John 1 - Zo Bible

¹ A kipat cilin Thu na om a, tua Thu khu Pasien tawh na omton a, tua Thu, Pasien ahi hi.

² Ama pen a cil a kipanin Pasien tawh na omton hi.

³ Ama tungtawnin na zosie pieng a, ama lo tawh a kipiengsah na khat beh om lo hi. A kipiengsah na zosie in

⁴ ama sungah hinna a nei vua, tua hinna khu mihingte’ khuovah ahi hi.

⁵ Khuomiel lahah tua khuovah tang a, khuomiel in tua khuovah a zo zo sih hi.

⁶ Pasien kung panin ang kisawl mi khat om a, a min John ahi hi.

⁷ Ama tungtawnin mi zosie in a up nadingin tua khuovah thu teci pang dinga ang pei ahi hi.

⁸ Amama pen khuovah ahi sih a, tua khuovah thu teci pang dinga ang pei hizaw hi.

⁹ Mikim tunga ang tang ahi tua khuovah tahtah pen leitungah ang pei zo hi.

¹⁰ Ama leitungah om a, ama tungtawnin leitung kipiengsah hi; hizongle leitung in ama a thei kha sih hi.

¹¹ Ama-a’ ahite kungah ama pei a, hinanle ama’ mite in ama na sang lo hi.

¹² Ahi vangin ama sangin ama’ min a um zosiete tungah Pasien’ tate suo thei nading thuneina a pie hi.

¹³ Tua banga a suoh mite pen silesa-a pieng hi loin mihing’ deidan banga pieng zong ahi sih a, Pasien’ deidan banga a pieng hizaw hi.

¹⁴ Tuale thu in mihing bangin pieng a, hepina le thuman thutah tawh kidimin eite lahah om a, Pa in a neisun Tapa khat’ minthanna bangin ama’ minthanna i mu zo ta uhi.

¹⁵ (Ama tawh kisai John in teci pang a, “Tampa pen kang gen mipa ahi a, ‘Ka nua-a ang pei ahi vangin kei masanga na om zo ahi ziehin kei sangin ama a lienzaw hi,’ ci-in a kiko hi,” a ci hi. )

¹⁶ Ama’ kicinna panin eite in hepina thupha khatzaw khat i nga uhi.

¹⁷ Moses tungtawnin thukham na kipie hi; Jesu Khris tungtawnin hepina le thuman thutah ang pei hi.

¹⁸ Koima in Pasien a mu ngai sih hi. Pa’ lungtang tawh kinai-a om Tapa khat beh in ama ei theisah hi.

Baptize-pa John Teci panna

¹⁹ Jew mite in, “Nang koi na hei?,” ci-in John a dong dingin Jerusalem panin siempute le Levi-te a sawl lai-un, John’ teci panna tam bang ahi hi.

²⁰ Ama ki-im loin kipulah a, “Kei Messiah ka hi sih hi,” a ci hi.

²¹ Tuale amate in, “Tua ahile koi na hiei? Elijah na mah? ci-in a dong uhi. Ama in, “Ka hi sih hi,” a ci hi. “Kamsang na hi amah?” a cikia ule, “Hi sing,” ci-in dawngkia leuleu hi.

²² Tua ciengin amate kungah, “Nang koi na hiei? Ko ei sawlte kungah ka genkia thei nadingun ko kungah dawnna khat ei nei in. Nang le nang koi hi’ng na kici ei?” a ci uhi.

²³ John in, “Kamsang Isaiah’ gen ma bangin, ‘Topa pei nading lampi tangsah un,’ ci-in gamlah-ah a kiko aw ka hi hi,” a ci hi.

²⁴ Amate pen Pharisee-te sawl ahi uhi.

²⁵ Amate in a kungah, “Tua ahile nang, Messiah lah hi lo, Elijah zong hi lo, kamsangpa lah hi lo na hi leh bang zieha mi na baptize ahei?” ci-in a dong uhi.

²⁶ John in amate kungah, “Keima in tui tawh mi ka baptize hi. Note lahah na thei lo uh khat a ding khinkhian a,

²⁷ ama ka nua-a ang peipa ahi hi; kei pen a kedap khau sut dingin zong ka kilawm sih hi,” a ci hi.

²⁸ Tami pen John in mite a baptize-na mun Jordan gungal Bethany khuo-a pieng thu ahi hi.

Pasien’ Tuuno

²⁹ A zing ciengin John in ama lam zuon a a pei Jesu a mu ciengin, “Tanah leitung’ mawna a puo Pasien tuuno a om hi!

³⁰ ‘Ka nua-ah kei sanga a lienzaw khat ang pei ding hi, azieh pen kei ka pien masangin ama a na om zo tabo hi, ka cipa khu tampa ahi hi,’ a ci hi.

³¹ Kei mama in ama ka thei ngai sih hi; ahi vangin tui tawh ama baptize dinga kang peina thu pen Israel-te tungah ama a kilah nading ahi hi,” a ci hi.

³² Tuale John teci pang a, “Vantung panin vakhu bangin Hlagau Siengtho hing kumsuh a, ama tunga khawl ka mu hi.

³³ Ke’n ama ka thei khah lo vangin, tui tawh mite baptize dinga ei sawlpa in, ‘A tungah Hla kumsuhin a khawl na mu pa uh pen Hlagau Siengtho tawh mite a baptize ding pa ahi hi,’ ei ci hi.

³⁴ Kei mama in ka mu zo ta a, tam mipa pen Pasien’ Tapa ahi hi, ci-in teci ka pang zo hi,” a ci hi.

Jesu’ Nuazui Masate

³⁵ A zing ciengin a nuazuite lahah ni tawh John a dinton laitahin

³⁶ ama in Jesu a pei mu a, “En un, tanah Pasien’ Tuuno a om hi!” a ci hi.

³⁷ Nuazui ni tegel in tami a thugen a zah ciengin Jesu nua a zui uhi.

³⁸ Jesu zong kihei-in a nua a zui lam gel a mu ciengin, “Bang sui na hi vuoi?” a ci hi. Ama gel in, “Rabbi (tua pen Siepa a ci nopna hi), hei-a om na hei?” a ci uhi.

³⁹ Ama in, “Hing pei unlen hing en un,” a ci hi. Ama gel pei-in a opna mun a va mu ta vua, tua ni-in ama kungah a taam uhi. Khumi hun pen nitah nai li pawl a hi hi.

⁴⁰ John thugen za-a Jesu nua a zui nite lahah khat pen Simon Peter’ sanggampa Andrew ahi hi.

⁴¹ Ama in a sanggampa Simon mu masa pen a, ama kungah, “Messiah (Sathau kinupa a ci nopna) ka mu ta uhi,” a ci hi.

⁴² Ama in Jesu kungah Simon peipi a, Jesu in ama enin, “Nang, John’ tapa Simon na hi hi. Cephas ang kici ta ding hi,” a ci hi. ( Peter ci-in kilet hi).

Philip le Nathanael in Jesu Nua Zui

⁴³ A zing ciengin Galilee ah Jesu pei a sawm hi. Ama in Philip a mu ciengin ama kungah, “Ei zui in,” a ci hi.

⁴⁴ Philip pen Andrew le Peter-te’ khuo Bethsaida pan ahi hi.

⁴⁵ Philip in Nathanael mu a, ama kungah, “Moses in thukham laibu sunga a giel, kamsangte in zong a na giel Nazareth khuomi Joseph’ tapa Jesu i mu ta uhi,” a ci hi.

⁴⁶ Nathanael in ama kungah, “Nazareth khuo ah sil hoi a pieng thei ding amah?” a ci hi. Philip in ama kungah, “Hing pei inlen hing en in,” a ci hi.

⁴⁷ Jesu in ama kung zuon a a pei Nathanael a mu bepin, “A zuou ngai lo Israel mi tahtah khat tanah a om hi,” ci-in a gen hi.

⁴⁸ Nathanael in, “Kei hei-a nei thei ahei?” ci-in a dong hi. Jesu in, “Philip in ang hlat masang, theikung nei-ah na op lai-in kang mu zo tabo hi,” ci-in a dawng hi.

⁴⁹ Nathanael in, “Rabbi aw, nang Pasien’ Tapa na hi hi! Israel kumpipa zong na hi hi!” ci-in a dawngkia hi.

⁵⁰ Jesu in, “Theikung nei-ah na op lai-in kang mu zo hi, kang ci zieha nei up amah? Tamte sanga a thupizaw nate na mu lai ding hi,” a ci hi.

⁵¹ Jesu in ama kungah, “A tahtah a kang ci-in, note in van kihong na mu ding vua, Mihing Tapa tungah Pasien’ vantung mite a kumsuh le a kato na mu ding uhi,” a ci hi.