Joshua 1 - Zo BiblePasien in Joshua a Sawlna 1 Topa’ nasem Moses a si zaw ciengin Topa in Moses’ a hupa Nun tapa Joshua hopi-in, 2 “Ka nasempa Moses si zo hi. Tu-in ding inlen nangma le tam mite zosie in Jodan gun kantanin Israel-te tunga ka pieh gam sungah pei un. 3 Moses tunga ka ciemsa ma bangin na ketaw in a totna mun popo nangma kang pie zo hi. 4 Senel gam le tam Lebanon gama kipanin gun lienpi Euphrates gun dong, nitumna lama Tuipi Lien lam, Hit-te leitang zosie nangma’ gam hi ding hi. 5 Na hin sung tungtawnin koima in ang langpan zo sih ding hi. Moses tawh ka opton bangin nang tawh zong kang om ton ding hi; kang tamasah sih ding a, zong kang nuasie sih ding hi. 6 Thahat inlen hang in; azieh pen na pu na pate uh pieh dinga ka ciemsa leitang tam mite na luosah ding hi. 7 Tha hatin hang inlen, ka nasempa Moses ang pieh thukham zosie tawh kizui-in na gamtat ding limtahin ngaisun in; na peina popo-ah na lawcin thei nadingin zietlam ahi a, veilam ahi zongin piel sin. 8 Na kam le tami thukham laibu na kilawisah sih ding hi; tua sunga kigiel teng zosie tawh kizui-in limtaha na gamtat thei nadingin sun le zanin na lung ngaingai ding hi. Tua hile na ma vang ding a, na lawcing ding hi. 9 Tam bangin thu kang pie hi: Tha hat inlen hang in. Zau sinlen lungkie sin, azieh pen na peina popo-ah nangma tawh Topa na Pasien ang om hi,” a ci hi. Busim Dinga Kithawina 10 Tua ciengin Joshua in mipi uliente thupie a, 11 “Giephual ah pei unlen, mite tam bangin thupie un: ‘Na lam-an ding uh kiging un; azieh pen Topa na Pasien un na nei ding vua ang pieh leitang a luo dingin ni thum sungin tam Jordan a galkai ding na hi uhi,’ ci un,” a ci hi. 12 Joshua in Reuben-te, Gad-te, Manasseh minam alangte kungah, 13 “Topa na Pasien un tawlngahna hing pie-in tam leitang ang pie ding hi, ci-in Topa’ nasem Moses a thupieh phawh un. 14 Moses in Jordan gal khat a ang pieh leitangah na zite, na tasente ule na ganhingte a om ding uhi. Ahi vangin note lahah galhang zosie in hiem tawi-in Jordan kantanin na sanggamte mai-ah pei-in, 15 Topa in no ang pieh bangin na sanggamte uh tungah tawlngahna pie-in, Topa na Pasien un amate a pieh leitang a luo masangsie-un na panpi ding uhi. Tua ciengin na leitang vuah kilekia-in, Topa’ nasem Moses in Jordan gal nisuona lamah ang pieh leitang na luo ding uhi,” a ci hi. 16 Amate in tam bangin Joshua a dawng uhi: “Kote in nei thupieh zosie ka sem ding vua, nei sawlna popo-ah ka pei ding uhi. 17 Sil bangkimah Moses thu ka man bang tehtehun na thu ka mang ding uhi. Topa na Pasien in Moses a ompi bangin nang zong hing ompi taheh. 18 Na thupiehnate a ledo le na kammal a mang lo poma, na thupieh popo a mang lo poma kithat ding hi. Thahatin na han ding beh ahi hi,” a ci uhi. |
Zo Bible © Bible Society of Myanmar, 2018.
Bible Society of Myanmar