Jeremiah 38 - Zo Bible

Tuikhuh Sungah Jeremiah

¹ Tu-in Mattan’ tapa Shephatiah, Pashhur’ tapa Gedalaiah, Shelemiah’ tapa Jehucal, le Malchiah’ tapa Pashhur-te in Jeremiah in mi zosie tunga a gen thute a za vua,

² Topa in a genna ah, tami khuopi sunga tengte namsau, kielpi, le pulnatna tawh a si ding uhi; hizongle Chaldea-te kunga a peite a hing ding uhi; amate in galvan lah bangin a nuntahna uh suotatpi-in a hing ding uhi.

³ Topa in a genna ah, tami khuopi pen Babylon kumpipa’ galkapte khut sungah kipie valon ding a, kila ding hi.

⁴ Tua ciengin uliente in kumpipa kungah, “Tam mipa tha dingin kilawm hi, azieh pen tam thute a gen ziehin ama in tami khuopi sunga a omlai galkapte le mi zosie a lungkiesah hi. Bangzieh ahei cile tam pa in tami mite’ phattuom nading sui loin a gim nga nading uh sui ahi zaw hi,” a ci uhi.

⁵ Kumpi Zedekiah in, “Tanah ama a om hi; ama note’ khut sungah ama a om hi; azieh pen kumpipa in note ang langpang zo sih hi,” a ci hi.

⁶ Tuaci’n amate in Jeremiah manin thong huong sunga om kumpipa’ tapa Malchiah’ tuikhuh sungah a paimang vua, khau huol tawh Jeremiah a khiesuh uhi. Tua tuikhuh sungah tui na om loin buon beh na om a, tuale buon lahah Jeremiah a tumsuh hi.

Ebed-melech in Jeremiah Hunkhie

⁷ Amate in tuikhuh sungah Jeremiah a koi lam uh kumpipa’ inn sunga a om numeite a uh cilgesa pasal Ethiopia-te Ebed-melech in a za hi. Benjamin’ Tunkot ah kumpipa na to kha citciet hi.

⁸ Tuaci’n kumpipa’ inn panin Ebed-melech pei-in kumpipa hopi a,

⁹ “Ka pu kumpipa aw, tam mite khuo sungah moh a op tah lo ziehin tuikhuh sungah a kielsi dingin kamsangpa Jeremiah khiesuhin ama tungah gitlona tawh a gamtatnate zosie uh pen a khiel uh ahi hi,” a ci hi.

¹⁰ Tua ciengin kumpipa in Ethiopia-te Ebed-melech sawl a, “Tam sung panin mi thum zawpi inlen, kamsangpa Jeremiah a si masangin tuikhuh sung panin va kaito ta un,” a ci hi.

¹¹ Tuaci’n Ebed-melech in a mite zawpi a, kumpipa’ inn ah pei-in vankholna inn sunga puon koina ah lutin tua sung panin puonah a ehsate le puon luite la-in Jeremiah’ opna tuikhuh sungah khau tawh a khiesuh uhi.

¹² Tua ciengin Ethiopia-te Ebed-melech in Jeremiah kungah, “Na zapbanei le khauhuolte kikalah puonsiete le puon-ah luite dap in,” a ci hi. Jeremiah in khum bangin a bawl hi.

¹³ Tua ciengin amate in tuikhuh panin khauhuol tawh Jeremiah a kaito uhi. Tuale thong huong sungah Jeremiah a omsuoh hi.

Zedekiah in Jeremiah Thu Dongkia

¹⁴ Kumpipa Zedekiah in kamsangpa Jeremiah thuta a, Topa’ biehinn sung lutna a thumna ah ama a kimupi hi. Kumpipa in Jeremiah kungah, “Thu khat kang dong ding hi; bangma ei im malmal sin,” a ci hi.

¹⁵ Jeremiah in Zedekiah kungah, “Hing gen leng ei that lo ding na mah? Ngaisutna hing pie leng lah ngai ngap sih vateh,” a ci hi.

¹⁶ Tuaci’n Kumpipa Zedekiah in Jeremiah kungah, “Eite hinna ei pie Topa a hing ahi ma bangin keima in nang kang that sih ding a, nang ang thasawm tam mite’ khut sungah zong kang pie sih ding hi,” ci-in a kiciemdap hi.

¹⁷ Tua ciengin Jeremiah in Zedekiah kungah, “Israel’ Pasien, Vanglien Topa in ang genna-ah, Babylon kumpipa’ uliente kunga na lut leh beh ang kihinkhawi ding a, tam khuopi mei tawh kihal loin nangma le na innkuonpite na hing ding uhi.

¹⁸ Ahi vangin Babylon uliente kunga na lut sih leh Chalde-te’ khut sungah tam khuopi kipie ding a, amate in mei tawh halin nang zong amau’ khut sung panin na suohta sih ding hi,” a ci hi.

¹⁹ Kumpi Zedekiah in Jeremiah kungah, “Chaldea-te kunga a tai Judah-te ka giing hi, azieh pen a khut sung vuah ei kipie thei kha ding a, tuale amate in ei bawlsie ding uhi,” a ci hi.

²⁰ Jeremiah in, “Tua bang pieng lo ding hi. Nangma kunga kang gen Topa’ thu mang phot lel in, tua hile nang adingin hoi ding a, ang kihinkhawi ding hi.

²¹ Ahi vangin na lut nop vawt sih leh Topa in kei kunga ei lah mangmuna tami ahi hi:

²² Judah kumpipa’ inn sunga a kinuasie numei zosie Babylon kumpipa’ uliente kungah kipeipi-in tua numeite in, ‘Na lawm muonte in nang ang sol ta vua, ang zo ta uhi; tu-in buon lahah na keng tum ahi ziehin amate in ang taisan ta uhi,’ a ci uhi.

²³ Chaldea-te tungah na zite ule na tate zosie uh kipeipi ding a, amau’ khut sung panin nang mama zong na suohta sih ding hi. Babylon kumpipa in ang man ding hi; tuale tami khuopi mei tawh kihal ding hi,” a ci hi.

²⁴ Tua ciengin Zedekiah in Jeremiah kungah, “Tami i kiholimna koima dang theisah vawt sin, na theisah leh na si ding hi.

²⁵ Uliente in nang kang hopi lam a zah khah vua, amate hing pei-in na kungah, ‘Kumpipa kunga na thugente hing gen in; bangma ei im sin, nei im leh kang that ding uhi. Kumpipa in nang kungah bang teng ang gen ei?’ ang ci uleh

²⁶ amate kungah, ‘Jonathan inn ah a si den dinga ei sawlkia lo nadingin kumpipa kungah thumna lai a va pie ka hi bo hi,’ na ci ding hi,” a ci hi.

²⁷ Uliente zosie Jerusalem ah pei-in ama thu a dong uhi; tuale ama in kumpipa’ thuhil bang lien ma-in amate a dawng hi. Tuaci’n ka holimna uh a dapzah koima a op lo ziehun ei thudawh a khawl ta uhi.

²⁸ Tuale Jerusalem a kilah ni tan dongin Jeremiah thong huong sungah a omsuoh hi.