Jeremiah 28 - Zo Bible

Hananiah in Jeremiah Langpangin Si

¹ Khum kum sung ma-in, Judah Kumpi Zedekiah kumpi-a a maan zaw kum li le hla nga a cin kumin, Gibeon panin Azzur’ tapa kamsang Hananiah in Topa’ biehinn sunga siempute le mi zosie mai-ah keima ei hopi a,

² “Vanglien Topa Israel’ Pasien in tam bangin a gen hi: Keima in Babylon kumpipa’ hahkol ka tawngsansah ta hi.

³ Keima in kum ni sungin Babylon Kumpipa Nebuchadnezzar in tam mun pana a lah Babylon khuo-a a peipi, Topa’ biehinn sunga vanzah zosie tam munah ka tutkia ding hi.

⁴ Keima in Judah kumpi Jehoiakim’ tapa Kumpi Jeconiah le Judah gam pana Babylon ah sala a peite zosie tam munah ka peipi kia ding hi, Topa in ei ci hi. Azieh pen Babylon kumpipa’ hahkol ka tawngsah ding hi,” a ci hi.

⁵ Tua ciengin Topa’ biehinn sunga a ding siempute le mi zosie mai-ah kamsang Jeremiah in kamsang Hananiah hopi a,

⁶ kamsang Jeremiah in, “Amen! Topa in khum bangin hing bawl taheh. Topa in na thugenkholna bangin hing tungsah ta hinlen, Babylon panin Topa’ biehinn sunga vanzahte le sala kiman zosie tam munah hing tutkia tapo heh.

⁷ Hizongle tu-in nang le mi zosie’ zaha kang gen tam thu na ngai ta un.

⁸ Kei le nang masanga tanglai kamsangte in gam tampi le kumpi gam liente’ tungah gal, kielpi le pulnatnate ang tung ding hi, ci-in na genkhol zo uhi.

⁹ Kilemna om ding hi, ci-in a gen kamsangpa ahile Topa in ang sawl kamsang tahtah ma amah, ci pen tua kamsangpa’ thugen ang tangtun ciengin kithei pan ding hi,” a ci hi.

¹⁰ Tua ciengin kamsang Hananiah in kamsang Jeremiah’ ngawng panin a hahkol sutpiehin a kuoitan hi.

¹¹ Tuale Hananiah in mi zosie mai-ah thu gen a, “Topa in tam bangin ci hi: Tu-a bangin kum ni sungin minam zosie’ ngawng panin Babylon Kumpipa Nebuchadnezzar’ hahkol ka tawngsansah ding hi,” a ci hi. Khuci’n kamsangpa Jeremiah a pei ta hi.

¹² Kamsangpa Hananiah in kamsangpa Jeremiah ngawng panin hahkol a sattanpieh zaw hun phabep khat ciengin Jeremiah kungah Topa’ thu a tung hi:

¹³ Pei inlen Hananiah kungah, Topa in tam bangin ci hi: Nangma in sing hahkolte na tawngsah ta a, khumte tangin sia hahkol ka bawl zo ta hi!

¹⁴ Bangzieh ahei cile Israel’ Pasien Vanglien Topa in tam bangin ci hi: Babylon Kumpipa Nebuchadnezzar’ na a sep thei nadingun minam zosie’ ngawng ah sia hahkol ka puosah zo a, amate in ama’ na a sem tahtah ding uhi; keima in ama tungah gamsate nangawn ka pie zo hi, a ci hi.

¹⁵ Kamsang Jeremiah in kamsang Hananiah kungah, “Ngai vawi, Hananiah, Topa in nang ang sawl lopi, tam mite zuouthu na umsah hi.

¹⁶ Tua ahi ziehin Topa in tam bangin ci hi: Keima in lei maitang panin kang hemmang ding hi. Nang in Topa langpanna thu na gen zo tah ziehin kum ni sungin na si ding hi,” a ci hi.

¹⁷ Khumi kum ma a hla sagi hla-in kamsangpa Hananiah a si mintah hi.