Jeremiah 26 - Zo Bible

Biehinnpi-ah Jeremiah’ Kamsanna

¹ Judah Kumpipa Josiah’ tapa Jehoiakim kumpi a suo cil lai-in Topa kung panin tam thu a tung hi:

² Topa in tam bangin ci hi: Topa’ biehinn huong sungah va ding ta’nlen Topa’ biehinn sungah a bie dinga ang pei Judah khuopite zosie va hopi in; gen dinga kang sawl zosie amate tungah gen in; kam khat zong hen nei sin.

³ Amate in a unpi-un na thugen ngai-in a gitlona panun ang kihei thei kha ding uhi. Tua hile amau’ bawl gitlonate ziehin amate tunga ka tunsah sawm gimna ka khelkia thei kha ding hi.

⁴ Nangma in amate kungah tam bangin na gen ding hi: Topa in tam bangin ci hi: Note in ka thu ngai loin na mai-vua kang koipiehsa ka thukham bangin na gamtat sih vua,

⁵ note kungah kin taha kang sawl - a thu na ngai lo vangun - ka nasem ka kamsangte’ thugen na ngai sih uleh,

⁶ tam biehinnpi pen Shiloh bangin ka bawl ding a, tam khuopi pen leitunga minam zosie’ kisamsietna-in ka bawl ding hi.

⁷ Siempute, kamsangte, le mi zosie in Topa’ biehinn sunga Jeremiah in a gen tam thute a za uhi.

⁸ Mi zosie tungah Topa in gen dinga a sawl zosie Jeremiah in a gen zaw ciengin siempute, kamsangte, le mi zosie in ama manin, “Nang na si ding hi!

⁹ Bang dingin, ‘Tam biehinn pen Shiloh tawh kibang ding a, tam khuopi ah a teng koima om loin gamdai a suoh ding hi,’ ci-in Topa’ min tawh thu hil na hei?” a ci uhi. Tuale Topa’ biehinn sunga a om mi zosie in Jeremiah a imtawm uhi.

¹⁰ Judah uliente in tam thute a zah ciengun kumpipa’ inn sung panin Topa’ biehinn sungah peito-in Topa’ biehinn lutna Tunkot Tha ah a to uhi.

¹¹ Tua ciengin siempute le kamsangte in uliente le mi zosie kungah, “Tam mipa in sina a thuoh ding kilawm hi, azieh pen na bil ciet utawh na zahsa ma bangun ama in tami khuopi lang pangin thu a gen zo hi,” a ci uhi.

¹² Tua ciengin Jeremiah in ulien zosie le mi zosie kungah, “Note in na zahsa uh tam biehinn le tam khuopi lang khatah thu gen dinga ei sawl pa pen Topa ahi hi.

¹³ Tua ahi ziehin tu-in na omdan ule na gamtatnate uh puopha unlen, Topa na Pasien uh’ thu mang un. Tua hile Topa in note tungah tunsah dinga a gelsa gimna a khelkia ding hi.

¹⁴ Hinanle kei ka hi leh tam mun na khut sung vua om ka hi hi. Hoi na sah uleh dih na sah bangun kei tungah ei bawl un.

¹⁵ Kei nei tha vua ahile, note in no mama tung, tam khuopi, le a sunga teng zosie tungah maw nei lo sisan a tungsah ding na hi lam uh kitelcien beh ta un, bangzieh ahei cile note in na bil mama utawh na zah dingun tam thute mantaha a gen dinga Topa in keima ei sawl ahi hi,” a ci hi.

¹⁶ Tua ciengin uliente le mi zosie in siempute le kamsangte kungah, “Tam pa in Topa i Pasien’ min tawh eite kunga thu ang gen ahi bo ziehin sina a thuoh ding kilawm lo hi,” a ci uhi.

¹⁷ Gam sung upa pawlkhat zong dingin a kikhawm mipite kungah,

¹⁸ “Judah Kumpi Hezekiah’ uh hun sungin Moreshheth-a Micah in Judah mi zosie kungah tam bangin a gen hi: ‘Lo dingin Zion kihlo ding hi; Jerusalem pen buathahlom suoh ding a, tuale biehinn muol pen gamlah munsang a suoh ding hi, Topa in ci hi,’ a ci hi.

¹⁹ Judah Kumpipa Hezekiah le Judah zosie in ama a that tahtah sam uh amah? Ama in Topa zatahin, Topa maipha ngen a, tuale Topa in zong amate tungah gimna tunsah ding a gensa pen khelkia zaw hi lo amah? Ahi vangin eite in eima’ tungah gimna lienpi i tungsah dihtah uhi!” a ci uhi.

²⁰ Kiriath-jearim panin Topa’ min tawh thu a hil Shemaiah’ tapa Uriah a kici midang khat zong a om hi. Jeremiah’ gen bangma-in ama in tam khuopi le tam gam lang khatah thu a gen hi.

²¹ Tuale Kumpi Jehoiakim, a galhang zosie le ulien zosie in ama’ thugen a zah ciengun kumpipa in ama tha dingin a sui hi; hizongle Uriah in tua thu a zah ciengin zau-in Egypt gamah a tai hi.

²² Tua ciengin Kumpi Jehoiakim in Egypt gamah Achbor’ tapa Elnathan le a mite sawl a,

²³ tuale amate in Egypt gam panin Uriah manin Kumpi Jehoiakim kungah a puoh vua, ama in namsau tawh tua pa satlia-in mi maimaite’ kivuina munah a luonghawm a pai hi.

²⁴ Ahi vangin Shaphan’ tapa Ahikam in Jeremiah a panpi ziehin tha dingin mite’ khut sungah kipie lo hi.