Jeremiah 52 - Zo Bible

Jerusalem Kisietna Etkiana

¹ Zedekiah kumpi a suo-in kum sawmni le khat pha hi; ama Jerusalem ah kum sawm le kum khat sung maang hi. A nu’ min Hamutal ahi a, Libnah-a teng Jeremiah’ tanu ahi hi.

² Ama in Jehoiakim gamtat bangin Topa muna-ah sil hoi lo a bawl hi.

³ Tua bangin Jerusalem le Judah in Topa a lungthahsah ziehun ama kung panin amate a notmang hi. Zedekiah in Babylon kumpipa langpang hi.

⁴ Tuale ama kumpi-a a maan zaw a kum kuo kum, a hla sawmna, a ni sawm ni-in Jerusalem sim dingin a galkap zosie tawh Babylon Kumpipa Nebuchadnezzar kuonin khuopi imtawm uhi; amate in tuami kimvelah galdalna a bawl uhi.

⁵ Tuaci’n Kumpi Zedekiah in a uh zaw kum sawm le kum khat a cin dongin khuopi ki-imtawm hi.

⁶ Tua kum a hla lina, a ni kuo ni-in khuopi sungah kiel a natsiet seng ziehin gam mite ading an om nawn lo hi.

⁷ Tua ciengin khuopi kulpi kitovang hi; tuale khuopi kimvelah Chaldea-te om zong le zan laitahin kumpipa’ um gei-a kulpi tegel kikala tunkot lam tawnin galkap zosie taimangin Arabah gam lam a manaw uhi.

⁸ Ahi vangin Chaldea galkapte in kumpipa a nuadel vua, tuale Jericho zang lei-ah a pha uhi; tuale a galkap zosie kithezahin ama a taisan uhi.

⁹ Tua ciengin amate in kumpipa manin Hamath gam Riblah khuo-a om Babylon kumpipa kungah peipi-in, tuale ama tungah thu a khen hi.

¹⁰ Babylon kumpipa in Zedekiah muna-ah a tate that a, Riblah khuo ah Judah kumpi ulien zosie zong that hi.

¹¹ Ama in Zedekiah’ mittangte kheipieh a, tuale ama siakhau tawh khi-in a si dongin thong sungah a khum hi.

¹² Babylon kumpipa Nebuchadnezzar in kumpi a sep zaw a kum sawm le kum kuo a cin kum, a hla ngana, a ni sawm ni-in Jerusalem ah Babylon kumpi cing galkapmangpa Nebuzaradan lut a,

¹³ Topa’ biehinnpi a kipan kumpipa’ inn le Jerusalem-a inn zosie haltum sieng hi; inn gol kici zosie zong haltum hi.

¹⁴ Kumpi cing galkapmangpa tawh a omton Chaldea galkap zosie in Jerusalem kimvela kulpi zosie a satcim uhi.

¹⁵ Kumpi cing galkapmangpa Nebuzaradan in mipite lahah a zawngpen pawlkhat, khuopi sunga a kinuasie mite, Babylon kumpi langa a tai mite, le khutsiem mi a omlai teng, sal dingin a zawpi hi.

¹⁶ Hinanle kumpi cing galkapmangpa Nebuzaradan in lengga um bawl ding le lo hlo dingin gam sunga a zawng pente kimkhat nuasie lai hi.

¹⁷ Chaldea-te in Topa’ biehinnpi sunga om sumngo khuomte, sumngo tuikuong le a tunnate satguoi-in sumngo zosie Babylon ah a puo uhi.

¹⁸ Tuale amate in beelte, vutluonate, taite-te, hengkuongte, siakeute, le biehinnpi kikhopna sunga vanzah zosie zong a la uhi.

¹⁹ Kumpi cing galkapmangpa in ngun le kham tawh a kibawl hengkuong neute, meikam luona kuongdaite, kuongte, beelte, meivah khuomte, siakeute, le tuibuohna kizang kuongte zong a puo hi.

²⁰ Solomon kumpipa in Topa’ biehinn dinga a bawlsa khuompi ni, tuikuongpi khat, tua nei-ah sumngo bawngtang lim sawm le ni le a tunnate, sumngo tawh a kibawl tua vanzah teng zosie pen ahile tawi te zawh vet ding ahi sih hi.

²¹ Khuompi nite ahile, khuompi khat a sanna tong sawm le tong giet, a kimkot tong sawm le ni pha hi; tua pen a sunghawm ahi a, a san pen zung li zung li ahi hi.

²² Tuami tungah sumngo khuomlu zepna om hi; khuomlu zepna khat pen tong nga sang hi; khuomlu zepna kimvel pen lenta banga kiphante le mang kawlsing limin kizem a, a unpi-in sumngo-a kibawl ahi hi. Tuale a khuompi nina zong tua bang ma-in mang kawlsing lim-a kizem ahi hi.

²³ A pang tengah mang kawlsing ga sawmkuo le guh om hi; a kimvelah a kizepna mang kawlsing zosie a unpi-in zakhat ahi hi.

²⁴ Kumpi cing galkapmangpa in siempupi pa Seraiah, siempu lien a nina Zephaniah, le kotpi cing thumte a kaimang hi;

²⁵ tuale ama in khuopi panin galkapte a uh galkapmang khat le khuo sunga a kimu kumpipa’ vaihawmpi mi sagi, gam mite a hanthawn galkap thuvanpi khat le khuopi sunga a tuokhah uh mi sawmguh, khuo sung panin a peipi hi.

²⁶ Tua ciengin kumpi cing galkapmangpa Nebuzaradan in amate manin Riblah khuo-a Babylon kumpipa kungah peipi hi.

²⁷ Tuale Babylon kumpipa in Hamath gam sunga Riblah khuo ah amate tehpuongin a thatgam sieng hi. Tuaci’n sal tang dingin a gam pulamah Judah a pei hi.

²⁸ Tam pen Nebuchadnezzar in sal dinga a zawpi mi phaza ahi hi: A kum sagina kumin Judah mi tulthum le sawmni thum,

²⁹ Nebuchadnezzar a kumpi suo zaw a kum sawm le giet kumin mi zagiet sawmthum ni sal dingin peipi hi;

³⁰ Nebuchadrezzar a kumpi suo zaw a kum sawmni le thum kumin kumpi cing galkapmangpa Nebuzaradan in a sal dingin zasagi sawmli nga peipi hi; a unpi-in mi tulli le zaguh pha hi.

Jehoiachin a Saltanna-ah Maipha Nga

³¹ Judah Kumpipa Jehoiachin a saltan zaw kum sawmthum le kum sagina, hla sawm le nina, ni sawmni le ni nga ni-in Evil-merodach Babylon kumpi-in maang a, kumpi-a a maan kipat kumin Judah Kumpipa Jehoiachin maipha pie-in thong sung pan a ladawh hi;

³² ama hoitahin hopi a, Babylon gama a ompi kumpi dangte sangin a sang zaw tona a pie hi.

³³ Tuaci’n Jehoiachin in a thong puonte suodawh a, nisimin a hin sung teng kumpipa’ sabuoi-ah an a ne zing hi.

³⁴ Ama a hin sung tungtawn a si tanpha-in Babylon kumpipa in nisielin a neh ding an manmanin a pie hi.