Jeremiah 42 - Zo Bible

Jeremiah in a Khuolal lo nadingun a Suohta Mite Ngaisutna Pie

¹ Tua ciengin galkapmangte zosie, Kareah’ tapa Johanan, Hoshaiah’ tapa Azariah, le a neupen pan a golpen dongin mi zosie in ama lam a neh vua,

² kamsangpa Jeremiah kungah, “Hepina tawh kote thumna ei ngai inlen, ko a omlaite adingin Topa na Pasien kungah thu ei ngetpieh in. Bangzieh ahei cile na mit tawh nei mu bangin mi tampi lah panin themno khat beh ei kinuasie ta bo hi.

³ Topa na Pasien in ka pei nading uh hileh ka bawl ding uh hileh ei lahsah in,” a ci uhi.

⁴ Kamsangpa Jeremiah in amate kungah, “Hoi mama hi: Na nget bangun Topa na Pasien uh kungah thu ka ngen ding a, note tungah Topa ei dawnna bangbang kang gen ding hi; bangma kang im malmal sih ding hi,” a ci hi.

⁵ Amate in a banbanin Jeremiah kungah, “Topa na Pasien in na kungah ko dinga ang gen thu zosie bangin ka gamtat sih tah ma uleh kote langkhatah a man le a muontah teci-in Topa hing pang taheh.

⁶ Topa i Pasieh uh thugen ka man ciengun kote ka hoi thei nadingun, nang kang sawlna uh Topa i Pasien uh’ thugen bangbang hoi taleh sie taleh ka mang ding uhi,” a ci uhi.

⁷ Ni sawm zaw ciengin Jeremiah kungah Topa’ thu a tung hi.

⁸ Tua ciengin ama in Kareah’ tapa Johanan le ama kunga om galkapmang teng zosie, le mi zosie a neupen panin a golpen dongin hlan a,

⁹ amate kungah, “Ama mai-ah na deina uh thumpieh dinga nei sawlna pa uh Israel’ Pasien Topa in tam bangin ci hi:

¹⁰ Tam gama na op suoh uleh beh note hing phelkhie loin kang lam ding hi; keima in note kang phutdet ding a, kang botzuon sih ding hi; azieh pen note tungah gimna kang tunsah ziehin ka kisia hi.

¹¹ Ni dang na giin bangun Babylon kumpipa giing ta sih un; Topa in a cina-ah, ama giing sih un, azieh pen ama’ khut sung panin ang hundam ding le ang hunkhie dingin note tawh kang omton hi.

¹² Keima in note kang hepi ding a, ama in note tungah hepina nei-in na pienna uh na gam ma vuah ang tengsahkia ding hi.

¹³ Ahi vangin note in tam bangin Topa na Pasien uh’ thu mang loin, ‘Tami gamah teng sih va ung,’ na ci suoh vua,

¹⁴ ‘Hi lo hi, gal a op lona, pengkul gin a kizah lona, an du gilkiel lona Egypt gamah pei-in tua munah ka teng ding uhi,’ na ci uleh,

¹⁵ Judah a omlai teng aw, Topa’ kammal ngai un. Israel’ Pasien, Vanglien Topa in tam bangin ci hi: Egypt gamah pei-in tua sunga ten ding na sawm paupau uleh,

¹⁶ na giin uh namsau in Egypt gamah note ang pha ding a, na giin uh kielpi in Egypt gamah note ang nuadel ding hi; tua munah note na si ding uhi.

¹⁷ Egypt gamah a teng dinga a pei sawm paupau mi zosie a unpi-un namsau, kielpi, le pulnatna tawh si ding uhi; amate tunga ka tunsah ding gimna panin a omlai mite ahi sihle a suohta mite koima a om sih ding uhi.

¹⁸ “Bangzieh ahei cile Israel’ Pasien, Vanglien Topa in tam bangin ci hi: Jerusalem khuo-a a teng mite tungah ka lungthahna le ka lunghanna ka sun bangin Egypt gamah na pei uleh ka lungthahna na tung vuah hing kisung ding hi. Note pen mite’ lipkhap le kidah, hamsiet le zako-in na om ding uhi. Note in tam mun na mukia nawn sih ding uhi.

¹⁹ Judah a omlai teng aw, Topa in note kungah, Egypt gamah pei sih un, ci-in ang gen zo hi. Tuni-a na tung vua kang hil thute teltahin kithei ta un.

²⁰ Note in a siehuoi khielna na bawl zo ta uhi. Azieh pen Topa na Pasien uh kungah nei sawl vua, ‘Topa i Pasien uh kungah thu ei ngetpieh inlen, Topa ka Pasien un ang gen popo ko kungah ei gen inlen, kote in ka sem ding uhi,’ nei ci uhi.

²¹ Tuaci’n tuni-in na kung vuah kang gen zo ta hi, ahi vangin Topa na Pasien un na kung vua gen dinga ei sawl thu khat beh na mang sih uhi.

²² Tua ciengin note in teltahin kithei ta un, na ten nopna mun vuah namsau, kielpi, le pulnatna tawh na si ding uhi,” a ci hi.