Jeremiah 39 - Zo Bible

Jerusalem a Kilahna

¹ Judah Kumpipa Zedekiah a kumpi suo zaw kum kuona a hla sawmna hla-in, Jerusalem sim dingin Babylon kumpipa Nebuchadnezzar le a galkap zosie kuonin Jerusalem a imtawm uhi.

² Zedekiah kumpi a suo zaw kum sawm le kum khat, a hla lina, a ni kuo ni-in khuopi’ kulpi kitovang hi.

³ Jerusalem khuopi a kilah ciengin Nergal-sharezer, Samgar-nebo, Rabsaris a kici Sarsechim, Rabmag a kici Nergal-sharezer-te a kipan Babylon kumpipa’ uliente zosie pei-in tunkot laita penah a to uhi.

⁴ Judah Kumpipa Zedekiah le galkap zosie in amate a mu ciengun a taimang vua, zan lai-in kumpipa’ um peina lampi zui-in kul tegel kikala tunkot kantanin khuopi panin a pusuoh uhi; tuale amate Arabah lamah a pei uhi.

⁵ Ahi vangin Chaldea galkapte in amate a nuadel vua, Jericho zang lei-ah Zedekiah a pha uhi; tuale amate in ama a mat zaw ciengun Hamath gam sung Riblah khuo-a om Babylon Kumpipa Nebuchadnezzar kungah a peipi uhi; tuale ama tungah ama in thu a khen hi.

⁶ Babylon kumpipa in Riblah khuo ah Zedekiah’ mitmu-in a tapate that hi; Babylon kumpipa in zong Judah uliente zosie that hi.

⁷ Ama in Zedekiah’ mittang kheipieh a, Babylon-a zawpi dingin siakhau tawh ama a hen hi.

⁸ Chaldea-te in kumpipa’ inn le mite’ inn a hal vua, Jerusalem kulpi a susie uhi.

⁹ Tua ciengin kumpi cing galkapmangpa Nebuzaradan in khuopi sunga a kinuasie lai mite le ama bela a tai mite tawh, Babylon ah sal dingin a kai hi.

¹⁰ Kumpi cing galkapmangpa Nebuzaradan in Judah gam sungah bangma a nei lo mizawng pawlkhat nuasie a, ama in lengga um le lote amate a pie hi.

Jeremiah Kihla, Ebed-melech Phawh

¹¹ Babylon kumpipa Nebuchadnezzar in Jeremiah tawh kisai-in kumpi cing galkapmangpa Nebuzaradan tungtawnin thu pie a,

¹² “Ama ladawh inlen, hoitahin kemin genthei bawl sin, na kunga ang nget bangin na bawl in,” a ci hi.

¹³ Tuaci’n kumpi cing galkapmangpa Nebuzaradan, Rabsaris a kici Nebushazban, Rabmag a kici Nerga-lsharezer te le Babylon kumpipa’ uliente zosie in mi sawlin

¹⁴ thong huong sung panin Jeremiah a ladawh uhi. Amate in inn lama puohkia dingin Ahikam’ tapa Gedaliah a ap uhi. Tuaci’n a mipite tawh ama a om hi.

¹⁵ Thong huong sungah a kikhum laitahin Jeremiah kungah Topa’ thu a tung hi:

¹⁶ Pei inlen Ethiopia-te Ebed-melech kungah tam bangin va gen ta’n: Israel’ Pasien, Vanglien Topa in tam bangin ci hi: Tam khuopi hoi nading ahi lo, a siet nadinga ka gensa thute ka tungsah ding a, khumi ni ciengin na mai-ah tua thute ang tangtung ding hi.

¹⁷ Ahi vangin khumi ni ciengin keima in nang kang hundam ding a, na giin mite tungah ang kipie sih ding hi, Topa in ci hi.

¹⁸ Bangzieh ahei cile nang kang hundam valon ding a, namsau tawh si loin galvan lah bangin na hinna na suotahpi ding hi, Topa in ci hi.