John 11 - Zo Bible

Lazarus’ Sina

¹ Mary le a sanggamnu Martha opna Bethany khuo-ah Lazarus kici mi khat a ci a na hi.

² Mary kici nu pen sathau namtui tawh Topa nu-in a sam tawh a keng nawtpieh nu ahi a, a sanggampa Lazarus dam loin a om hi.

³ Tuaci’n a sanggam numei gel in Jesu kungah thu a puoh vua, “Topa aw, na it mipa a ci na hi,” a ci uhi.

⁴ Ahi vangin Jesu in tua thu a zah ciengin, “Tami natna pen si nading natna ahi sih hi; tua tungtawnin Pasien Tapa’ min a than thei nading le Pasien’ min a kithansah thei nading hizaw hi,” a ci hi.

⁵ Jesu in Martha, Martha’ sanggamnu, le Lazarus te a it mama hi.

⁶ Lazarus dam lo a zah zaw ciengin a opna munah ni ni a tambe lai hi.

⁷ Tua zaw ciengin a nuazuite kungah, “Judea gamah peikia vai,” a ci hi.

⁸ Nuazuite in, “Siepa aw, Jew mite in tu mama-in suong tawh selia ang sawm uhi, tua sunga peikia ding na mah?” a ci uhi.

⁹ Jesu in, “Sun khuovah hun nai sawm le nai ni sung hi lo amah? Sun hun sunga lam peite in leitung khuovah a mu ziehun a kipalkha sih uhi.

¹⁰ Ahi vangin zan lai-a lam peite in khuovah a op lo ziehin a kipalkha uhi,” a ci hi.

¹¹ Ama in tam a cizaw ciengin amate kungah, “I lawmpa uh Lazarus a kimu ahi a, ahi vangin ama phong dingin ka pei ding hi,” a ci hi.

¹² Nuazuite in, “Topa aw, ama a kimu a hi bo leh ang nuom tuom na va,” a ci uhi.

¹³ Ahi vangin Jesu in a sina thu gen hi napi, amate in a kimut ngaina maimai gen a sa lel uhi.

¹⁴ Tua ciengin Jesu in amate kungah sieng tahin gen a, “Lazarus si zo hi.

¹⁵ Note in na up thei nadingun tua sunga ka op lona pen note adingin ka kipah mama hi. Ahi vangin ama kungah pei vai,” a ci hi.

¹⁶ A kopsuo a kici Thomas in a guol nuazuite kungah, “Ama tawh siton dingin va zui ta vai,” a ci hi.

Jesu, Thawkiana le Hinna

¹⁷ Jesu a tun ciengin Lazarus han sunga a op zaw ni li bang pha zo ci a thei hi.

¹⁸ Bethany pen Jerusalem tawh kinai-in tai ni bang kigamla a,

¹⁹ a sanggampa uh a si ziehin ama gel hlai dingin Mary le Martha-te kungah Jew mite tampi a haw uhi.

²⁰ Martha in Jesu ang haw hi, ci a zah ciengin ama dawn dingin pei a, tua laitahin Mary inn ah a om hi.

²¹ Martha in Jesu kungah, “Topa, nang tana om hi poma lacin ka naupa a si vawt sih ding hi.

²² Ahi vangin tu nangawnin zong ama kunga na nget popo Pasien in ang pie ding hi, ci ka thei hi,” a ci hi.

²³ Jesu in tua nu kungah, “Na sanggampa thokia ding hi,” a ci hi.

²⁴ Martha in ama kungah, “Ni tawp ni, thawkia ni ciengin ang thokia ding hi, ci ka thei hi,” a ci hi.

²⁵ Jesu in ama kungah, “Keima thawkiana le hinna ka hi hi. Kei ei umte a si vangin a hingkia ding a,

²⁶ a hing a keima ei um mi zosie a si ngai nawn sih ding uhi. Tami thu na um ei mah?” a ci hi.

²⁷ Martha in, “Ka um hi Topa aw, nang pen leitunga ang pei ding Pasien’ Tapa Messiah na hi hi, ci ka um hi,” a ci hi.

Jesu Kap

²⁸ Tam thu a gen zaw ciengin tua nu a kilekia a, a naunu Mary hlanin, “Siepa tanah om a, nang ang hlan hi,” ci-in a va dap hopi ta hi.

²⁹ Mary in tam thu a zah ciengin thakhatin tho-in ama kungah a pei pai hi.

³⁰ Khum hunin Jesu khuo sung lut nai loin Martha tawh a kimuna munah a om lai hi.

³¹ Inn sungah ama hlai-a a om Jew mite in kintaha a pusuoh Mary a mu uhi. Amate in hanah a kap dinga pei ding hi va, ci-in a ngaisut ziehun a nua a zui uhi.

³² Jesu opna munah Mary a tun ciengin ama mu a, a keng zungah khupbawhin, “Topa aw, nang tana a om hi poma lacin ka sanggampa a si vawt sih ding hi,” a ci hi.

³³ Jesu in Mary le ama a zui Judah-te’ kaa a mu ciengin a nangeh na mama a, zong lunggim mama hi.

³⁴ Ama in, “Hei sunga na siel uh ahiei?” a ci hi. Amate in, “Topa aw, hing pei inlen hing en in,” a ci uhi.

³⁵ Jesu kaa a kipan hi.

³⁶ Tuaci’n Jew mite in, “En un, nah it sam ei!” a ci uhi.

³⁷ Ahi vangin amate pawlkhat in, “Mittaw mit khuo musah thei pa in tampa zong a si lo nadingin bawl thei lo amah?” a ci uhi.

Jesu in Lazarus Hingsahkia

³⁸ Tua ciengin Jesu zong a lunggim kawmin han lam zuonin a pei hi. Tua han pen leihawm ahi a, suongtum khat tawh kisin ahi hi.

³⁹ Jesu in, “Tua suongtum ladawh un,” a ci hi. Mi sipa’ sanggam nu Martha in ama kungah, “Topa aw, a si zaw ni li pha ta ahi ziehin namsie ta ding hi,” a ci hi.

⁴⁰ Jesu in ama kungah, “Na up leh Pasien’ minthanna na mu ding hi, hing ci zo hi lo ka mah?” a ci hi.

⁴¹ Tuaci’n amate in suongtum a ladawh uhi. Tuale Jesu dahto-in, “Pa aw, ka thumna nei ngai ziehin ka lungdam hi.

⁴² Ka thumnate nei ngai zing lam ka thei a, ahi vangin tam sunga a ding mihonte in, nangma’ ei sawl ahi lam ei up thei nadingun amate adingin thu ka ngen hi,” a ci hi.

⁴³ Tam thu a gen zaw ciengin, “Lazarus aw, hing pusuoh in!” ci-in nahpi-in a kiko hi.

⁴⁴ A misi pa a khut le a keng diel tawh kituomin, a maitang puon tawh kitunsa-in a pusuoh hi. Jesu in amate kungah, “Phel unlen peisah un,” a ci hi.

Pharisee-te in Jesu Tha Sawm

⁴⁵ Mary kunga a haw Judah mi tampite in Jesu’ nasep a mu ziehun ama a um uhi.

⁴⁶ Ahi vangin Pharisee-te kungah pawlkhat pei-in ama’ nasepte a va gen uhi.

⁴⁷ Tuaci’n siempu liente le Pharisee-te in vaihawm uliente khawmin, “Bang i law ta bep ding vuoi? Tam pa in lim lamdang tampi a bawl hi.

⁴⁸ Tam banga i opsahsah mawh leh mi zosie in ama hing um ding a, Rome-te hing pei-in i siengtho mun le i minam buppi ang susie ding uhi,” a ci uhi.

⁴⁹ Ahi vangin amate lahah tuami kum a siempu lien a sem Caiaphas a kici pa in amate kungah, “Bangma thei vawt sih uteh!

⁵⁰ Minam buppi khat a kisiet lo nadingin mi tampi tanga mi khat a si pen note adinga a hoizaw ahi lam na thei sih uhi,” a ci hi.

⁵¹ Tam thu pen ama’ nop thu-a a gen hi loin tuami kum a siempu lien sem ahi ziehin minamte adinga si ding ahina thu le

⁵² minamte ding beh hi loin, a kithethang Pasien’ tate pawlkhat a gawmtuo thei nadingin a si ding ahina thu kamsangpa bangin ama in thu mavang a gen hi.

⁵³ Tuaci’n tua ni-a kipanin amate in Jesu tha ding a sawm uhi.

⁵⁴ Tua ahi ziehin Jew mite lahah a langtangin Jesu a pei nawn sih a, tua mun panin gamlah tawh kinai Ephraim kici khuo ah pei-in a nuazuite tawh tua munah a om suoh hi.

⁵⁵ Tu-in Judah-te’ Peisan Pawi nai ta a, pawi kipat masangin a kisiensuo dingin gam sung khuote panin Jerusalem ah mi tampi peito uhi.

⁵⁶ Amate in Jesu sui kawikawi-in biehinn sungah a ding vua, “Bang na ci ngaisut vuoi? Pawi ang sim lo tahtah ding adiei?” ci-in khatlekhat a kidong uhi.

⁵⁷ Azieh pen siempu liente le Pharisee-te in Jesu a mat thei nadingun Jesu’ opna a thei na op uleh ei hil ta un,’ ci-in thupiehna a nei zo uhi.