Kilaakna 7 - Zo Bible

A Kiciemtesa Israel Mi 144,000

¹ Tam zaw ciengin leitung kiuli-a a ding vantungmi li ka mu a, amate in leitung, tuipi tung, le singkung khatpo a mutmang zo lo nadingin tua leitung hui lite a tukon uhi.

² Nisuona lam panin a hingzing Pasien’ ciemtena a nei vantungmi adang khat ang kato ka mu a, ama in leitung le tuipi a suhsiet thei nadinga vanglietna kipiesa vantungmi lite nahpi tahin hlan a,

³ amate kungah, “I Pasien nasemte’ talpang tungah ciemtena i khet zo masangsie leitung, tuipi, le singkungte susie nai sih un,” a ci hi.

⁴ Tuale cieptesa mi phaza a kisim ka za a, Israel mi nam zosie sung panin mi tul za le tul sawmli le tul li cieptesa ahi hi:

⁵ Judah be panin tul sawm le tul ni, Reuben be panin tul sawm le tul ni, Gad be panin tul sawm le tul ni,

⁶ Asher be panin tul sawm le tul ni, Napthtali be panin tul sawm le tul ni, Manasseh be panin tul sawm le tul ni,

⁷ Simeon be panin tul sawm le tul ni, Levi be panin tul sawm le tul ni, Issachar be panin tul sawm le tul ni,

⁸ Zebulun be panin tul sawm le tul ni, Joseph be panin tul sawm le tul ni, Benjamin be panin tul sawm le tul ni kiciemte hi.

Minam Zosie panin Mihonpi

⁹ Tam zaw ciengin ka khuodah leh mi namcin, be namcin, micin, le ham namcin panin koima’ simzawh lo mihonpi in puonpaa silin, a khut sung vuah lutu na a tawi vua, tuaci’n kumpi topha mai le Tuuno mai-ah a ding uhi.

¹⁰ Nahpi tahin amate awngin, “Hutdamna khu kumpi topha tunga a to i Pasien ule Tuuno-a’ ahi hi!” a ci uhi.

¹¹ Kumpi topha, upate, le ganhing lite kimvela a ding vantungmi zosie in kumpi topha mai-ah kunin Pasien a bie vua,

¹² “Amen! I Pasien uh tungah minthanna, pilna, lungdam kona, patawina, vanglietna, le hatna om den tawntung taheh! Amen” ci-in la a sa uhi.

¹³ Tua ciengin upate khat in, “Tami puontuol paa silte koite hi a, hei pana hing pei uh ahei?” ci-in ei dong hi.

¹⁴ Keima in, “Siepa aw, a thei nang na hi hi,” ka ci hi. Tua ciengin ama in keima kungah, “Tam mite pen gimna lienpi pana ang pei ahi uhi; amate in a puontuolte uh Tuuno sisan sungah sawp siengin a paasah zo uhi.

¹⁵ Tami ziehin amate Pasien’ topha mai-ah a om vua, sun le zanin a biehinnpi sungah ama’ na a sem uhi. Kumpi topha tunga a to pa in amate a dal ding hi

¹⁶ Amate gilkiel ngai nawn loin, zong dangta ngai nawn lo ding uhi; nisa in zong ka ngai nawn lo ding hi.

¹⁷ Bangzieh ahei cile kumpi topha laikima om Tuuno khu amate a cing pa hi ding a, hinna tuinah ah amate a peipi ding hi. Tuale Pasien in a mittang panun hlitui zosie a nulsieng pieh ding hi,” ei ci hi.