John 18 - Zo Bible

Jesu, a Kilehehna le a Kimatna

¹ Jesu in tam teng a gen zaw ciengin a nuazuite tawh Kidron kuom kantanin khum munah a om um khat sungah a nuazuite tawh a lut hi.

² Khum mun pen Jesu in a nuazuite a kimupi zelna mun ahi ziehin a leheh pa Judas in zong a mun a thei hi.

³ Tuaci’n Judas in siempute le Pharisee-te kung panin galkap honkhat le palihte zawpi a, lalcin, meila, le galhiemte tawi-in a pei uhi.

⁴ Tua ciengin Jesu in ama tunga a pieng ding thu zosie a thei zo tah ziehin va pei-in amate kungah, “Koi sui na hi vuoi?” ci-in a dong hi.

⁵ Amate in, “Nazareth mi Jesu,” ci-in a dawng uhi. Jesu in, “Kei, ama ka hi hi,” a ci hi. Ama leheh pa Judas zong amate tawh a dington hi.

⁶ Jesu in amate kungah, “Kei, ama ka hi hi,” ci-in a gen ciengin amate nuakinin tuolah a pua uhi.

⁷ Jesu in, “Koi pen sui na hi vuoi?” ci-in a dongkia hi. Amate in, “Nazareth mi Jesu sui ka hi uhi,” a ci uhi.

⁸ Jesu in, “Kei, ama ka hi hi, ci-in kang gen zo ta hi. Tuaci’n kei ei sui na hi uleh tam mite peisah ta un,” a ci hi.

⁹ Tam pen, “Nangma in kei nei piehte khat beh ka mansuo sih hi,” ci-a a gensa thu a tangtun nading ahi hi.

¹⁰ Tua ciengin Simon Peter in a namsau kuo dawhin siempu lienpen pa’ sila khat a sat leh a bil zietlam a bantan hi. Tua silapa’ min Malchus ahi hi.

¹¹ Jesu in Peter kungah, “Na namsau a paai-ah sietkia in. Pa in ei piehsa hai dawn lo ding ka mah?” a ci hi.

Siempu Lien Pa Mai-ah Jesu

¹² Tuaci’n galkapte, a galkap bupa, le Judah palihte in Jesu manin khau tawh a khi uhi.

¹³ Tua kuma siempu lien a sem Caiaphas’ sungpa Annas kungah a peipi masa uhi.

¹⁴ Caiaphas kici pa pen mipite’ tangin mi khat a si ding hoizaw hi, ci-in Judah mite thumop pa ahi hi.

Peter In Jesu Niel

¹⁵ Simon Peter le a nuazui dang khat in Jesu a zui uhi. Siempu lien pa le nuazuipa a kimelthei ziehin siempu lien pa’ inn huong sungah Jesu tawh a lutton hi,

¹⁶ ahi vangin tunkot pulamah Peter a ding hi. Tuaci’n siempu lien pa tawh a kimelthei tua nuazui dang khat pusuohin kotcing numei nu hopi a, Peter zong a lutpi hi.

¹⁷ Tua numei nu in Peter kungah, “Nang zong tam pa’ nuazuite lahah khat hi lo na mah?” a ci hi. Ama in, “Hi sing,” a ci hi.

¹⁸ Dam a nat ziehin silate le palihte in meihol a taw vua, mei awi-in a kimkotah a ding uhi. Peter zong amate tawh dingin mei a awi hi.

Siempu Lien Pa in Jesu Thudong

¹⁹ Tua ciengin siempu lien pa in Jesu kungah a nuazuite thu le a thuhilna tawh kisai thute a dong hi.

²⁰ Jesu in, “Keima in leitung mite mai-ah a langtangin ka gen zo hi; Jew mite zosie’ kisuhtuona ahi kikhopna innte le biehinnpi sungah thu ka hil zing a, bangma ka dapgen sih hi.

²¹ Bang dinga nei dawh ahei? Ka thugen a zasate kungah bang ka gen ahei, ci va kidawh ta’n. Amate in bang ka gen ci a thei uhi,” a ci hi.

²² Ama in tam teng a genzaw ciengin a gei-a a ding palihte khat in Jesu phebeh a, “Siempu lien pa tam banga na dawn ding ma amah?” a ci hi.

²³ Jesu in, “Ka genkhiel leh ka khielna ei lahtel in. Ahi vangin mantaha ka gen ahile bang dinga nei phebeh ahei?” ci-in a dawng hi.

²⁴ Tua ciengin Annas in Jesu khaukhisa-in siempu lien pa Caiaphas kungah a puoh hi.

Peter In Jesu Nielkia

²⁵ Mei awi-in Simon Peter a din laitahin amate in, “Nang zong ama’ nuazuite khat hi lo na mah?” ci-in a dong uhi. Ama in, “Hi malmal sing,” ci-in a niel hi.

²⁶ Tua ciengin siempu lien pa’ silate lahah Peter in a bil a satpieh pa’ sanggamte khat in, “Ama tawh um sungah hing mu hi lo ka mah?” ci-in a dong hi.

²⁷ Peter zong kilepin nielkia leuleu a, tua hun lienin aah a khuong hi.

Pilat Mai-ah Jesu

²⁸ Tua ciengin amate in Caiaphas inn panin Pilat’ kumpi inn ah Jesu a peipi uhi. Tua hun pen zingmawng phalva pat ahi hi. Biehna ngaina tawh kisai bua bannate tawh kipelin Peisan pawi a neh thei nadingun kumpi inn sungah amate a lut sih uhi.

²⁹ Tuaci’n Pilat pusuohin, “Tam pa na mawmat nopna uh bang ahei?” ci-in amate dong hi.

³⁰ Amate in, “Tam pa in sietna a bawl lo hi leh na kungah kang ap sih ding uhi,” ci-in a dawng uhi.

³¹ Pilat in, “Ama peipi ulen, noma’ thukham bangin ama tungah thu kikhen ta un,” a ci hi. Jew mite in, “Kote in mi tha thei nading thu ka nei sih uhi,” ci-in a dawngkia uhi.

³² (Tam pen bangci banga sina thuoh ding ci, Jesu in a gensa thute a tangtun nading ahi hi.)

³³ Tua ciengin a kumpi inn sungah Pilat tumkia-in Jesu hlansah a, “Nang, Judah-te’ Kumpi na hi amah?” ci-in a dong hi.

³⁴ Jesu in, “Nangma’ ngaisut tawm a nei dawh amah, ahi sihle midangte in na kunga kei thu ang gen ahei?” ci-in a dawng hi.

³⁵ Pilat in, “Kei Judah mi ka mah? Na mite le siempu liente in ka kungah nang ei ap zo hi. Bang ahiei na bawl?” ci-in a dawngkia hi.

³⁶ Jesu in, “Ka kumpi gam pen tami leitung pan ahi sih hi. Ka kumpi gam tami leitung pan hileh Jew mite khut sunga ka tun lo nadingin ka nuazuite in a do ding uhi. Ahi vangin ka kumpi gam pen tam sung pan ahi sih hi,” a ci hi.

³⁷ Pilat in, “Tua ahile nang kumpipa na mah?” ci-in a dong hi. Jesu in, “Nei ci bangin kumpi ka hi hi. Tami thuman teci pang dingin ang suoh ka hi a, tami thu ziehin leitunga ang pei ka hi hi. Thuman thutah-a pang zosie in ka aw a ngai uhi,” a ci hi.

³⁸ Pilat in, “Thuman thutah bang ahei?” ci-in a dong hi. Ama in tami thu a gen zaw ciengin Jew mite kungah pusuohkia-in, “Ama mawsah nading thu ka mu sih hi.

Jesu a Si dingin Thu Kikhen

³⁹ Ahi vangin Peisan pawi hun sungin note adingin mi khat ka hla thei nading ngaina khat na nei uhi. Judah kumpipa kang hlakhiet ding na nuom vuoi mah?” a ci hi.

⁴⁰ Amate in, “Tam pa hi lo, Barabbas hlazaw in!” ci-in nahpi tahin a kiko uhi. Barabbas pen misuom khat ahi hi.