Jeremiah 40 - Zo Bible

Gam Uhpa Gedaliah tawh Jeremiah Omton

¹ Babylon gamah saltang dingin Jerusalem le Judah gam sunga saltang zosiete tawh kol kibulin kumpi cing galkapmangpa Nebuzaradan in Ramah panin ama a peisah zaw ciengin Jeremiah kungah Topa’ thu a tung hi.

² Kumpi cing galkapmangpa in Jeremiah hlanin ama kungah, “Topa na Pasien in tam munah tam gimna tunsah dingin ei galgih zo hi.

³ Tu-in a thu mang loin Topa tungah maw zo na hi ziehun, Topa in tam thute tungsahin a gensa banga a bawl ahi hi. Tua ahi ziehin note tungah tam bang thu ang tung ahi hi.

⁴ Tu-in en in, na khuta ang kihenna siakhaute panin tuni-in nang kang hla zo ta hi. Babylon ah kei tawh nang pei nop leh hing pei in, tua hile keima in limtahin kang kem ding hi; ahi vangin Babylon ah keima tawh nang peiton nop sih leh lah hing pei da in. En in, gam zosie na mai-ah om hi; na pei nopna popo ah pei in.

⁵ Na op den dinga ahile Babylon kumpipa in Judah gam khuopi zosie ah a uhte dinga a koi Shaphan’ tapa, Ahikam, a tapa Gedaliah kungah kilekia inlen, ama tawh mite lahah teng in.; na ten nop sih leh lah na pei nopna popo ah kipei lel in.

⁶ Tua ciengin Ahikam’ tapa Gedaliah’ opna Mizpah ah Jeremiah pei a, ama tawh gam sunga kinuasie mite lahah a teng hi.

⁷ Babylon kumpipa in gam uhpa dingin Ahikam’ tapa Gedaliah a koi thu le Babylon ah sala kipeipi lo pasalte, numeite, le gam sunga mizawng pente ama’ khutah a piehna thu, gam lahah a om galkapmangte le a galkap zosie in a zah ciengun,

⁸ Mizpah-a Gedaliah kungah amate a pei vua- Nethaniah’ tapa Ishmael, Kareah’ tapa Johanan, Tanhumeth’ tapa Seraiah, Netophah-te ahi Ephai’ tate ahi Maacath-te’ tapa Jezaniah-te le a galkapte a pei uhi.

⁹ Shaphan’ tapa Ahikam, a tapa Gedaliah in amate le a galkapte kungah kiciem a, “Chaldea-te’ na na sep ding uh pen zau tuon sih un. Gam sungah teng unlen, Babylon kumpipa’ na sem un, tua hile no adingin ang hoi ding hi.

¹⁰ Kei ka hi leh eite kunga ang pei ding Chaldea-te mai-ah note tanga a ding dingin Mizpah ah ka om ding hi; ahi vangin note na hi uleh lenggazu, khal singgate le sathaute khawmin na beel sung vuah koi unlen, na lahsa uh khuote ah teng un,” a ci hi.

¹¹ Tua ma bangin Moab gama a teng Judah mi zosie, Ammon mite lahah a tengte, Edom gama a tengte, le gam danga a omte in, Babylon kumpipa in Judah gamah a omlai mi pawlkhat nuasie a, tuate tungah gam uhpa dingin Shaphan’ tapa Ahikam, a tapa Gedaliah koi zo hi, ci thu a zah ciengun,

¹² Judah-te zosie a kithezahna uh gamcin teng panin Judah gam ah a kilekia vua, Judah gam, Mizpah-a Gedaliah kungah a pei uhi; tuale amate in lenggazu le khal singga kicing tahin a laton uhi.

¹³ Tu-in Kareah’ tapa Johanan le gam lahah galkapbute zosie Mizpah-a om Gedaliah kungah a pei vua,

¹⁴ ama kungah, “Ammon kumpipa Baalis in nangma that dinga Nethaniah’ tapa Ishmael ang sawl lam a thei kha vawt lo na hi amah?” a ci uhi. Ahi vangin Ahikam’ tapa Gedaliah in amate a tahsang sih hi.

¹⁵ Tua ciengin Kareah’ tapa Johanan in Mizpah-a om Gedaliah hopi dap a, “Nei hepina tawh ei peisah inlen, Nethaniah’ tapa Ishmael ei thatsah in, koima in thei lo ding hi. Nangma ang bel na kimvela om Judah mite zosie kithezahin a omlai Judah mi themkhatte zong a cigam nadingin bang dinga ama in nang ang tha laizang ding ahei?” ci-in a dap hopi hi.

¹⁶ Ahi vangin Ahikam’ tapa Gedaliah in Kareah’ tapa Johanan kungah, “Tua bang silte bawl vet sin; bang ding ahei cile Ishmael tungtang zuouthu na gen hi,” a ci hi.