Jeremiah 21 - Zo Bible

Nebuchadnezzar’ Khut Sungah Jerusalem Tung

¹ Kumpi Zedekiah in Jeremiah kungah Malchiah’ tapa Pashhur le Maaseiah’ tapa siempu Zephaniah a sawl ciengin ama kunga a tung Topa’ kammal tam bang ahi hi:

² “Hepina tawh Topa kungah kote tangin thu ei dawh pieh in, azieh pen Babylon kumpipa Nebuchadnezzar in kote ei sim hi; ama in a sepsa bangin ko adingin Topa in na lamdang khat hing bawlin ko kung panin ama hing kilesahkia thei kha ding hi,” a ci hi.

³ Tua ciengin Jeremiah in amate kungah tam bangin ci hi:

⁴ Zedekiah kungah tam bangin na gen ding hi: Israel’ Pasien Topa in tam bangin ci hi: Kulpi pulamah note ang imtawm Babylon kumpipa le Chaldea-te na dona uh ahi, na khut sung vua om galvante nualam sena-in ka nei ding hi; tuale keima in tam khuopi laikimah amate ka kaikhawm ding hi.

⁵ Kei mama in lungthahna, lungsona le thangpaina lienpi tawh ka khut zahin ka banhat tawh note kang do ding hi.

⁶ Tuale keima in tam khuopi sunga tengte a mi a sa pumin ka satlia ding a, pulnatna lienpi tawh amate a si sieng ding uhi.

⁷ Tua zaw ciengin Topa in kang ci-in, keima in Judah Kumpipa Zedekiah, ama’ nasemte, le tam khuopi sunga teng mite- pul natna, namsau, le kielpi pana a suohta lai teng tawh a hinna uh tha dinga a sui Babylon kumpi Nebuchadnezzar’ khut sung le a galte khut sungah ka pie ding hi. Ama in a hiem namsau tawh amate a satlia ding hi; ama in amate khuotuo loin zong hinkhawi lo ding a, lainatna kici zong nei lo ding hi.

⁸ Tuale nang in tam mite kungah tam bangin na gen ding hi: En un, keima in na mai vuah sina lampi le hinna lampi ka koi hi.

⁹ Tam khuo sunga om mi poma namsau, kiel, le pulnatna tawh a si ding uhi; ahi vangin pusuoh dawhin note ang imtawm Chaldea-te kunga a lut poma gal vanlah bangin a hinna a suotatpi ding hi.

¹⁰ Bangzieh ahei cile keima in tam khuopi hoi nading hi lo, a sietna dingin ka mai ka ngat zo ta hi: Tua khu Babylon kumpipa’ khut sungah ka pie ding a, ama in mei tawh a hal ding hi.

David’ Innkuon tungah Thu Kipuoh

¹¹ Judah kumpite’ innkuon tungah tam bangin gen in: Topa’ kammal za un,

¹² David’ innkuon aw! Topa in tam bangin ci hi: Zingmawngin thutangin khen unlen, mi bawlsiepa’ khut sung panin a kisuompa hlakhie un. Ahi sihle na bawl sietnate ziehin ka thangpaina mei bangin ang kuongin koima in phel zo lo ding hi.

¹³ En un, kuom zanga a teng le zanglei tunga om suongtum aw, nangma kang langpang hi, Topa in ci hi; nang in “Koi ahiei eite ei do-a ang kumsuh zo ding, koi ahiei eite kibuhna muna ang lut zo ding?” na ci hi.

¹⁴ Na sepna ga tawh kituohin dan kang pie ding hi, Topa in ci hi; ama’ gamlahah mei ka hal ding a, a kimvel zosie ka sieng ding hi.