Jonah 2 - Zo BibleLungdamkona Lapi 1 Tua ciengin Jonah in ngapi gil sung panin Topa a Pasien kungah thu ngen a, 2 ama in “Ka cimawna panin Topa ka hlan a, ama in kei ei dawng hi; Misikhuo’ gilpi sung panin ka kiko a, ama in ka aw ei za hi. 3 Tuipi thuh a laikim tahah kei nei sepdawh a, tuikhang in kei ei kimkot hi; na tuihuol zosiete le na tui kilawhte in ka tungah ei viel hi. 4 Tua ciengin keima in, ‘Na opna panin ei kinotmang hi; na biehinn siengtho kang bangci nua-etkia thei ding ahei?’ ka ci hi. 5 Ka tungah tui in ei tuomcip hi; tuili thuh in ei imtawm hi; ka lu kimvelah tuipi lopate in kei ei vielcip ta hi. 6 Muolsang bulte ah ka kumsuh a, kumtawnin kot ei khalu thei kotgolh a nei gam sungah ka va kumsuh ta hi; hizongle Topa ka Pasien aw, tua Leihawmpi sung panin nang in ka hinna nei hunkhie hi. 7 Ka lung a kieh ciengin Topa ka phawh hi; tuale na biehinn siengtho sung nangma kungah ka thungetna ang tung hi. 8 Kimanna a nei lo milim biete in amau’ dihtatna a nuasie uhi. 9 Ahi vangin keima lungdam kona tawh nangma kungah biehpiehnate ka pie ding hi; ka kiciemnasa ka tangtun ding hi. Tatkhietna Topa-a’ ahi hi!” a ci hi. 10 Tua ciengin Topa in ngapi hopi a, tuale ama in leigaw tungah Jonah a luokhie hi. |
Zo Bible © Bible Society of Myanmar, 2018.
Bible Society of Myanmar