ama’ nua-ah kamtai khat a sawl vua, ‘Kote ei uh dingin tam mipa ka dei sih uhi,’ a cisah uhi.

¹⁵ Kumpi thuneina ngasa-in a kilekia ciengin, amate tungah a sum apsa silate in summet bangza nga uh ahei, ci a thei nadingin ama kungah a hlansah hi.

¹⁶ A masa pen pa a mai-ah pei-in, ‘Topa aw, nei sum pieh pound khat in pound sawm metsah hi,’ a ci hi.

¹⁷ Ama in, ‘Hoi sep cie, Sila hoi aw! Thu neuno khatah muonhuoi na hi ziehin khuopi sawm uh in,’ a ci hi.

¹⁸ Tua ciengin a nina pa pei-in, ‘Topa aw, nei sum pieh pound khat in pound nga metsah hi,’ a ci ciengin,

¹⁹ Ama in tuapa kungah, ‘Tuale nang in khuopi nga uh in,’ a ci hi.

²⁰ Tua ciengin adang khat pei-in ama kungah, ‘Topa aw, tam sungah na pound a om hi. Puonthem khat tawh tua sum ka tun hi,

²¹ azieh pen nang mi genhapi khat na hi ziehin na khol lopi na la a, na tu lopi zong na at hi, tua ahi ziehin nang kang giing hi,’ a ci hi.

²² Ama in tuapa kungah, ‘Nang a gilo silapa aw, na kamham ma tawh thu kang khen ding hi! Kei pen mi genha khat ka hi a, ka khol lona munah la-in ka tu lona-ah ka at lam nei thei amah?

²³ Tua banga ei thei na hi leh bang dingin sumkholna-ah tua sumte na koi lo na hei? Tua hileh kei kang peikia ciengin ka sumpi a met tawh ka nga ding hi,’ a ci hi.

²⁴ Ama in a gei-a dingte kungah, ‘Ama kung panin pound khat la unlen, pound sawm a neipa pie un,’ a ci hi.

²⁵ (Tuale amate in tuapa kungah, ‘Topa aw, ama in pound sawm nei zo ta!’ a ci uhi.)

²⁶ ‘Ke’n kang ci-in, a neite kipiehbe ding a, ahi vangin bangma nei lote tung panin a neisun nangawn uh kilahpieh ding hi.

²⁷ Ahi vangin amate tungah kumpi sem dinga ei dei lo ka galte tawh kisai-in amate tam sungah hing peipi unlen, keima muna-ah amate that un,’ ci hi,” a ci hi.

Jerusalem ah Jesu Guolzawna tawh a Lutna

²⁸ Ama in tam thu teng a gen zaw ciengin na mapei-in Jerusalem zuonin a peito hi.

²⁹ Olive a kici mun a om Bethphage le Bethany khuo a tun kuon ciengin ama in a nuazuite ni sawl a,

³⁰ “Na mai vua khuo ah pei unlen, khuo sung na lut ciengun koima’ tuon ngai nai lona laano khau-a kikhi khat na mu ding uhi. Hing sut unlen tanah hing kai ta un.

³¹ Mi khatpo in, ‘Bang dinga na sut uh ahei?,’ ci-a ang dawh uleh, ‘Topa in tulmaw hi,’ ci-in dawng un,” a ci hi.

³² Tuaci’n a mi sawlte pei-in a gen bangin a mu uhi.

³³ Amate in laano khau a sut laitahun a neite in, “Bang dinga laano khau na sut uh ahei,” ci-in a dong uhi.

³⁴ Amate in zong, “Topa in tulmaw hi,” a ci uhi.

³⁵ Tua ciengin Jesu kungah laano a peipi uhi; tua laano tungah a puon uh a pha zaw ciengun Jesu a tuongsah uhi.

³⁶ Laano tung tuongin lampi-ah Jesu a pei laitah in mite in lampi tungah a puonte a pha uhi.

³⁷ Olive Muol panin kumsuhna mun a tun kuon ciengun, nuazui mihonpite in a mu ngaisa uh vanglietna nasep zosiete ziehin kipahtahin awging tawh Pasien phat ding a kipan vua,

³⁸ amate in, “Topa’ min tawh ang pei kumpipa in thupha nga taheh! Vantungah kilemna om hinlen, a sang pen munah minthanna om taheh!” a ci uhi.

³⁹ Mihonpite lahah Pharisee-te pawlkhat in Jesu kungah, “Siepa, na nuazuite khawlsah in,” a ci uhi.

⁴⁰ Ama in, “Ke’n kang ci-in, tam mite ham lo-a a sip uleh suongte kiko ding uhi,” ci-in a dawng hi.

Jerusalem ading Jesu Kap

⁴¹ Jerusalem a tun kuon, khuopi a mu ciengin ama in tua khuopi kaa a,

⁴² “Nang nangawnin tuni-in kilemna a piengsah theite thei lacin izaw! Ahi vangin tu-in na mu lo nadingun tuate kiselin a om hi.

⁴³ Na kimkotah na galte in kul bawlin hing imtawmin, mun zosie panin ang bume ding hun ang tung ding hi.

⁴⁴ Amate in nang le na kulpi sunga na tate tuoldenna-in ang nei ding vua, na sunga suong khat beh zong a kiciengsa-in a nuasie sih ding uhi; azieh pen note in Pasien kung pan ang kivilna hun na phawkhah lo zieh uh ahi hi,” a ci hi.

Jesu in Biehinnpi Siensuo

⁴⁵ Tua ciengin biehinnpi sungah Jesu lutin khum sunga om vanzuate a notmang hi.

⁴⁶ Tuale ama in, “Ka inn in thungetna inn kici ding hi,” ci-in kigiel hi. Ahi vangin note in misuomte kibuhna phuolpi na suohsah ta uhi,” a ci hi.

⁴⁷ Ama in nisielin biehinnpi sungah thu hil a, siempu liente, laihil siete le mipi makaite in tha dingin a sui den uhi.

⁴⁸ Ahi vangin amate in a thugente lunglut tahin a ngai ziehun bangma a law thei sih uhi.