Jeremiah 36 - Zo Bible

Biehinnpi Sungah Laiziel Kisim

¹ Judah Kumpipa Josiah’ tapa Jehoiakim kumpi a suo zaw a kum lina kumin tami Topa’ thu Jeremiah kungah a tung hi:

² Laiziel khat la inlen, tua sungah Josiah’ kumpi sep hun sung, nang kang hopi ni-a kipanin tuni cieng dong Israel gam, Judah gam le minam zosie langkhatah na kunga kang gen zosie giel in.

³ Judah innkuonte in amate tunga ka tunsah sawm gimna zosie a zah ciengun amate a unpi-un a gitlona uh panin a kihei kha ding vua, keima in zong amau’ khielna le amau’ mawna ka maisah thei kha ding hi.

⁴ Tua ciengin Jeremiah in Neriah’ tapa Baruch hlan a, Topa in ama kunga a gensa thu zosie Baruch in Jeremiah’ sit bang lienin a unpi-in laiziel sungah giel hi.

⁵ Jeremiah in Baruch thupie a, “Topa’ biehinnpi sungah kei ei kilutsah nawn lo hi;

⁶ tua ahi ciengin nang mama va pei ta’nlen, antan ni khatin Topa’ biehinn sunga a om mi zosie’ zah dingin kang sit bangin laiziel sunga na gielsa Topa’ kammalte na va sim ta ding hi. Nangma in a khuopi uh pana ang peito Judah mi zosie’ zah dingin na sim ding hi.

⁷ Tua hile a tauna uh Topa mai-ah tungin, tuaci’n a unpi-un a gitlona uh panin a kihei thei kha ding uhi, bangzieh ahei cile Topa in tam mite tungah a tunsah dinga a gensa a lungthahna le a lungsona na sie mama hi,” a ci hi.

⁸ Kamsangpa Jeremiah in laiziel sunga Topa’ kammal sim dingin a sawl bangin Neriah’ tapa Baruch in Topa’ biehinn sungah a sim hi.

⁹ Josiah’ tapa Judah Kumpipa Jehoiakim in kumpi a sep zaw a kum ngana, a hla kuona hla-in Jerusalem-a a om mi zosie le Judah gam khuopite panin Jerusalem-a ang pei mi zosie in Topa mai-ah an tan nading a phuongzah uhi.

¹⁰ Tua ciengin Topa’ biehinn Tunkot Tha lutna, Topa’ biehinn sung, huong tungnunga om thuvanpi pa Shaphan’ tapa Gemariah’ innkhan sungah mi zosie’ zahin Baruch in laiziel sung panin Jeremiah’ thugente a simkhie hi.

Kumpi Innah Laiziel Kisim

¹¹ Gemariah’ tapa, Shaphan’ tapa Micaiah in laiziel sung panin Topa’ kammalte a zah ciengin,

¹² kumpipa’ inn sunga thuvanpi pa’ innkhan ah a peisuh hi; tuale khumtahah thuvanpi pa Elishama, Shemaiah’ tapa Delaiah, Achbor’ tapa Elnathan, Shaphan’ tapa Gemariah, le Hananiah’ tapa Zedekiah-te a kipan uliente a unpi-un a na to uhi.

¹³ Tuale Micaiah in, mi zosie’ zahin Baruch in laiziel panin a simkhiet a zahsa thu zosie amate kungah a gen hi.

¹⁴ Tua ciengin ulien zosie in Baruch kungah Cushi’ tapa Shelemiah, a tapa Nethaniah, a tapa Jehudi a sawl vua, “Mite’ zahin na sim laiziel tawi-in hing pei in,” ci-in a hlansah uhi. Tuaci’n Neriah’ tapa Baruch in zong a khut sunga laiziel la-in amate kungah a pei hi.

¹⁵ Tuale amate in ama kungah, “To inlen hing sim in,” a ci uhi. Tuaci’n Baruch in amate kungah a simkhie hi.

¹⁶ Amate in tua kammal zosie a zah ciengun patauna tawh khatlekhat kihei-in a ki-en ciet vua, Baruch kungah, “Tami thute kumpipa kungah ka ko lo uh phamaw hi,” a ci uhi.

¹⁷ Tua ciengin Baruch kungah, “Tami thu teng bang na ci giel ahei? Jeremiah’ ang sit banga na giel amah, ei gen in,” ci-in a dong uhi.

¹⁸ Baruch in amate kungah, “Ama in tam thu zosie ei sit a, tua teng laitui tawh laiziel tunga ka giel ahi hi,” ci-in a dawngkia hi.

¹⁹ Tua ciengin uliente in Baruch kungah, “Nang le Jeremiah pei-in kiphuol unlen, na opna uh koima theisah sih un,” a ci uhi.

Jehoiakim in Laiziel Haltum

²⁰ Amate in thuvanpi pa Elishama’ innkhan sungah laiziel nuasie-in kumpipa’ huong sungah lutin tua thu zosie kumpipa kungah a gen uhi.

²¹ Tua ciengin kumpipa in tua laiziel a la dingin Jehudi sawl a, ama in zong thuvanpi pa Elishama’ innkhan panin a la hi; tuale Jehudi in kumpipa le ama’ gei-a a ding ulien teng mai-ah a sim hi.

²² Tua laitahin kumpipa a phalbi inn sungah to a, (a hla kuona ahi hi) a mai-a meibung ah mei a kuong hi.

²³ Jehudi in khawh thum khawh li bang a sim zaw ciengin kumpipa in namta khat tawh tuate atsanin meibung sunga mei-ah hal a, tua laiziel buppi a kahvam dongin meikhuh sungah a paipai hi.

²⁴ Hizongle kumpipa ahi a, tam kammal a za a nasemte ahi zongin koima khat beh patau tuon loin a puon uzong a balkeh beh sih uhi.

²⁵ Laiziel a hal lo nadingin Elnathan, Delaiah, le Gemariah-te nangawn in kumpipa a hlo vua, ama in a mang sih hi.

²⁶ Tuale kumpipa in thuvanpi pa Baruch le Jeremiah-te man dingin kumpipa’ tapa Jerameel, Azriel’ tapa Seraiah le Abdeel’ tapa Shelemiah-te thu a pie hi. Ahi vangin Topa in ama gel a phuol hi.

Jeremiah in adang Khat Sitkia

²⁷ Tua ciengin kumpipa in Jeremiah’ kamgen bangin Baruch in a giel tua laiziel, a kammalte tawh a haltum zaw ciengin Jeremiah kungah Topa’ thu a tung hi:

²⁸ Laiziel adang khat la inlen tua tungah Judah Kumpipa Jehoiakim haltumsa laiziel masa sunga thu zosie atkia in.

²⁹ Tuale Judah Kumpipa Jehoiakim tawh kisai-in tam bangin na gen ding hi: Tuale Topa in a genna ah, Babylon kumpipa ang pei tahtah ding a, tami gam susie-in mihing le ganhingte sumaimang ding hi, ci-in tami lai sungah bang ziehin giel na hei? ci-in na gen a, tua laiziel na haltum ngam giap hi.

³⁰ Tua ahi ziehin Kumpipa Jehoiakim tawh kisai-in Topa in tam bangin ci hi: Ama in David’ topha tungah a to ding mi koima khat beh a nei sih ding a, ama luonghawm sun lai-in nisa lah le zan lai-in vuasan lahah kipaimang ding hi.

³¹ Keima in amau’ khielna ziehin ama le a suonlehlahte le a nasemte dan ka pie ding hi; keima in amate tung, Jerusalem-a tengte tung, le Judah mite tungah tunsah dinga ka galgih gimnate ka tungsah ding a, ahi vangin amate in ka thu a mang sih ding uhi.

³² Tua ciengin Jeremiah in adang laiziel khat la a, Neriah’ tapa thuvanpi pa Baruch tungah Judah Kumpipa Jehoiakim in meikhuh sunga a haltumsa laiziel sunga Jeremiah’ sitsa banga a giel pen a pie hi; tuate sungah a kibang kammal tampi kiguonbe hi.