Jeremiah 37 - Zo Bible

Zedekiah’ Kimot Lametna

¹ Babylon Kumpipa Nebuchadnezzar in Jehoiakim’ tapa Coniah’ zalaih dingin Judah gamah Josiah’ tapa Zedekiah kumpi semsah hi.

² Ahi vangin ama ahi a, a nasemte ahi a, gam sung mite ahi zongin, kamsangpa Jeremiah tung tawna Topa’ thugente a ngai sih uhi.

³ Kumpi Zedekiah in kamsangpa Jeremiah kungah Shelemiah’ tapa Jehucal le Maaseiah’ tapa siempu Zephaniah sawl a, “Kote adingin Topa ka Pasien uh kungah hepina tawh thu ei ngetpieh in,” cisah hi.

⁴ Tua hunin Jeremiah thongkia nai lo ahi ziehin mite lahah sungtum pusuoh thei lai hi.

⁵ Khum hun laitahin Egypt panin Pharaoh’ galkapte kuonto zo uhi; tuale Jerusalem a busim Chaldea-te in amau’ thu a zah ciengun Jerusalem panin a kinuale uhi.

⁶ Tua ciengin kamsangpa Jeremiah kungah Topa’ thu tung hi:

⁷ Israel’ Pasien, Topa in tam bangin ci hi: Kei kunga thu ang dongsah Judah kumpipa kungah, nang ang hu dinga ang pei Pharaoh’ galkapte amau’ gam Egypt ah a kilekia ding uhi, ci-in na ni gelin na va gen ta ding uhi.

⁸ Tuale Chaldea-te kilekia-in tam khuopi ang sim ding vua, tuaci’n amate in khuopi la-in mei tawh a hal ding uhi.

⁹ Topa in tam bangin ci hi: “Eite kung panin Chaldea-te a taimang tahtah ding uhi,” ci-in noma le noma kisol sih un, azieh pen amate a taimang sih ding uhi.

¹⁰ Note in ang sim Chaldea galkap bup zo siengin, a buh sung vua a liem teng beh suohtasah kha phiel nan locin, amate hing tho-in tam khuopi mei tawh ang halpieh veve ding uhi.

Jeremiah Thongah Kikhum

¹¹ Pharaoh’ gakapte in a neh ziehin Jerusalem panin Chaldea’ galkapte a nuakin uh ciengin,

¹² Benjamin gama mipite lahah ama’ neisa a tanh ding teng a la dingin Jerusalem panin Jeremiah a pei hi.

¹³ Benjamin’ Tunkot a tun ciengin Hananiah’ tapa Shelemiah, a tapa Irijah a kici tua sunga kot cingpa in kamsangpa Jeremiah na manin ama kungah, “Nang Chaldea-te lamah a taidap ding na hi hi,” a ci hi.

¹⁴ Jeremiah in, “Tua pen zuouthu ahi hi; Chaldea-te kungah ka taidap sih ding hi,” a ci hi. Ahi vangin Irijah in a thu gen ngai loin Jeremiah man a, uliente kungah a zawpi hi.

¹⁵ Jeremiah tungah uliente a lungthah mama vua, tuale ama satin thuvanpi pa Jonathan’ inn sungah a khum uhi, a zieh pen khumi inn thonga kizang ahi hi.

¹⁶ Tua bangin tuikhuh inn sunga leinei dan sungah Jeremiah kikoi a, tua munah ni tampitah a om hi.

¹⁷ Tua ciengin kumpi Zedekiah in ama hlansahin ama a kimupi hi. Kumpipa in a inn sungah thu dongdap a, tuale ama in, “Topa tung panin thu khatpo a om ei mah?” ci hi. Jeremiah in, “ Om ma ei!” a ci hi. Tua ciengin ama in, “Nang pen Babylon kumpipa’ khut sungah ang kipie ding hi,” a ci hi.

¹⁸ Jeremiah in zong kumpi Zedekiah kungah, “Kei thong nei khieh thei nadingin nang tung ahi a, na nasemte tung le tam mite tungah ahi zongin bang khielna ka bawl ahei?

¹⁹ Note tungah, ‘Nang le tam gam sim dingin Babylon kumpipa ang kuon sih ding hi,’ ci-a thu ang gen na kamsangte uh hei-ah om uh ahei?’ a ci hi.

²⁰ Ka pu kumpipa, hepina tawh tu-in ka thugen ei ngaipieh in: Ka thum ka tauna ei ngaipieh dingin keima tungah hing hoi inlen, khum sunga a si dingin thuvanpi pa Jonathan’ inn ah ei puohkia malmal sin,” a ci hi.

²¹ Tuaci’n Kumpipa Zedekiah in thupie a, amate in kumpi’ thong sungah Jeremiah a khum uhi; tuale khuopi sunga moh zosie a tawp masangin gawlzinga moh-emte tung panin ni sielin mo lumkhat ta ama kipie hi. Tuaci’n kumpi’ thong sungah Jeremiah a om suoh hi.