John 16 - Zo Bible

¹ “Note na puakhah lo nadingun keima in na kung vuah tam thute kang gen zo hi.

² Amate in kikhopna inn panin note ang nawmang ding uhi. A tahtahin, no ang thatte in tua banga a bawlna uh ziehin Pasien bie-a a kingaisut ding uh hun ang tung ding hi.

³ Amate in Pa ahi a, kei ka hi zongin ei thei lo ziehun tam bang ang sem ding uhi.

⁴ Ahi vangin a hun uh ang tun ciengin tam thute kang gensa ahi lam na phaw nading vua tu-a kang gen ahi hi. “A kipat cilin note tawh ka opton ziehin na kung vuah tam thute kang gen vateh sih hi.

Hla Siengtho’ Nasepna

⁵ Tu-in ei sawlpa kungah ka pei ta ding hi; koima khat beh in, “Hei-a pei ding na hei? ci-in nei dong vawt sih uhi.

⁶ Ahi vangin tam bang ka ci ziehin lah na da mama vanuh uhi.

⁷ Ahi vangin thuman thutah kang gen hi: Kei pei leng no adingin a hoizaw hi, azieh pen kei pei sih leng na kung vuah Hupa ang pei sih ding hi; kei ka pei leh na kung vuah ama kang sawl ding hi.

⁸ Ama ang tun ciengin leitung mite’ mawna, dihna le thukhennate kawhin leitung mite’ khielna teltahin ang lah ding hi.

⁹ Mawna thu-ah, amate in kei ei up lo ziehun a maw uhi.

¹⁰ Dihna thu tawh kisai-in, Pa kungah ka pei ding a, nei mu nawn sih ding uhi.

¹¹ Thukhenna thu-ah, tam leitung uhpa in mawsah thukhenna a thuoh zo ta hi.

¹² “Na kung vua kang gen ding thu tampi om lai hi, hizongle tu-in na sang thei nai sih uhi.

¹³ Thuman Hlagau Siengtho ang tun ciengin ama in thuman zosie-ah ang pui ding hi; azieh pen ama’ thu ang gen ding hi loin, a thu zah popo ang gen ding hizaw a, na kung vuah ang tung ding nate ang gen ding ahi hi.

¹⁴ Ama in kei-a’ teng la-in note kunga ang gen ding ahi ziehin ama in ka min a thangsah ding hi.

¹⁵ Pa neisa zosie kei-a’ ahi hi. Tami thu ziehin ama in kei-a’ teng la-in na kung vuah ang gen ding hi, a ci ka hi hi.

Dana, Lungdamna Suoh Ding

¹⁶ “Bakhat sung kei nei mu nawn sih ding vua, bakhat zaw ciengin nei mukia ding uhi,” a ci hi.

¹⁷ Tua ciengin a nuazuite pawlkhat khatlekhat kiho-in, ‘Bakhat sung nei mu nawn sih ding vua, bakhat zaw ciengin nei mukia ding uh,’ a ci le, ‘A zieh pen ka Pa kungah ka pei ding hi,’ ci-a i kunga ang gen pen bang a cinopna ahi diei?” a kici uhi.

¹⁸ Amate in, ‘Bakhat sung a ci pen bang a ci na adiei? Ama bang gen ahei, ci i thei sih uhi,” a kici uhi.

¹⁹ A dot nop lam uh Jesu in a thei ciengin amate kungah, ‘Bakhat sung kei nei mu nawn sih ding vua, bakhat zaw ciengin nei mukia ding uhi,’ ka ci pen kidong na hi uh amah?

²⁰ A tahtah a kang ci-in, note kapin na mau ding vua, ahi vangin leitung mite a lungdam ding hi; note na da ding vua, ahi vangin na danate uh lungdamna a suoh ding hi.

²¹ Numei khat in a tasuo hun tung ahi ziehin a na a thuoh hi. Ahi vangin nau a suo ciengin leitungah nausen khat a pien ziehin lungdamin a gimthuoh teng a phawhkha nawn sih hi.

²² Tuaci’n note in tu-in gimna na thuoh uhi; hizongle keima in note kang mukia ding a, na kipah ding uhi, note kung panin koima in na kipahna uh ang lahpieh thei sih ding hi.

²³ Tua ni ciengin note in bangma nei dong ta sih ding uhi. A tahtah a kang ci-in, keima’ min suongin Pa kunga na nget popo uh ama in ang pie ding hi.

²⁴ Ka min tawh tu dongin bangma na ngen nai sih uhi. Na lungdamna uh a bukim thei nadingin ngen un, na nga ding uhi.

Nuazuite ading Lungnopna

²⁵ “Keima in note tungah thugentena tawh tam thute kang gen zo hi. Thugentena tawh ka gen nawn lo ding hun ang tung ding a, Pa tungtang thu cientahin kang genzaw ta ding hi.

²⁶ Tua ni ciengin note in keima’ min suongin na ngen ding uhi. Keima in note tangin Pa kungah hing ngetpieh vang a ci ka hi sih hi;

²⁷ azieh pen note in keima ei itin, Pa kung pana ang pei ka hi lam nei up ziehun, Pa mama in zong note ang it ahi hi.

²⁸ Pa kung pan hing pei-in leitungah kang tung zo hi; leitung nuasie-in Pa kungah khatvei ka peikia ding hi,” a ci hi.

²⁹ A nuazuite in, “Hi hi, tu-in thugen tena zang loin cientahin na gen hi!

³⁰ Tu-in na zosie na thei a, koima’ dawh kisam lo hi, ci ka thei tah ziehun, Pasien kung pana ang kipan na hi lam kang um ta uhi,” a ci uhi.

³¹ Jesu in, “Tu-in nei um ta sam vuoi mah?

³² Note kithethangin na inn ciet uh zuonin kei guoh nei nuasie ding uh hun ang tung ding a, tu-in ang tung tahtah ta hi. Ahi vangin Pa tawh omton ka hi ziehin kei matang ka hi sam sih hi.

³³ Note in keima sungah lungnopna na nei thei nadingun na kung vua tami thu kang gen ahi hi. Note in leitungah gimna na thuoh ding uhi. Ahi vangin kihangsansah un; keima in leitung ka zozo hi!” a ci hi.