Joshua 21 - Zo Bible

Levi-te Kipie Khuopite

¹ Tua ciengin siempu Eleazar, Nun tapa Joshua, le Israel minam innkuon lutangte kungah Levi innkuon lutangte a va pei vua;

² Canaan gam Shiloh muna om amate kungah, “Ka ten nading uh khuopite le ka ganhonte vua dingin Moses tungtawnin a lonona gamte tawh ko ei kipieh ding Topa in thu pie zo hi,” a ci uhi.

³ Tuaci’n Israel-te in Topa’ thupiehsa bangin amau’ gouluo gamte sung panin Levi-te tungah a nei-a khuopite le lonona gamte a pie uhi.

⁴ Kohath innkuonte dingin aisan tung hi. Tuaci’n siempu Aaron’ suonlehlah ahi Levi-te in Judah, Simeon, le Benjamin minamte tung panin aisanna tawh khuopi sawm le thum nga uhi.

⁵ A omlai Kohath-te in Ephraim minam, Dan minam, le Manasseh minam alangte tung panin aisanna tawh khuopi sawm nga uhi.

⁶ Gershon-te in Issachar minam, Asher minam, Naphtali minam, le Bashan gam sunga om Manasseh minam alangte tung panin aisanna tawh khuopi sawm le thum nga uhi.

⁷ Merari-te in amau’ innkuon tawh kizui-in Reuben minam, Gad minam, le Zebulun minamte tung panin khuopi sawm le ni nga uhi.

⁸ Topa in Moses tungtawnin a thupiehsa bangin Israel-te in Levi-te tungah aisanna tawh tam khuopite le a lonona gamte a pie uhi.

⁹ Judah minam le Simeon minam sung panin a min kigiel tua khuopite a pie vua,

¹⁰ amate tungah aisanna a tuh masah ziehin Levi-te ahi Kohath innkuon sung panin Aaron’ suonlehlahte tungah tuate tung hi.

¹¹ Amate in Judah muoltung gama Hebron a kici Kiriath-arba, (Arba pen Anak’ pa ahi hi) le a kimvela lonona gamte tawh a pie uhi.

¹² Ahi vangin tua khuopi’ lote le a khuoneute pen Jephunneh’ tapa Caleb tungah a nei dingin kipie zo hi.

¹³ Amate in siempu Aaron’ suonle hlahte tungah mi thatte dinga kibuhna khuopi Hebron a lonona gamte tawh, Libnah a lonona gamte tawh,

¹⁴ Jattir a lonona gamte tawh, Eshtemoa a lonona gamte tawh,

¹⁵ Holon a lonona gamte tawh, Debir a lonona gamte tawh,

¹⁶ Ain a lonona gamte tawh, Juttah a lonona gamte tawh, Beth-shemesh a lonona gamte tawh, tam minam nite sung panin khuopi kuo a pie uhi.

¹⁷ Benjamin minam sung panin Gibeon a lonona gamte tawh, Geba a lonona gamte tawh,

¹⁸ Anathoth a lonona gamte tawh, Almon a lonona gamte tawh, khuopi li a pie uhi.

¹⁹ Aaron suonlehlahte’ khuopite, a siempute a unpi-in khuopi sawm le thum le a lonona gamte tawh ahi hi.

²⁰ Levi-te innkuon sung panin Kohath be ahi a omlai Kohath-te tungah a kipie khuopite pen Ephraim minamte-a’ sung pan ahi hi.

²¹ Ephraim muoltung gama om khuopite sung panin mi thatte adingin Shechem a lonona gamte tawh, Gezer a lonona gamte tawh,

²² Kibzaim a lonona gamte tawh, Bethhoron a lonona gamte tawh, khuopi li amate kipie hi.

²³ Dan minam sung panin: Elteke a lonona gamte tawh, Gibbethon a lonona gamte tawh,

²⁴ Aijalon a lonona gamte tawh, Gath-rimmon a lonona gamte tawh, khuopi li kipie hi.

²⁵ Manasseh minam alangte sung panin: Taanach a lonona gamte tawh, Gath-rimmon a lonona gamte tawh, khuopi ni kipie hi.

²⁶ Kohath innkuon a omlai mite gouluo nga khuopite a unpi-in a lonona gamte tawh khuopi sawm ahi hi.

²⁷ Levi innkuon sunga om Gershon-te tungah mi thatte kibuhna khuopi dingin Manasseh minam alangte gouluo nga sung panin Bashan gam sunga om Golan khuopi le a lonona gamte tawh, Beeshterah khuopi a lonona gamte tawh, khuopi ni kipie hi.

²⁸ Issachar minam sung panin: Kishion-a lonona gamte tawh, Daberath a lonona gamte tawh,

²⁹ Jarmuth a lonona gamte tawh, En-gannim a lonona gamte tawh, khuopi li kipie hi;

³⁰ Asher minamte sung panin Mishal a lonona gamte tawh, Abdon a lonona gamte tawh,

³¹ Helkath a lonona gamte tawh, le Rehob a lonona gamte tawh, khuopi li kipie hi.

³² Naphtali minamte sung panin: mi thatte kibuhna khuopi dingin Galilee gam sunga om Kedesh a lonona gamte tawh, Hammoth-dor a lonona gamte tawh, Kartan a lonona gamte tawh, khuopi thum kipie hi.

³³ Gershon-te’ innkuon tuomtuomte’ khuopite a unpi-in sawm le thum le a lonona gamte tawh ahi hi.

³⁴ Levi mi a omlai Merari innkuonte tungah, Zebulun minam sung panin: Jokneam a lonona gamte tawh, Kartan a lonona gamte tawh,

³⁵ Dimnah a lonona gamte tawh, Nahalal a lonona gamte tawh, khuopi li kipie hi.

³⁶ Reuben minam sung panin: Bezer a lonona gamte tawh, Jahaz a lonona gamte tawh,

³⁷ Kedemoth a lonona gamte tawh, Mephaath a lonona gamte tawh, khuopi li kipie hi.

³⁸ Gad minam sung panin: mi thatte adingin kibuhna khuopi Ramoth le a lonona gamte tawh, Mahanaim a lonona gamte tawh,

³⁹ Heshbon a lonona gamte tawh, Jezar a lonona gamte tawh, a unpi-in khuopi li kipie hi.

⁴⁰ Levi innkuon a omlai ahi Merari innkuon tuomtuomte ading khuopi kipiete a unpi-in sawm le ni ahi hi.

⁴¹ Israel-te’ gouluo lahah Levi-te’ khuopi a unpi-in a lonona gamte tawh sawm li le giet ahi hi.

⁴² Tam khuopite in a kimvel vuah lonona gam a nei ciet uhi; tami khuopi zosie zong tua bang ahi hi.

⁴³ Tam bangin Topa in amau’ pu le pate tungah pieh dinga a na ciemsa leitang zosie Israel tungah pie a, amate in tua gam luo-in tua munah a teng uhi.

⁴⁴ Tuale a pu a pate tungah a ciemsa bangin sil bangkimah Topa in amate a lungmuongsah hi; Topa in amau’ khut sungah a gal zosie uh a pieh ziehin a galte uh khat beh in amate nang zo lo hi.

⁴⁵ Topa in Israel-te tunga a ciemsa thuhoi zosie khat beh a pelem om lo hi; a unpi-in tangtung kim hi.