Joshua 2 - Zo Bible

Jericho ah Thukante Kisawl

¹ Tua ciengin Nun’ tapa Joshua in Shittim panin thukan ding mi ni sawl a, “Pei-in gam va en ta unlen, a diehdiehin Jericho khuo va en ta un,” a ci hi. Ama gel zong pei pai-in Rahab kici numei pahtat khat’ inn ah tungin a gieh uhi.

² Jericho kumpipa kungah, “Gam sung en dingin Israel-te pawlkhat tuzanin ang tung hi,” ci-in kigen hi.

³ Tua ciengin Jericho kumpipa in Rahab kungah mi sawl a, “Na inn sunga ang tum, na kunga ang tung mite hing peipi in. Azieh pen gam buppi thu a kandap dinga ang pei uh ahi hi,” a ci hi.

⁴ Hizongle tua numei in mi nite la-in a phuoldap hi. Tua ziehin ama in, “Hima hi, tua mite ka kungah ang pei ma uhi, ahi vangin hei sung pana hing kipan gel ahei ka thei sih hi.

⁵ Kulkotpi a kikha hun khuomiel ciengin tua mite a peikhie uhi. Tua mite hei lam manaw gel ahei ci zong ka thei tuon sih hi. Ama gel del meng un, azieh pen na pha lai ding uhi,” a ci hi.

⁶ Ahi vangin ama in innkhum zangah tua mite peipi to-in butu kung a lomloma kikoina munah a phuol hi.

⁷ Tuaci’n mite in Jordan lamah tanmun dong delin a delte a peikhiet zaw lienun kulkotpi kikha pai hi.

⁸ Ama gel a lup masangin innkhum zanga a kung vuah Rahab kato a, tua gel kungah,

⁹ “Topa in tam leitang note ang pie zo hi, ci ka thei a, tuaci’n kang giing mama vua, tam gam sunga teng mi zosie zong na mai vuah a zausi sieng uhi.

¹⁰ Bangzieh ahei cile Egypt panin nang peikhiet lai-un Topa in na mai vuah San Tuipi a kansahna le Jordan galkhata om Amor-te’ kumpi nite ahi Sihon le Og tungah na bawlnate uh ka za zo uhi.

¹¹ Tam thu ka zah behun ka lungkie vua, note ziehin a koimapo tungah hanna kici a om ta sih hi. Topa na Pasien uh pen tunglam van le neilam leitung Pasien ahi hi.

¹² Tua ciengin tu-in na tung vua kang dih gamtat bangin no zong ko innkuon tungah nang dihtat nadingun, Topa’ minin ka kungah hing kiciem unlen ciemtena dihtah khat ei pie un.

¹³ Ka nu le ka pa, ka sanggam pasalte, ka sanggam numeite, le amate tawh a kisai zosie ei hinkhawi pieh unlen, sina panin ka hinna uh ei hunkhie un,” a ci hi.

¹⁴ Ama gel in tua nu kungah, “Nangma’ hinna khu kogel’ hinna ahi hi! Tami ka nasep uh nei sawmsiet sih po nah leh Topa in ko tungah tami leitang ei pieh ciengin na tungah migitah le muonhuoi tahin kang gamta ding uhi,” a ci uhi.

¹⁵ Tua ciengin Rahab in tawlet panin khauhuol tawh ama gel a khiesuh hi, bang ding ahei cile ama’ inn pen khuopikul pulam panga kilam ahi a, khuopikul sungah ama a teng hi.

¹⁶ Tua nu in ama gel kungah, “Muol tung lam zuonin pei ta gel in, tua hile ang nuadelte tawh na kituoh sih ding gel hi. Ang delte ang kilekia masangsie tua munah ni thum sung kiphuol gel in; tua ciengin na pei nading vuah na pei thei ding uhi,” a ci hi.

^17-18 Mite in tua nu kungah, “Tam gam kang sim vua, nei khaisuhna tami tawlet-ah tam khauhuol san na na khi sih a, na inn sunga na nu le na pa, na sanggam pasalte, le na innkuonpi zosie na na khop sih leh, na tunga nei kiciemsah tami kiciemna panin ka peng ding uhi.

¹⁹ Na inn sung kotkhah panin mi khatpo pusuohin lam dungah a vahkawi a, sina a tuo leh ama’ sina tungtangah ama in maw puo ding a, ko maw ka peng ding uhi; ahi vangin inn sunga na ompi uh mi khatpo tungah a khut hlangkha ang op leh ama sina tungtangah maw ka puo ding uhi.

²⁰ Hinanle tu-a kogel’ nasepnate nei gen leh nei kiciemsah tam kiciemna panin ka peng ding uhi,” a ci uhi.

²¹ Ama in, “ Na gen bang gelin hi taheh,” a ci hi. Tua ciengin ama in tua gel a sawl dawh a, ama gel a pei ta uhi. Tua ciengin ama in tawlet-ah khauhuol san a khi hi.

²² Ama gel dingkhie-in muol tung lamah a pei vua, a delte a kilekia masangsie-in khum munah ni thum sung a om uhi. A delte in lam tungtawnin a sui vua, bangma a mu sih uhi.

²³ Tua ciengin muol tung panin mi nite a kumsuhkia uhi. Ama gel zong galkai-in, Nun’ tapa Joshua kung a tung uhi; a tung vua a pieng zothu sie a gen uhi.

²⁴ Ama gel in Joshua kungah, “ Topa in leitang zosie i khut sungah ei pie tahtah zo hi; tua tham loin eite mai-ah gam sunga teng mi zosie a lungtawp sieng uhi,” a ci uhi.