Luke 11 - Zo Bible

Topa’ Thungetna

¹ Khatvei ama in mun khatah thungen a, a man ciengin a nuazuite lahah khat in, “Topa, John in a nuazuite thunget dan ding a hil bangin ko zong ei hil in,” a ci hi.

² Ama in amate kungah, “Thu na nget ciengun tam bangin na ngen un: Pa aw, na min siengtho kizatat taheh. Na gam hing tung taheh.

³ Nisim ka neh ding uh an ei pie in.

⁴ Ko tunga ang mawte ka maisah bangun ka mawnate uh ei maisah in. Solna ei thuohsah sin,” a ci hi.

Thungetna ah Thuohzawhna

⁵ Ama in amate kungh, “Note lahah khat in lawm khat nei-in zankim laitahin ama kungah pei-in, ‘Lawm aw, anlum thum ei leitawi in;

⁶ azieh pen ka lawmpa khat a khuolzinna panin ang tung a, a mai-a lui ding bangma ka nei sih hi,’ a ci hi.

⁷ Tuaci’n inn sung panin ama in, “Ei buoisah sin; kot ka khah zo ta vua, ka tate tawh ka lum zo ta uhi; kei hing tho-in bangma kang pie thei sih hi,” a ci hi.

⁸ Ke’n kang ci-in, tuapa a lawmpa ahi ziehin ama tho-in bangma khat nangawn a pieh lo vangin a nget paupau ziehin ama tho-in a kisap teng pie veve ding hi.

⁹ “Tuaci’n ke’n kang ci-in, ngen un, ang kipie ding hi; sui un, na mu ding uhi; kiu un, kot ang kihon ding hi.

¹⁰ Bangzieh ahei cile a ngen tapo in nga a, a sui tapo in mu-in, a kiu tapo kot kihon ding hi.

¹¹ Note lahah na tapa un nga ngen leh tuami tangin gul a pie ding koi om na hi uh ahei?

¹² Ahi sihle na tapa un aatui ngen leh mom-ai na pie ding uh amah?

¹³ Tua ahile no migilote in na tate uh na hoi pieh dan ding thei na hi uleh tua sangin vanah a om na Pa un ama kunga a ngen mite tungah Hlagau Siengtho a pie zaw kan sih ding amah!” a ci hi.

Jesu le Beelzebul

¹⁴ Khatvei Jesu in a ham thei lo dawi khat a deldawh hi; tua dawi a pusuo ciengin a ham thei lo mipa ham thei pai a, mihonpi in lamdang a sa mama uhi.

¹⁵ Ahi vangin amate lahah mi pawlkhat in, “Dawite’ mangpa Beelzebul’ min tawh dawite a deldawh hi bo,” a ci uhi.

¹⁶ Pawlkhatte leuleu in a ze-etna-un vantung panin lim khat a ngen uhi.

¹⁷ Ahi vangin Jesu in a ngaisutna uh thei a, amate kungh, “Ama le ama kido a, a kikhenkeh gam khat popo mangthai ding a, innkuon khat zong a sunga om mite a kikhenkeh leh a pua ding hi.

¹⁸ Satan zong ama le ama kido-in kikhenkeh leh a gam bangci kip thei ding ahei? Bang ding ahei cile note in Beelzebul suonga dawite a deldawh hi bo nei ci uhi.

¹⁹ Beelzebul suonga dawite deldawh ka hi leh dawi hawlkhie theite in koi’ min suonga a deldawh uh ahei? Tua ahi ziehin amate pen na tung vua thukhente ahi ding uhi.

²⁰ Hizongle dawite ka hawlkhietna pen Pasien’ khutme hang tawh ahile note tungah Pasien’ manggam ang tung zo ahi ta hi.

²¹ Mi thahat khat in galhiem bukim tawh a inn a cin ciengin a neisate bihtahin a om hi.

²² Ahi vangin ama sanga a thahatzaw mi khat in ama bulu-in a zawgawp ciengin ama’ muon a galhiemte lahpiehin a vanlah teng a hawmthang hi.

²³ Kei ei panpi lo poma kei ei do hi a, kei ei khoppi lo poma a thethang ahi hi.

Hlabua a Lutkiana

²⁴ “Mi khat sung panin hlabua a pusuo zaw ciengin, khawl nading mun sui dingin tui op lona gamte-ah vah kawikawi a, a mu zawh lo ciengin ama in, ‘Ka peikhietna inn ma-ah kilekia vang,’ a ci hi.

²⁵ Ama a tun ciengin tua inn na kiphiet siengin a kipuo sinsenin a op a mu hi.

²⁶ Tua ciengin ama pei-in ama sanga a gilozaw hlagau dang sagi zawpi a, tua inn ah lutin a teng uhi; tua mipa pienzie pen a masa lai sangin siehuoizaw hi,” a ci hi.

A tahtah Thupha Ngana

²⁷ Ama in tami thu a gen laitahin mipi lahah numei khat kiko a, “Ang paai gil le na tawp nawi pen thupha nga ahi hi,” a ci hi.

²⁸ Ahi vangin ama in, “Pasien’ thu za-a a zui mite hampha zaw uhi,” a ci hi.

Jonah’ Lim

²⁹ Mihonte a tam semsem ciengin ama thugen kipan a, “Tam khang mite pen a gilo khang mite ahi uhi; amate in lim khat a ngen uhi, ahi vangin Jonah lim longal bangma lim kipie lo ding hi.

³⁰ Nineveh khuomite adingin Jonah pen lim khat ahi ma bangin mihing Tapa zong tami khang mite adingin lim khat hi ding hi.

³¹ Thukhen ni ciengin leitaw lam gam pana ang pei kumpinu in tami khang mite langkhatah dingin a mawsah ding hi, azieh pen Solomon pilna thu ngai dingin leimong khat panin ama a kuon hi, en in tam sungah Solomon sanga a lienzaw khat a om hi.

³² Thukhen ni ciengin tami khang mite langkhatah Nineveh khuomite dingin a mawsah ding uhi, azieh pen Jonah’ thugenna ziehin amate a kisiakia uhi, en in, tam sungah Jonah sanga a lienzaw mi khat a om hi, a ci hi.

Pumpi Khuovah

³³ “Koima in meivah a vah zaw ciengin mun kawmah koi loin a sunga lut mite in khuovah a mu thei nadingin meivah tunna tungah koizaw hi.

³⁴ Na mit pen na pumpi adingin meivah ahi hi. Na mit uh a ciim leh na pumpi uh khuovah tawh kidim ding a, na mit uh a hoi sih leh na pumpi uzong khuomiel tawh kidim ding hi.

³⁵ Tua ahi ziehin na sung vua om khuovah a miel lo nadingin pilvang un.

³⁶ Tua ciengin na pumpi zosie uh khuovah tawh kidim a, a mielna mun khat zong a op sih leh, khuovah in note ang tanvah ma bangin na pumpi uh ang tangkim ding hi,” a ci hi.

Jesu in Pharisee-te le Thukham Hil Siete Mawsah

³⁷ Thu a gen laitahin Pharisee-te khat in ama an nehpi dingin hlan a, tuaci’n ama zong pei-in an ne dingin sabuoi ah a to hi.

³⁸ Ama in khut sil masa loin an a neh lam Pharisee pa in a mu bepin lamdangsa mama hi.

³⁹ Tua ciengin Topa in ama kungah, “No Pharisee-te in hai le kuongte a pulam na nawt sieng zemzom vua, ahi vangin na sung lam uh huoihamna le gitlona tawh a kidim hi.

⁴⁰ No mimaw lawmte! a pulam a bawlpa in a sunglam zong bawl hi lo amah?

⁴¹ Tuaci’n a sung lama om nate mizawngte na pie un; tua hile note adingin na zosie a siengtho ding hi.

⁴² “No Pharisee-te in gimna na thuoh ding uhi! Azieh pen note in masala, lengmusel le ante lohing namkim tungah sawm-ah-khat na pie vua, ahi vangin thutang le Pasien itna na don vanuh sih uhi; adangte zong nelsie tuon loin tamte na bawl ding uh ahi hi.

⁴³ No Pharisee-te in gimna na thuoh ding uhi! Bangzieh ahei cile kikhopna inn sungah topha nuompen na dei vua, vanzuana munte-ah zatah hopi ding na dei uhi.

⁴⁴ Note in gimna na thuoh ding uhi! Azieh pen mite in a thei lo ziehun a tungah lamhlahna-a a nei uh, ciemtena a om lo hankhuhte tawh na kibang uhi.

⁴⁵ Thukham hil siete lahah khat in, “Siepa, tam bang na gen ciengin ko zong ei gensie na hi hi,” ci-in a dawng hi.

⁴⁶ Tuale ama in, “No thukham hil siete in zong gimna na thuoh ding uhi! Azieh pen mi puoh zawh lo ding vangih na suon vua, tua van a puohpi dingin note in lah na khutme uzong na lamto nuom sih uhi.

⁴⁷ Note in gimna na thuoh ding uhi! Azieh pen na pu na pate un a na tha kamsangte’ han na lampieh uhi.

⁴⁸ Tuaci’n note na hi ule na pu na pate uh’ gamtatnate a thukimpi, a tecite na hi uhi; bangzieh ahei cile amate in kamsangte a na that vua, note in amau’ han na lampieh uhi.

⁴⁹ Tua ahi ziehin Pasien’ pilna laibu in zong, ‘Amate kungah kamsangte le sawltahpite ka sawl ding a, amate in tua mite pawlkhat bawlsie-in that ding uhi,’ a ci hi.

⁵⁰ Tuaci’n amate in leitung piencil a kipanin a na luonsah uh kamsang zosiete’ sisan,

⁵¹ Abel’ sisan a kipanin maitam le mun siengtho kikala a na tha uh Zechariah’ sisan dong, tami khang mite tungah ka phulkia ding hi. Ahi hi, ke’n kang ci-in, tami khang mite tungah ka phulkia ding hi.

⁵² No thukham hil siete in gimna na thuoh ding uhi! Azieh pen note in theina tawhtang na ladawh vua, note lah lut loin a lut dingte lah na khahtan vanuh uhi,” a ci hi.

⁵³ A pulamah ama a pei ciengin thukham hil siete le Pharisee-te in langbawl kipanin thukhel tampitah a dong vua,

⁵⁴ a kamham tung panin mawmat ding sui-in a buhdap uhi.