Jeremiah 43 - Zo Bible

Egypt-ah Kipeipi, Jeremiah in Thukhenna ding Genkhol

¹ Topa a Pasien un amate kungah gen dinga a sawl Topa a Pasien uh’ thute zosie Jeremiah in mi zosie tungah a gen zaw ciengin,

² Hoshaiah’ tapa Azariah le Kareah’ tapa Johanan a kipan mi kiphasah dangte zosie in Jeremiah kungah, “Na zuou zuoupi na gen ahi bo hi. Topa i Pasien in, ‘Egypt gama a teng dingin pei sih un,’ ci-in a gen dingin nang ang sawl kha sih hi.

³ Hizongle Neriah’ tapa Baruch in Chaldea mite kungah kote ei pie-in, amate in kote ei thatin, ahi sihle Babylon gamah sala ei kai thei nadingin kote langpang dinga nang ang hantawh ahi bo hi,” a ci uhi.

⁴ Tuaci’n Kareah’ tapa Johanan le galkapmang zosie a kipan mi zosie in Judah gama op suoh ding Topa’ thugen a mang sih uhi.

⁵ Ahi vangin Kareah’ tapa Johanan le galkapmang zosie in a kidelmangna uh gam zosie panin Judah gama teng dinga a kilekia Judah a omlai teng zosie a peipi uhi.

⁶ Papi, nupi, naupang, kumpipa’ tanute, le kumpi cing galkapmang Nebuzaradan in Shaphan’ tapa Ahikam, a tapa Gedaliah tawh a na nuasie mi zosie le kamsangpa Jeremiah le Neriah’ tapa Baruch-te zong a peipi uhi.

⁷ Topa’ thu a man lo ziehun Egypt gamah pei-in Tahpanhes a tung uhi.

⁸ Tua ciengin Tahpanhes-a om Jeremiah kungah Topa’ thu a tung hi:

⁹ Na khut tawh suongtum golte la inlen, Tahpanhes-a Pharaoh kumpi inn lutna tungman suongpha nei-ah phum in. Na phum lam Judah mite musah inlen,

¹⁰ amate kungah, Vanglien Topa in tam bangin ci hi: Keima in mi sawlin ka nasempa Babylon Kumpi Nebuchadnezzar kang peipi ding a, ama in tam ka suongphumte tungah a kumpi topha daw-in tuate tungah a kumpi puonbuh a zah ding hi.

¹¹ Ama kuonin Egypt gam sim ding a, pul natna tawh si dinga sesate pul natna tawh sisah ding a, sala mat dinga sesate salin kikai sahin, namsau tawh si dinga sesate zong namsau tawh a si ding hi.

¹² Ama in Egypt pasien-te kibiehna biehinnte sungah mei taw-in, tua teng hal tumin salin a peipi ding hi; tuale tuucingpa in a puon tunga khate a sot sieng bangin ama in Egypt gam sung a siengsah ding hi; tuale lungmuong tahin tua panin ama a pei ding hi.

¹³ Ama in Egypt gam Heliopolis khuo-a suong milim khuomte phelmang ding a, Egypt pasien-te’ biehinnte haltum ding hi.